Седница на Уставен суд

Уставниот суд на Република Македонија денеска расправаше и одлучуваше за уставностa на одредби од три закони, за два подзаконски прописи и еден колективен договор.
Судот поведе постапка за член 213 в, став 3 од Законот за работните односи, со кој се предвидува враќање на пристапниците со кои се пристапува во членство на синдикатите по завршувањето на постапката за утврдување на репрезентативноста на синдикатот. Поведувањето е затоа што оваа одредба од став 3 беше во функција на став 2 од членот 213 в во кој се предвидува да се доставуваат и пристапници на членовите на сидикатот покрај список на членовите кои платиле чланарина. Во 2012 година членот 213 в, став 2 во делот пристапници на членовите е укинат, со што ставот 3 од тој член е без правен основ. Како таква одредба после укинувањето на ставот 3, Судот оцени дека не е во согласност со владеење на правото. Не е поведена постапка за член 213 в, став 2, алинеа 2 и за член 213 в, став 4 за кои одредби се однесуваат на постапката за утврдување на репрезентативност на синдикат и доказите кои се приложуваат во таа постапка. За овие одредби Судот не поведе постапка затоа што оцени дека таквите одредби се во функција на синдикалното организирање и дејствување определено во член 37 од Уставот на РМ.

Судот денеска расправаше за девет члена од Законот за високо образование, од кои за седум  не поведе постапка, додека за два члена ја отфри иницијативата. Седумте одредби каде не е поведена постапка беа оспорени од аспект на повреда на уставната гаранција за автономија на високото образование, односно автономија на Универзитет. Судот не поведе постапка затоа што законските одредби се во фунција на остварување на автономијата на универзитетот. Двата члена 87 А и 99 се отфрлени затоа што за тие одредби Судот веќе се прознел во февруари 2013 година.

Судот ја отфли инцијативата поднесена за оценување на уставноста на одредбите од Законот за социјална заштита член 2, став 1 и член 22, став 2 затоа што утврди дека во инцијативата не се изнесени причини поради кои се оспорува едната одредба од Законот и со оглед дека утврди покренување на прашање за неусогласеност на една одредба од Законот со друга одредба од Законот, а што не е во надлежност на Уставниот суд.

Судот денеска расправаше за две одлуки на Регулаторната комисија за енергетика во врска со цената на вршење на дејноста снабдување со топллинска енергија од „Балкан енерџи“ донесена во февруари 2013 година и друга одлука донесена во јули 2013 година. Судот ја отфрли иницијатаивата во однос на одлуката донесена во февруари 2013 година затоа што утврди дека тој акт престанал да важи со донесување на одлуката од јули 2013 година. За втората одлука не поведе постапка затоа што со неа се разработуваат одредбите од тарифниот систем за испорака на топлинска енергија.

За Колективниот договор на воздухопловната навигација МНАВ донесен во декември 2012 година Судот расправаше за уставност и законитост на 12 члена од тој договор. За три члена Судот поведе постапка, за седум не поведе постапка и за два ја отфрли иницијативата. Поведена е постака за член 7, со кој се предвидува пополнување на слободни работни места да се врши врз основа на интерен оглас иако според член 22 од Законот за работни односи пополнувањето на слободните работни места може да се врши само преку на јавен оглас. Судот поведе постапка и за член 46, став 5 каде утврди дека се предвидува со таа одредба, коефициентите за платите за различните звања да се дефинираат во анекс на колективниот договор кој е службена тајна иако според член 232 од Законот за работни односи колективните договопри се јавни и нивните делови неможат да бидат утврдени за тајни. Поведена е постапка за член 116, став 1 и 4 кој се однесува на тоа кои лица на репрезентативните и нерепрезентативните синдикати на МНАВ имаат право на заштита за нивните синдикални активноси каде се определува само двајца претставници од репрезентативните синдикати да имаат таква заштита и по еден претставник од нерепрезентативните синдикати. Судот поведе постапка затоа што утврди дека во членовите 199 и 200 од Законот за работни односи нема ограничување на бројот на претставниците на синдикатот кои имаат право на заштита за нивната синдикална активност ниту пак постои групирање на синдикатите на репрезентативен и репрезентативен.

