Горат куќите во Драмче и Селник – пожарот избувнал од фурна за леб

Аматерските снимки од мобилен телефон ја покажаа големината на уништувачката моќ на големиот пожар што избувна синоќа во Малешевијата.
 Огнените јазици, помогнати од ветрот, безмилосно ги голтаат куките од Драмче и Селник, планински села од разбиен тип. А, се започнало од фурна за леб од Стамболиското маало во Драмче. Куката во која била фурната е лоцирана на помалку од педесетина метри од густиот  појас од борова шума. Над сто лица, меѓу кои пожарникари од Берово, Делчево и Пехчево во содејство со припадници од ЈП Македонски шуми, Граничната полиција и месното население, вложуваат крајни напори огнената стихија, да ја стават под контрола.

- Голем пламен е и голем пожар. Поради тешко пристапниот терен многу тешко е да се стави под контрола. Но, ние сме тука и ќе бидеме тука се додека не го изгаснеме пожарот , изјави еден од мештаните.

-Голема е површината од борова шума, што ја опфати пожарот. Теренот е непристапен за било каква механизација да се стави во погон, затоа мораме вака рачно, дополни Лоренцо Трајановски – пожарникар.

Околу 200 хектари борова шума е во пламени јазици, информираат од Центарот за управување со кризи.  Еден дел од огнената линија е спречена да се шири кон  границата со соседна Бугарија, а спасена е и црквата „Св Петка“, значаен културно-верски споменик од 14 век. Пожарот досега пеплоса десетина куќи и објекти во неколку маала од спомнатите планински села Драмче и Селник. Последната информација од надлежните е, пожарот е локализиран. Инаку, синоќа дејствувале и авионите канадери од Дирекцијата за заштита и спасување.

Пред Собранието изутринава мирно, сообрачајот нормализирана

Пред Собранието на Македонија изутринава е мирно по синоќешните насилни протести во кои се повредени седум полицајци и приведени 25 демонстранти. 

Барикадите се остранети, а сообраќајот по улиците околу собраниската зграда се одвива нормално. Забележливо е помало полициско присуство.  

МВР по синоќешните настани соопшти дека дел од демонстрантите на вчерашниот јавен протест во Скопје, употребија распрскувачки средства и насилно ја турнаа заштитната ограда, истовремено обидувајќи се насилно да влезат во Собранието. Со цел да се спречи ескалирање на ситуацијата и насилен упад во Собранието, а постапувајќи согласно процедурите, полицијата уопотреби солзавец, информира МВР.

Министерството за внатрешни работи потенцира дека го почитува правото на мирен протест, но нема да дозволи употреба на сила и насилен упад, како и нарушување на јавниот ред и мир. Министерството апелира на демократски начин на изразување на јавното мислење.

Повеќе информации од МВР за вчерашните случувањата пред законодавниот дом во центарот на Скопје ќе бидат соопштени во текот на денов.  

Протестите беа против Договорот за решавање на македонско-грчкиот спор за името и стратегиско партнерство потпишан вчера во Псарадес.

Нова демократија: Тажен и срамен ден за Грција

Тажен и срамен ден за Грција, бил вчерашниот според Нова демократија и поради инцидентите во близина на Преспа и поради потпишаниот договор.

Од грчката опозициска партија коментираат дека Ципрас и Каменос вчера ја отстапија можноста „граѓаните на ПЈРМ да се нарекуваат Македонци и да говорат македонски јазик“, јави дописничката на МИА од Атина.

- Во исто време додека Ципрас и Коѕијас славеа во Преспа за еден договор што им штети на националните интереси, на полицијата и беше дадена наредба да покаже, до сега невидена, бруталност, испраќајќи ги дури и во болница граѓаните кои ја покажаа нивната патриотска чувствителност. Не е само тажен ден за Грција, туку е и ден на срам за Ципрас и Каменос, бидејќи заедно, на граѓаните на ПЈРМ им ја отстапија можноста да се самонарекуваат „Македонци“ и да поддржуваат дека говорат наводен македонски јазик, соопштуваат од опозициската партија и додаваат дека „македонски јазик и македонска националност не прифатила ниту една претходна грчка влада“.

Од Нова демократија коментираат дека грчкиот народ со право бил бесен, бидејќи сфатил дека коалиционата грчка влада за да се задржи на власт „веќе не води сметка за националните интереси“. Паралелно ги повикаа граѓаните да покажат смиреност и воздржаност. 

Автобус влета во публика на фестивалот Пинк поп во Лимберг

Едно лице загина, а три се повредени кога автобус влета во публиката на фестивалот Пинк поп во Лимберг, на југот од Холандија.

Инцидентот се случил неколку часа по настапот на американскиот пејач Бруно Марс, кој го затвори фестивалот, пренесе Ројтерс.

Полицијата соопшти дека возачот на автобусот побегнал од местото на настанот и по него е распишана потерница, а улиците околу местото на одржување на фестивалот се затворени.

притисни ентер