Димитров на состанок на Постојаниот совет на ОБСЕ

Македонија е силно решена да ја искористи новата шанса за конечно етаблирање на држвата во семејството на развиените демократски општества, истакна министерот за надворешни работи Никола Димитров во денешното обраќање пред Постојаните претставници на земјите учеснички во ОБСЕ .
Како што соопшти МНР, во рамките на своето обраќање Димитров го претстави оптимизмот, кој завладеа во македонското општество после долгата криза, но и зголемените очекувања на граѓаните како од новата Влада, така и од меѓународната заедница во насока на долгоочекуваната реализација на аспирациите за европска и евро-атлантска интеграција.

Притоа, се додава, министерот ја претстави реформската агенда содржана во Планот на Владата 3-6-9, нагласувајќи дека преточувањата на амбициозните планови нема да претставува лесен чекор, бидејќи ниту една голема и суштински позитивна амбиција не е лесна. Се осврна на областите опфатени со реформите во пединечни области како: владеење на правото, изборен систем, силни, професионални институции, развој на здрави механизми на контрола, особено независно судство и слобода на медиуми.

Исто така, се додава, шефот на дипломатијата даде приказ и на новата визија при негување на односите со соседите и потребата од развивање на пријателства и меѓусебно разбирање.

- Обраќањето предизвика забележителен интерес, како од аспект на суштината, така и од аспект на непосредниот и искрен пристап, а воедно и беше поздравено од повеќе делегации, при што главните пораки беа со позитивен и охрабрувачки призвук. Дискусиите околу реформските амбиции на домашен план и надворешните аспирации на Македонија продолжија и за време на работниот ручек со група на амбасадори на земји учеснички во ОБСЕ и други меѓународни претставници, организиран во чест на министерот од страна на австриското претседателство со Организацијата, стои во соопштението од МНР.

Министерот Никола Димитров, се наведува, за време на работната посета на ОБСЕ, оставри и средба со генералниот секретар на Организацијата, Томас Гремингер, кусо видување со Специјалниот претставник на ОБСЕ за слобода на медиумите Харлем Дезир, при што беа разменети мислења за идни активности и меѓусебната соработка и поддршка за реформските заложби на Владата.

Во рамки на работниот престој на Виена, министерот се сретна и со генералниот секретар во МНР на Република Австрија, Михаел Линхарт со кого разговарале за повеќе прашања од интерес на двете земји. Димитров, се посочува, изразил благодарност за досегашната поддршка од Австрија за европските аспирации на земјата и изразил надеж дека таа ќе продолжи и во иднина, за што било изразено силно уверување од австриска страна, за која, проширувањето на ЕУ ќе биде високо на агендата во рамки на нивното претседавање, стои во сооштението./МИА

Совети од РСБСП за безбедно ноќно возење

Возењето во ноќни услови носи многу предизвици, потенцијални закани и опасности од аспект на безбедно одвивање на сообраќајот.

Возењето во ноќни услови носи многу предизвици, потенцијални закани и опасности од аспект на безбедно одвивање на сообраќајот и токму затоа Републичкиот совет за безбедност на сообраќајот на патиштата (РСБСП) советува за полесно справување со предизвиците од ноќното возење.

- Најголем предизвик кај ноќното возење е слабата видливост на патот и околината. Една студија во САД покажува дека од една третина до една половина од сите возила имаат слабо или погрешно насочени фарови и светла. Затоа, доколку патувате во ноќни услови, задолжително проверете дали светлата и фаровите работат со максимална ефикасност, велат од РСБСП.

За подобра видливост, помало напрегање и помал замор при возењето во ноќни услови, светлата, фаровите, ретровизорот, ветробранските стакла и страничните стакла, секогаш треба да бидат максимално чисти.

Од РСБСП посочуваат возачите со сериозни проблеми со видот најдобро е да не учествуваат во сообраќајот, особено во ноќни услови и во услови на дожд кога видливоста е значително загрозена.

- Според англиските оптичари околу 90 отсто од реакцијата на возачот зависи од видот. Затоа, секогаш кога возите, а особено кога возите во ноќни услови, доколку имате проблем со видот, задолжително користете ги оптичките помагала, велат од РСБСП.

Оттаму посочуваат дека возачите доколку имаат проблеми со видот и доколку користат оптички помагала, пред да започнат со патувањето, да почекаат неколку минути во автомобилот очите да се прилагодат на темнината.

Според англиската асоцијација на оптичари, прилагодувањето на темнината значително ќе ја подобри способноста за гледање во мракот.

- Возачите кои имаат проблеми со видот, во услови на ден и силно сонце, пожелно е редовно да користат очила за сонце и на тој начин полесно ќе се прилагодат за возење во услови на темнина, посочуваат од РСБСП.