Што предвидуваат одредбите за преодна влада на 100 дена пред избори

По лидерската средба што се одржа вчера кај претседателот Стево Пендаровски, учесниците најавија дека се договориле да се одржат предвремени парламентарни избори на 12 април идната година.

 Премиерот и лидер на СДСМ Зоран Заев по средбата изјави дека тие ќе бидат спроведени по т.н. „пржински модел" со преодна Влада која треба да почне да функционира 100 дена пред одржување на изборите, поради што тој ќе се повлече од премиерската функција на 3 јануари.

Законските измени кои отвораат ваква можност беа изгласани на 25 јули лани, два дена откако за нив беше постигната согласност на лидерска средба.

Со измените и дополнувањата на Законот за Влада се предвидува сто дена пред одржувањето на избори за пратеници, а по претходна оставка на премиерот, Собранието да избере нова, преодна Влада за спроведување на парламентарни избори, предводена од нов премиер, кој го номинира партијата со најголем број пратеници во Парламентот. Ќе бидат избрани и нови министри за внатрешни работи и за труд и социјална политика, како и тројца заменици министри.

Заради организирање на избори за пратеници Собранието на Република Македонија на предлог на претседателот на Владата, сто дена пред денот на одржувањето на избори за пратеници избира министер за внатрешни работи и министер за труд и социјална политика, на предлог на опозицијата со мандат кој трае до денот на објавувањето на конечните резултати од Државната изборна комисија за спроведените избори по што мандатот им престанува по сила на закон.

Министерот за внатрешни работи го предлага партијата во опозиција со најголем број пратеници во Собранието, по претходна консултација со двете политички партии со најголем број на пратеници во Собранието, а министерот за труд и социјална политика го предлага партијата во опозиција со најголем број пратеници.

Измените и дополнувањата ја регулираат и работата на министерот за внатрешни работи. Тој може да изврши најмногу 15 разрешувања или распоредувања, на пониско или повисоко место на носители на раководна позиција во министерството, во согласност закон. Министерот за внатрешни работи може да изврши и хоризонтални распоредувања на вработените кои се на негов предлог во бројката до 10 отсто од бројот на хоризонтални распоредувања.

Заради организација на избори за пратеници, Собранието на предлог на претседателот на Владата  именува дополнителен заменик на министерот во Министерството за внатрешни работи и во Министерството за труд и социјална политика, предложени од политичката партија на власт со најголем број на пратеници, а во Министерството за финансии, Министерството за земјоделство, шумарство и водостопанство и Министерството за информатичко општество и администрација, предложени од политичката партија во опозиција со најголем број пратеници во Собранието.

Мандатот на дополнителните заменици министри трае од денот на нивниот избор до денот на објавувањето на конечните резултати од Државната изборна комисија за спроведените избори за пратеници во Собранието, по што мандатот им престанува по сила на закон. Тие заедно со министрите заедно и рамноправно со министерот учествуваат во остварувањето на надлежностите предвидени во Законот за организација и работа на органите на државната управа.

Првпат ваков модел на преодна Влада беше спроведен на предвремените парламентарни избори во 2016 година, за што тогаш беа донесени и законски измени и тој модел на влада беше наречен „пржински" бидејќи беше договорен во текот на пржинските преговори по политичката криза која настана по објавување на т.н. бомби со прислушувани разговори./МИА.

Грчки медиуми ја анализираат поврзаноста на предвремените избори со Договорот од Преспа

Предвремените парламентарни избори кај нас, грчките медиуми, директно ги поврзуваат со иднината на Договорот од Преспа и пренесуваат „загриженост на Атина, за случувањата во Скопје".

„Избори во С. Македонија: „Сите сценарија за следниот ден",„Облаци над Договорот од Преспа", „Предвремени избори во Скопје: што важи за Договорот од Преспа и грчката загриженост", „С.Македонија: Што ќе се случи со Договорот од Преспа?", „С. Македонија во предизборна треска", „Во опасност Договорот од Преспа по ветото од на Макрон и ставот на ЕУ", „Северна Македонија: На 12 април предвремени избори", се дел од насловите во грчките медиуми за последните случувања кај нас, а новинарите во Грција известуваат за синоќешната лидерска средба и објавениот датум за предвремени парламентарни избори, со акцентот ставен на сценаријата за иднината на Договорот од Преспа, jави дописничката на МИА од Атина.

