НБРМ објави конкурс за изработка на едукативна игра

Народната банка на Република Македонија објави конкурс за изработка на едукативна игра (веб/мобилна апликација), наменета првенствено со младата популација, со цел поттикнување поголем интерес за знаења од областа на економијата и финансиите.
- Преку играта младите ќе имаат можност да се забавуваат, да создадат поголем интерес за областа на економијата и финансиите и да го збогатат сопственото знаење. Едукативната игра треба да биде создадена согласно со возраста на целната група, односно ликовите, цртежите, содржината, јазикот и сл. да бидат приспособени на: група I (деца од 6 до 12 години), група II (млади од 13 до 18 години) и група III (возрасно население 18+), соопшти НБРМ.

Во рок од еден месец треба да се изработи идејно решение, по што во наредните три месеци ќе се изготви едукативна игра, врз основа на прифатеното решение.
Право за учество на Конкурсот имаат државјани на Република Македонија на возраст до 35 години, со исклучок на вработени во НБРМ.

Еден учесник има право да достави повеќе едукативни игри со различни идејни решенија во поглед на изработката, темата, платформата и др., но може да биде награден само со една награда.

На избраните автори ќе им се додели награда од 50.000 денари  за прво место 50.000, 25.000 денари за второ место и 15.000 денари за трето место.

Пријавите од авторите, со нивните лични податоци и контакт, треба да бидат доставени електронски на ЦД или УСБ преку архивата на Народната банка со назнака: „за Конкурс за избор на најдобра едукативна игра“.

Краен рок за доставување на едукативните игри е 13-ти следниот месец.

Иванов: Наша должност е да го негуваме наследството на светите Кирил и Методиј

Претседателот Ѓорге Иванов присуствуваше на отворањето на изложбата „По трагите на светите Кирил и Методиј“ на словачкиот автор Павол Демеш, а во организација на Амбасадата на Република Словачка.

Правото на сопствен јазик, на образование, на самоидентификација и денес се основни универзални и европски човечки вредности. Јас денес го говорам македонскиот јазик, исто како што нашите словачки пријатели го говорат словачкиот јазик, благодарение на светите Кирил и Методиј, истакна претседателот на Република Македонија Ѓорге Иванов на отворањето на изложбата „По трагите на светите Кирил и Методиј“ на словачкиот автор Павол Демеш, а во организација на Амбасадата на Република Словачка.

- Битката на светите Кирил и Методиј беше да им се овозможи на словенските народи сами да го спознаваат Божјото слово, сами да ја создаваат и пренесуваат својата култура, традиција, сами да ја пишуваат својата историја, порача во обраќањето претседателот Иванов.

Духовното стебло на светите Кирил и Методиј, додаде македонскиот претседател,  е богатството на Европа кое денес го именуваме како единство во различноста.

- Без тоа словенско стебло денес ќе имавме една интелектуално и духовно посиромашна Европа. Затоа, должност на нашата генерација е да го негуваме и афирмираме тоа наследство, благодарение на кое ние денес имаме наш светоглед, наша посебност и идентитет, рече во обраќањето претседателот Иванов.

Изложбата е по повод 1155-годишнината од доаѓањето на солунските браќа на територијата на Велика Моравија, предците на Словаците и Чесите, и 25-годишнината од осамостојувањето на Република Словачка. Изложбата претставува фотографска биографија на солунските браќа, заштитниците на Европа, на која авторот работел три години.

Станува збор за избор фотографии, којшто треба да покаже кои биле Кирил и Методиј, и воедно, зошто се толку важни за словенските народи. Изложбата опфаќа и споменици од најразлични земји, зачувани од времето на светите Кирил и Методиј или кои им се посветени ним.

Павол Демеш е експерт за надворешна политика и граѓанско општество. Живее во Братислава. Активно фотографира, а неговите фотографии повеќе пати беа изложени и презентирани во Словачка, како и во странство./МИА

Стоилковски:Пресудата на Поповски, реализација на партиско политички нарачки и неправда

Ова што го видовме денеска не е суд и правда, туку реализација на партиско политички нарачки и неправда.

 Невини луѓе кои ниту оствариле каква било имотна корист и не предизвикале никаква штета се осудуваат со драконски казни, а Зоран Заев кого целата јавност го виде како бара поткуп се ослободува од каква било одговорност.

Без ниту еден доказ, без никаква надлежност, судот прифати обвинение покренато од партискиот орган СЈО и судијата Добрила Кацарска денеска изрече осудителна пресуда и казна затвор во времетраење од девет години.

Вакви процеси, какви што води судот под притисок на криминалниот картел на власта се водат само во Северна Кореа, а можеби ни таму. Вакви пресуди врз вакви докази не изрекувале ниту црвените кмери во Камбоџа.  Правосудството денеска го допре дното.

Ниту некој прибавил против-правна имотна корист, ниту е направена материјална штета. Набавените возила се уште се користат во Министерството за внатрешни работи. Постапката за набавка на 300 автомобили е спроведена согласно закон и потребите на полицијата. Постапката е завршена со јавно отворање на понудите, по што е донесен извештај со предлог за избор за најповолен понудувач. Одлуката за избор ја донела комисијата за јавни набавки, која е составена од искусни професионалци и специјалисти за јавни набавки, кои ја сугерирале и примениле одредбата од неговата одлука за јавна набавка која се однесува на деливоста на набавката внатре во лотовите. Сведочењата на  членовите на комисијата за јавни набавки се во прилог на одбраната. Сите сведоци кажаа дека постапиле согласно закон и согласно интересите и потребите на службата, без никој да им се меша во одлучувањето.

Одлуката со која СЈО ја темели својата надлежност врз предметот е невалидна.  Имено  предметот  СЈО го заснова врз само еден приватен телефонски разговор. Впрочем и самото СЈО тврди дека економските оператори чија понуда била избрана на тендерот не оствариле екстра профит, односно им била исплатена реалната вредност на возилата.

Почитувани,

СЈО нема ниту еден издржан аргумент. Пресудата, особено нејзината висина е одраз на политички притисок од страна на картелот на власт. Зоран Заев лично го најави овој прогон и во негова изјава пред неколку дена ги најави првите пресуди. Ова е крах за македонското судство и понижување за целата правна фела. Денеска судството го погреба правото и правната држава. Република Македонија станува држава во која има политички осуденици, а лица како Заев кои целата јавност ги виде како бараат едно евро за црквата и едно евро за Вицето се шетаат слободно.

На ваквото однесување мора брзо да му дојде крајот.

Наум Стоилковски, портпарол ВМРО-ДПМНЕ

Индустријата најмногу користи изворска вода, а ја испушта во јавна канализација

 Од испуштените отпадни води од индустријата скоро целата количина или 92 проценти оди во јавна канализација, пет проценти во земјата и три проценти во акумулации, објави Државниот завод за статистика.

Според објавените податоци од вкупно испуштените води, пречистени се 0,34 проценти.

Вкупното количество користена вода во 2016 година изнесува 3.699 милиони метри кубни.

Според потеклото на водата за снабдување на претпријатијата, најголемото количество е од изворски води 71,86  отсто.

Вкупното количество зафатена вода од индустриските претпријатија во 2016 година изнесува вкупно 3.709 милиони меетри кубни, при што секторот Снабдување со електрична енергија, гас, пареа и климатизација има најголемо учество од 98,96 отсто.

притисни ентер