Белград очекува 18 милиони евра приход од Ф4

 Завршниот „Фајнал фор“ турнир од кошаркарската Евролига што претстојниот викенд ќе се игра во Белград ќе донесе приход од 18 милиони евра за српската метропола, смета градскиот менаџер Горан Весиќ.

- Ф4 е најголем кошаркарски настан на светот оваа година ако не ја сметаме НБА лигата. Ова ќе биде една од најголемите спортски манифестации годинава по Светското првенство во Русија. Ќе биде пренесуван во повеќе од 200 земји. Стотици милиони луѓе ќе имаат можност да видат промотивни спотови за Белград. Тоа е добро за развојот на туризмот, но и за инвестициите, објаснува Весиќ.

Според него, 15.000 туристи кои ги очекува од Турција, Шпанија, Русија и Литванија ќе остварат вкупно 60.000 ноќевања и ако тоа се помножи со 300 евра се доаѓа до приход од 18 милиони евра.

- Толку ќе заработат градот Белград, но и кафулињата, шопинг центрите, туристичките водичи,....

Од утре до недела во Белград за титулата европски шампион ќе се борат Фенербахче (Турција), ЦСКА Москва (Русија), Реал Мадрид (Шпанија) и Жалгирис (Литванија). 

Давид Силва се повлече од шпанската репрезентација

Фудбалерот Давид Силва соопшти дека се повлекува од шпанската репрезентација.

Силва во дресот на Шпанија одигра 125 натпревари, а дебитираше во 2006 година и по 12 години ја завршува репрезентативната кариера.

- Размислував долго и не беше лесно да се донесе оваа одлука. Националниот тим ми даде многу и ми помогна да созреам како фудбалер и како личност, истакна 32-годишниот фудбалер.

Фудбалерот на Манчестер сити беше дел од славната генерација на шпанската репрезентација, која ги освои Европските првенства во 2008 и 2012 година, како и Светското првенство во 2010 година.

Во саботата и Жерард Пике соопшти дека се повлекува од шпанската фудбалска репрезентација.

Маса: Алонсо секогаш создава раздор во тимот

Поранешниот возач на Формула 1, Фелипе Маса, изјави дека почувствувал олеснување кога Фернандо Алонсо го напуштил Ферари, клуб во кој двајцата заедно се натпреваруваа четири години.   

Неодамна и шефот на Ред Бул, Кристијан Хорнер, со сличен став ја отфрли можноста Алонсо да ја пополни празнината по заминувањето на Даниел Рикардо во Рено. Хорнер нагласи дека не сака да соработува со него, бидејќи не сака „да внесе хаос во тимот“.

Иако тогаш тоа беше сфатено со резерва, меѓутоа гласините за Алонсо ги потврди и неговиот колега Маса, кој четири години со него ја делеше гаражата.

- Со Алонсо секогаш нештата се на граница на кавга. Никогаш не сме имале проблеми приватно, но кога ќе седне зад воланот станува друга личност, која создава раздор во екипата. Mожете да забележите во сите тимови каде настапувал имало кавги, истакна Маса.   

Алонсо има 36 години и се уште нема договор за следната сезона, но според шпанските медиуми поранешниот шампион најверојатно ќе остане во тимот на Мекларен

Македонија ја совлада Данска на ЕП за кошаркари до 16 години

Кадетската репрезентација на Македонија убедливо ја совлада Данска со 99:89 на Европското првенство (дивизија Б) за кошаркари до 16 години што се одржува во Сараево.

Данска одлично го започна натпреварот, а во првата четвртина водеше и со осум поени разлика. Но, македонските кошаркари во втората четвртина успеаја да се консолидираат и да се вратат во игра.

Во третиот и четвртиот период избраниците на Александар Јованчев го диктираа темпото на игра и направија целосен резултатски пресврт.

Марко Миловановиќ со 30 поени, седум скока и четири асистенции беше најефикасен во македонската репрезентација, а Андреј Андоновски постигна 22 поени.

Македонија утре ќе се соочи со репрезентацијата на Норвешка.

притисни ентер