Оттаму додаваат дека и намалувањето или елиминирањето на пушењето е особено важно затоа што чадот од пушењето ја намалува визуелната способност на возачот.

- Согласно ЗБСП користењето на светла во Република Македонија е задолжително и дење и ноќе и таа обврска треба секогаш да се почитува. Доколку некогаш ги немате вклучено светлата и се прашувате дали е доволно темнина да ги вклучите светлата, тоа значи дека првите симптоми за намелена видливост се веќе присутни и треба веднаш да ги вклучите светлата, истакнуваат од РСБСП.

За поглема безбедност секој возач, секогаш треба да внимава на дозволената брзина, но во услови на ноќ, брзото возење повеќекратно го зголемува ризикот од предизвикување сообраќајна незгода.

- Користете ги долгите светла, но истовремено бидете внимателни и не ги заслепувајте возачите кои доаѓаат од спротивен правец. Исто така, создавајте си навика да не гледате директно во светлата на возилата што доаѓаат од спротивната страна или во светлата што се наоѓаат во околината. Гледањето директно во изворот на светлината ја намалува визуелната способност на возачот и ги изморува очите.  Внимавајте на рефлексиите и на индиректните извори на светлина како издувните гасови на возилата пред вас, очите на животните, вировите вода на коловозот итн. Голема е можноста погрешно да ве наведат и да донесете погрешна одлука како возач, велат од РСБСП.

Возењето во ноќни услови, најчесто е спротивно на биоритамот на организмот и предизвикува замор и поспаност кај возачот, особено во периодот од 02:00 до 07:00 часот наутро. Затоа, доколку возите ноќе, правете почести паузи за одмор, вежби, краток сон.

Од РСБСП советуваат до возачите за полесно да се справат со заморот, да консумираат повеќе течности, да разговараат со сопатниците, да пропуштаат свеж воздух во возилото и да дишете длабоко.

Посебно апелираат при возење во ноќни услови да се внимава на животните на патот, бидејќи тие се активни во тој период од денот и ризикот за нивна појава е поголем. /МИА

СДСМ: ВМРО-ДПМНЕ останува во матрицата на поделби и изолација

ВМРО-ДПМНЕ добро знае дека договорот ја носи Македонија напред, но нив ги интересира само личен интерес и амнестија и затоа се трудат да ја лажат јавноста. 

Постигнатиот Договор за 25 годишниот спор со Грција го гарантира македонскиот идентитет, македонскиот јазик и македонската посебност.

Договорот ја обезбедува македонската иднина, иднината како дел од ЕУ и НАТО. Тие две прашања се и тоа како меѓусебно поврани. Ако не беше така, тогаш зошто ВМРО-ДПМНЕ со години преговараше за изнаоѓање решение за 25 годишниот спор?

Очигледно е дека ВМРО-ДПМНЕ не може да излезе од матрицата на поделби, изолација и конфликти и затоа на секаков начин се обидува да ја закочи македонската иднина.

Владата предводена од СДСМ има обврска пред граѓаните да ја обезбеди иднината. Никој нема да да им го ускрати правото на граѓаните на реферндум, слободно да одлучат за сопствената иднина.

Македонија оди напред и нема да биде заложник на криминалите на ВМРО-ДПМНЕ. Граѓаните на референдум ќе кажат ДА за влез во ЕУ и НАТО, ќе кажат ДА за македонската иднина. /МИА

Нејмар: Останувам во ПСЖ, секој знае зошто сум во Париз

Еден од најдобрите играчи во светот, Нејмар да Силва ја отфрли можноста да го напушти ПСЖ ова лето, истакнувајќи дека тој е среќен во Париз.

Нејмар одамна е поврзуван со Реал Мадрид, особено по преминувањето на Кристијано Роналдо во Јувентус, но тој не сака да го напушти Париз.

- Останувам во Париз, имам договор. Приказните околу моето заминување доаѓаат од медиумите. Сите ја знаат мојата цел и зошто отидов во Париз Сен Жермен. Сакам да остварам успеси со овој клуб и се надевам дека следната сезона ќе биде уште поуспешна, изјави Нејмар за бразилски „Фокс“.

Неј Џуниор стана најскапиот фудбалер во светот минатата година, откако се пресели од Барселона во Париз Сен Жермен за рекордни 222 милиони евра.

Нејмар со парижаните го освои француското првенство и Купот, а во Лигата на шампионите беше елиминиран во осминафиналето на Реал Мадрид, но тогаш не играше поради повреда.

Со бразилскиот национален тим, учествуваше на Мундијалот во Русија, но неговиот пат заврши во четвртфиналето по поразот од Белгија (2:1).

Минатата сезона, тој играше 30 натпревари и постигна 28 голови, додека за бразилскиот тим веќе има 90 настапи и 57 постигнати погодоци. /МИА

притисни ентер