Иако грчката влада официјално не зазема позиција и не ги коментира внатрешно политичките случувања во соседната земја, како што изјави и самиот Мицотакис на прес конференцијата во Брисел во петокот, кога рече дека тоа е внатрешно прашање, сепак новинарите во Грција анализираат дека кај Атина постои загриженост за разврската кај нас и пишуваат за тоа какво влијание врз земјата би имале предвремените избори во Северна Македонија.

Мнозинството од коментарите на новинарите во Грција се поврзани со сценариото на власт да дојде ВМРО-ДПМНЕ и ставот што партијата го има во однос на Договорот од Преспа.

– Високи европски извори, но и кругови од грчката влада оценуваат дека доколку ВМРО победи на изборите, нема да го поништи Договорот од Преспа, но многу ќе го отежне неговото спроведување и точките на несогласување со Атина ќе се интензивираат. Уште повеќе, ако новата влада се чини дека нема да продолжи со клучните точки од договорот кои беа под преговори, како што се учебници и трговските ознаки. Јасно е дека до изборите на 12 април нема да има простор за преговори со владата на Северна Македонија – која од почетокот на годината ќе биде техничка- додека пак Договорот од Преспа ќе биде вклучен во конфронтациите во предизборната кампања на соседната земја, пишува информативниот портал „Њуз247".

– Во случај националистичкото ВМРО-ДПМНЕ и лидерот Христијан Мицкоски да ги добијат изборите, веројатно е да имаме пресврти во Договорот од Преспа. Иако не може да се поништи, сепак може да се доведе во прашање. Атина внимателно, но не и во паника ги следи случувањата. Не посакува враќање на националистичката реторика што би ја одбележало победата на ВМРО. Покрај тоа, потенцијалните проблеми на внатрешна кохезија во соседната земја се непожелни, пишува „Прото тема".

Анализирајќи ги можните последици за Атина, онлајн изданието на весникот „То вима", пишува дека се очекува да се отвори голема дискусија во Грција, меѓу владата и опозициската СИРИЗА во однос на Договорот од Преспа, но и дека грчката влада ја загрижува „опасноста од преземањето на власта од националистичкото ВМРО".

– Веројатноста да има политичка промена во С. Македонија ќе предизвика пресврт во Договорот од Преспа. Иако договорот не може да биде поништен, како што истакнуваат аналитичарите, сепак може да биде доведен во прашање од една, на пример, националистичка влада. Аналитичарите посочуваат дека во таков случај, аспектите на Договорот од Преспа што Грција се стреми да се спроведат, ќе останат неактивни или никогаш нема да се спроведат од една националистичката влада во Скопје, пишува онлајн изданието на весникот „То вима".

– Грција , како што е и логично, внимателно ги следи внатрешните случувања. Од нејзина страна, грчката влада не би сакала на изборите во април во С. Македонија да победи ВМРО-ДПМНЕ, бидејќи во таков случај тоа би имало национална реторика во соседната земја. Од друга страна, дури и при можна победа на ВМРО-ДПМНЕ, Договорот од Преспа не може да се поништи, можеби би постоеле мали пресврти, пишува информативниот портал „Ајефимерида".

Грчките новинари коментираат дека ветото на Франција на минатонеделниот Самит на ЕУ и неможноста да се постигне договор за почеток на пристапни преговори за С. Македонија се причините за предвремените парламентарни избори.

Во однос на синоќешната лидерска средба, медиумите во Грција ги пренесуваат и вчерашните изјави како на претседателот Стево Пендаровски, така и на премиерот Зоран Заев, пишуваат дека постоело консензус и за европскиот пат на  Македонија и договор изборите да се одржат на 12 април следната година. Паралелно објаснуваат и информираат дека на 100 дена пред изборите, односно на 3 јануари 2020 ќе биде формирана техничка влада.

Унијата на млади сили на ВМРО-ДПМНЕ синоќа славеа на улиците

Унијата на млади сили на ВМРО-ДПМНЕ синоќа објави неколку видео снимки на кои се гледа како симпатизери на партијата го прославуваат како што велат падот на Зоран Заев.

Победнички Прилеп тргна! Дојде време, дојде час за голема победа! Победа на ВМРО-ДПМНЕ! Победа за Македонија.

притисни ентер