Американските научници со воодушевување ги претставиле резултатите од истражувањето кое покажало дека вакцината против СИВ била делотворна кај девет од вкупно 16 мајмуни. Истиот принцип би требало да се примени и на луѓето за да се испита колку вакцината може да биде ефикасна во спречувањето на ширењето на ХИВ.
Професорот Луис Пикер од Институтот VGTI при Универзитетот во Орегон тврди дека искоренувањето на овој, но и на кој било друг вирус, е навистина тешка работа, бидејќи секогаш ќе се појават ќелии кои ќе се провлечат низ анализата.
Тим научници работеле со многу агресивна форма на вирусот со име SIVmac239, кој е до сто пати по посмртоносен кај мајмуните отколку ХИВ кај луѓето.
Мајмуните заразени со вирусот умирале во просек по две години од инфекцијата. Иако, и по вакцинирањето, одредени мајмуни ја изгубиле битката со вирусот, во повеќе од половина набљудувани животни кои ја примиле вакцината ситуацијата била значително подобрена.
- Во повеќето од случаите, под многу строги критериуми, дојдовме до ситуации во кои во телата на мајмуните не остана ниту една трага од вирусот - појаснил професор Пикер.
Вакцината е заснована на друг вирус, „Цитомегаловирус“ CMV од категоријата херпеси, кој е употребен за да може одбранбениот систем на мајмуните да активира борба против молекулот на СИВ.
Научниците прво ги вакцинирале мајмуните, а потоа ги изложиле на СИВ. Воочиле дека на почетокот вирусот лесно се стабилизирал во организмот и дека потоа брзо се ширел. Но, веќе со првата реакција со организмот и неговиот одбранбен систем, вирусот бил уништен.
Мајмуните, кои позитивно реагирале на вакцината, по вакцинирањето биле отпорни на вирусот во следните година до три години.
Професорот Пикер рекол дека неговиот тим работи на откривање на причината зошто вакцината реагирала кај девет од 16 мајмуни.
- Причината, можеби, е во тоа што ХИВ е многу патоген вирус и ова е најдоброто што можеме да го постигнеме. Битката се уште трае, а за сега резултатот е таков што половина од мајмуните даваат позитивни резултати, а половина умираат – кажал тој. /Извор: BBC/