Пет студенти од областа на ИКТ на студиски престој во компанијата Хуавеи

Пет најдобри македонски студенти во областа на информатичките технологии и телекомуникации идниот месец ќе бидат две недели на студиски престој во кинеската ИКТ-компанија Хуавеи во рамки на програмата „Семиња за иднината“ (Seeds for the Future).

Борјана Арсова од Штипскиот универзитет, Младен Коруновски од ФИНКИ на УКИМ, Јован Петковски од Охридскиот универзитет, Теодора Поп Орданова од ФЕИТ на УКИМ и Доника Туши од Универзитетот на ЈИЕ денеска ги добија ваучерите за студиската посета која предвидува практична работа во Пекинг и Шенџен.

Менаџерот на Хуавеи во Македонија Жоу Џијадонг истакна дека програмата „Семиња за иднината“  ги поттикнува земјите од различни региони да учествуваат во градењето на дигиталното општество.

- Оваа програма овозможи Хуавеи да соработува со Владата на Република Македонија со цел да го сподели своето ИКТ искуство и иновативни технологии. Хуавеи, исто така, го олесни трансферот на знаење и помогна на локалната власт да развие високоефикасен образовен систем. Македонската Влада преку Министерството за информатичко општество и администрација изрази подготвеност да ја поддржи нашата програма и пет најдобри студенти од пет различни факултети кои студираат ИКТ-технологии ќе имаат привилегија да патуваат во Кина, рече Џијадонг.
Програмата „Семиња за иднината“ се реализира вторпат во Македонија. Петте студенти ќе имаат можност да присуствуваат на демонстрација на најновата ИКТ-технологија, да учествуваат во работилници каде што ќе се сретнат со претставници и експерти од Хуавеи. Исто така, ќе посетуваат и часови по кинески јазик, кинеско сликање и калиграфија.

Амбасадорката  на Кина во Македонија Јин Лисиен им посака на студентите убав престој и резултати во учењето на напредната технологија и во запознавањето на традиционалната кинеска култура.
Истакна дека соработката меѓу Кина и Македонија е цврсто развиена во многу области, вклучително и информатичката и телекомуникациската технологија, како и во образованието.
- Глобалниот ИКТ-лидер, компанијата Хуавеи, има воспоставено партнерство со македонските телекомуникациски оператори. Хуавеи исто така е вградена во македонскиот образовен систем со кинеска официјална помош  во опрема за настава, вредна седум милиони евра за 27 училишта во Скопје,  рече  Лисиен.

Изборот на учесниците во програмата „Семиња за иднината“ им го честиташе министерот за информатичко општество и администрација Дамјан Манчевски, кој им порача дека за двете недели практична настава во Кина ќе научат многу повеќе за некои работи отколку неколку години на факултет затоа што, рече тој, практичната работа и искуство им недостига на нашите студенти.
- Ваков тип на соработки меѓу јавниот сектор, Владата и приватните компании е она што сметаме дека во иднина може да ги мотивира младите луѓе повеќе да се запишуваат на ИКТ-факултетите, но и во понатамошните други форми на соработка да ги мотивираме да останат и да работат овде. Ова е само почеток. Владата има намера да пристапи до бизнис-секторот, до индустријата и во следниот период да се обидеме на заеднички начин да отвораме нови работни места, особено во ИКТ индустријата, рече Манчевски. Додаде дека ќе се обидат да ги мотивираат младите да се запишуваат на ИКТ студии и да останат да работат во Македонија, а една од формите кон таа цел е Младинската гаранција која ќе почне да се спроведува оваа есен. 

Салвини: За жал Ромите не можеме да ги протераме

Италијанската влада планира да спроведе попис на Ромите кои живеат во таа земја за да се утврди колкав број од нив тука престојуваат илегално, изјави министерот за внатрешни работи.

Меѓутоа, Матео Салвини додал и дека “за жал, италијанските Роми нема да може да ги протера“.

Салвини, лидерот на крајно десничарската „Лига“, за телевизијата „Ломбардија“ изјавил дека неговото министерство го разгледува “ромското прашање“ и сака да види “колку“ Роми има во Италија.

Изјавата на Салвини, предизвикала критика кај Демократската партија која изјавила дека неговиот повик потсетува на “етничко чистење“, пренесува „Ројтерс“.

Тој потоа реагирал со соопштение во кое изјавил дека владата нема намера да прави посебна архива за Ромите или да зема отпечатоци од прсти, туку сака да ги заштити ромските деца, чии родители им забрануваат да одат во локалните училишта.

Додал дека сака да провери како се трошат средствата на Европската унија наменети за помош на маргинализираните заедници.

Салвини минатата недела предизвика “бура“ во Европа кога одби да дозволи хуманитарни бродови со повеќе од 600 африкански мигранти да влезат во италијанските пристаништа.

Поповски: Лажните вести носат пораки на национализам, поделба и раздор

 Лажните вести речиси секогаш носат пораки на национализам, поделба, раздор, конфликт и омраза. 

Проблемот со лажните вести е сериозен и треба посветено да работиме на справување со овој предизвик, порача денеска од Велес министерот без ресор, задолжен за комуникации, транспарентност и отчетност Роберт Поповски.

- Видовме, не само деновиве, туку и низ годините наназад, колку штетна може да биде пропагандата, дека тие лажни зборови честопати поттикнуваат вистинско и брутално насилство и агресивно однесување, истакна Поповски на форумот посветен на справувањето со дезинформации.

Тој оцени дека завчера, за време на насилните протести во Скопје, но и во континуитет на социјалните мрежи, се шират лажни и вознемирувачки вести вклучувајќи наводни жртви на полициска бруталност, за кои се користат стари фотографии од личности од светот, лажни текстови и постови. 

Говорејќи за поставеноста на Владата за справување со овие предизвици на дигиталното дезинформирање, Поповски го истакна повикот на Владата за конструктивна атмосфера и отворена дебата со граѓаните за секое отворено прашање, без страв, заплашување и притисоци да градат сопствени ставови за секое отворено прашање, посебно акцентирајќи го претстојниот референдум за Договорот со Република Грција.

Според министерот за информатичко општество и администрација Дамјан Манчевски, лажните вести имаат за цел намерно извртување и манипулирање на јавноста. Тој потсети дека измените во законот за аудио и аудиовизуелни медиумски услуги гарантираат услови за професионализација на медиумите и даваат шанса политичарите да ги тргнат рацете од медиумите. 

- Клучот е во новинарска фела, да се саморегулира и се држи до етичките и морални стандарди. Владите и сите политички субјекти мораат да се држат до овие стандарди, нагласи Манчевски.

Директорот на Канцеларијата на УСАИД за општ развој Едвард Гонзалес смета дека граѓаните треба да развијат практика на следење на вести од различни извори и да бидат критични кон информациите кои ги конзумираат, а од друга страна Владата да промовира транспаретност и отчетност.

Муслиу: ВМРО-ДПМНЕ треба да учествува во работата на Собранието

Политичкиот аналитичар Алберт Муслиу смета дека опозициската ВМРО-ДПМНЕ мора да најде начин да учествува во работата на Собранието кога се расправа за ова важно прашање.

За него тоа што Европската унија, НАТО и Обединетите нации цврсто застанаа зад овој договор е гаранција дека од процесот нема да се отстапи.

Целиот разговор со политичкиот аналитичар Алберт Муслиу погледнете го во видеото.

притисни ентер