Македонија ќе воведе контра мерки доколку Косово не ја повлече одлуката

Македонија и официјално, со допис до ЦЕФТА, ЕУ и Владата на Косово, побара повлекување на времената  одлука за зголемување на царините за увозното овошје и зеленчук. 

Ако Косово не ја повлече одлуката, Владата на Република Македонија ќе преземе мерки за заштита на домашното производство, соопшти Министерството за земјоделство, шумарство и водостопанство (МЗШВ).

Според МЗШВ, владите на Македонија и Косово преговараат за изнаоѓање решение за зголемените царини. Министерот за земјоделство Љупчо Николовски заедно со министерот за економија Крешник Бектеши следната недела ќе имаат средба со косовските ресорни министри, а министерот за надворешни работи Никола Димитров кој денеска ќе се сретне со државниот врв на Косово, меѓудругото, ќе се разговара и за одлуката за зголемување на царините.

- Владите на  Македонија и на Косово од вчера се во постојана комуникација за изнаоѓање на соодветно решение. Во насока на решавање на проблемот, министерот Николовски е во постојана комуникација и со ресорните министри од регионот. Тие следната недела на заедничка средба ќе разговараат за изнаоѓање модел за надминување на проблемот, информираат од МЗШВ.

Времената мерка официјално стапи во сила на 18 јули и со неа се зголемуваат за 30 отсто царините за увезеното овошје и зеленчук. Мерката ќе трае три месеци и важи за сите држави кои извезуваат во Косово. Според МЗШВ, најпогоден од оваа одлука ќе биде извозот на доматите, пиперките и сливите. Во одлуката го нема грозјето и други стратешки производи. 

Вкупниот извоз на зеленчук и овошје од Македонија во Косово за периодот јануари - јуни 2018 година е над 2,5 милијарди денари.Увоз на земјоделски производи од Косово нема. /МИА

Груевски: Ципрас никогаш не предложил такви разговори кои сум ги одбил

Ден по интервјуто на грчкиот премиер Ципрас, во кое, тој изјави дека екс премиерот Груевски никогаш не сакал да преговара за промена на името, денеска со реакција се огласи и самиот Никола Груевски.

Сакам да посочам дека всушност Ципрас никогаш не предложил такви разговори кои јас сум ги одбил.

 Впрочем, пред неговото доаѓање за премиер, водев интензивни разговори со г-динот Папандреу со кого имавме 10 лични средби по ова прашање, но за жал заради познатите грчки позиции или црвени линии како што тие ги нарекуваа, не дојдовме до решение, кое подоцна би го предложиле на граѓаните на референдум,напиша Груевски на фејсбук.

 Според него, тој со Ципрас имал само две меѓусебни комуникации, на кои грчкиот премиер, воопшто не предложил разговори за решавање на спорот за името.

Кривична пријава против Палeвски и уште три лица за пуштањето „бомби“ на разглас

Прилепската полиција поднесе кривична пријава за сторено кривично дело „неовластено прислушување и тонско снимање“ против Љупчо Палевски и уште три други лица од Прилеп и Битола.

Кривичната пријава следува откако на 4-ти април за време на изборната кампања, тие во Прилеп организираа мал собир на кој на разглас пуштија неколку нелегално прислушувани разговори..Во снимките се појавија гласови на актуелни и поранешни функционери.

Палевски и останатите тогаш беа задржани во полициска станица, а по наредба на обвинител беа извршени и претреси во кои беа одземени нивните мобилни телефони, мемориски картички, усб стикови и друга електронска и компјутерска опрема..

Кривичната пријава е поднесена до обвинителството во Прилеп, а за ова дело, кривичниот законик предвидува парична казана или затвор до една година..

Заев со дијалог ќе бара решение за реконструкцијата на Алипашината џамија во Охрид

Премиерот Зоран Заев во однос на реакциите околу градежните работи на Алипашината џамија во Охрид денеска изјави дека верува оти низ дијалог ќе се изнајде решение.

– Ова е типичен пример на верска потреба која се јавува кај одредена група граѓани. Само заедно можеме да го решиме тоа. Ќе продолжиме да разговараме. Институциите мора да се почитуваат, изјави Заев по денешната дебата за нацрт текстот на Националната стратегија за развој на коцептот за едно општество и мултикултурализам.

Нагласи дека нема никакви ветувања. Ветувањата, истакна, беа да седнеме и низ разговор да го решиме овој проблем.

– Охрид е пример на соживот, пример на „Едно општество за сите" за што денеска говориме преку Нацрт националната стратегија, подвлече премиерот Зоран Заев.

Инаку, клучен проблем со Алипашината џамија во Охрид е минарето што треба да биде високо 32 метри чија изградба не е дел од конзерваторско-реставратотските работи на објектот.

притисни ентер