Кој им се заканува на членовите на ВМРО-ДПМНЕ?

МВР  не ги открива политичарите кои добивале закани околу донесувањето на предлогот за уставните измени.

 Од полицијата не откриваат ниту кој им се заканува на раководните лица и членови на ВМРО - ДПМНЕ, за кои вчера на јавен настап зборуваше министерот за внатрешни работи Оливер Спасовски, но тој потенцираше дека досега ниту еден пратеник не се пожалил во полицијата на било какво кршење на законот.

Јавно досега проговорија пратеничката Даниела Рангелова, која рече дека трпи закани на социјалните мрежи поради гласање на референдумот и поранешниот заменик генерален секретар на ВМРО ДПМНЕ Петар Богојески, кој рече дека сите кои ја поддржале алтернативната кампања се под жесток притисок.

Според специјалистот за ПР и нови медиуми Бојан Кордалов, заканите упатени на социјалните мрежи се со иста тежина како и вербалните.

Дека постојат информации за закани кон пратениците од ВМРО – ДПМНЕ кои сакаат да го поддржат Договорот од Преспа  пред четири дена предупреди еврокомесарот Јоханес Хан.

Од ВМРО - ДПМНЕ велат дека ова е само уште еден обид на власта за дефокусирање на јавноста од пропаднатиот референдум. Од партијата потенцираат дека ВМРО – ДПМНЕ не се заканувало и дека  станува збор за сериозни обвинувања. Од таму бараат надлежните органи да ги истражат  наводите.

Николовски се сретна со генералните секретари на коалиционите партнери од мнозинството предводено од СДСМ

Генералниот секретар на СДСМ, Љупчо Николовски попладнево одржа координативен, работен состанок со генералните секретари на коалиционите партнери од мнозинството предводено од СДСМ.

На средбата се разговараше за повеќе актуелни теми, за процесот на промени во интерес на граѓаните, исполнувањето на реформите за напредокот на државата како и за соработката помеѓу политичките партии во самата коалиција.

Николовски го презентираше и новиот систем за работа на СДСМ кој предвидува и подобра координација меѓу партиите во имплементација и реализација на програмските определби и реформите во интерес на граѓаните.

Промените започнаа и тие ќе продолжат во континуитет. Заеднички создаваме систем за евалуација на постигнатите резултати и придонесот на секој што презел одговороност да им служи на граѓаните.

Соработката помеѓу партнерите е добра, заедничка цел е промените и корекциите што се случуваат да ги засилат екононмските продобивки за сите граѓани.

Интересите на граѓаните и напредокот на државата се на прво место.

Беше оценето дека редовни средби на ниво на генерални секретари на партиите од коалицијата позитивно влијаат во подобрување на координацијата меѓу партиите на оперативно ниво, се наведува во соопштението на СДСМ..

Се судрија два германски воени авиони, едниот пилот загина

Два воени авиони Еурофајтер на германските вооружени сили се судрија во североисточната германска држава Мекленбург-Западна Померанија, при што еден пилот загина.

Пилот од трет авион, кој исто така учествувал во маневрите, видел како двајцата пилоти се катапултирале, по што го пријавил инцидентот. Падобранот на едниот пилот се закачил за стебло и откако го пронашле спасувачите укажана му е потребната медицинска помош.

Портпаролот на германската војска за „Билд“ изјави дека другиот пилот не го преживеал падот.

Пендаровски – Маас: Потврдена силната поддршка од Германија за европската интеграција на Република Северна Македонија

Претседателот на Република Северна Македонија, Стево Пендаровски, во рамки на официјалната посета на Сојузна Република Германија, денеска се сретна со германскиот министер за надворешни работи Хајко Маас.

На средбата, како што соопшти Кабинетот на Пендаровски, биле разменети мислења за севкупните билатерални односи меѓу Република Северна Македонија и Сојузна Република Германија, при што било констатирано дека двете земји имаат изградено односи на пријателство, исполнети со доверба и взаемно почитување.

Претседателот Пендаровски оценил дека Сојузна Република Германија е клучен политички партнер и најголем трговски партнер на Република Северна Македонија, држава која постојано дава поддршка за нашите аспирации за членство во Европската Унија и во НАТО. Претседателот Пендаровски изразил задоволство за ратификацијата на Протоколот за пристапување на Република Северна Македонија во НАТО во германскиот Бундестаг.

Пендаровски и министерот Маас размениле мислења за последните случувања поврзани со европската интеграција на Република Северна Македонија. Претседателот Пендаровски посочил дека Република Северна Македонија во изминатиот период вложи многу напори во исполнување на европските критериуми и истакнал дека ќе продолжи реализацијата на реформската агенда. Во таа насока, претседателот Пендаровски го реафирмирал очекувањето за одредување на датум за почеток на пристапните преговори со Европската Унија. /МИА

притисни ентер