Двајцата обвинети за убиството на Никола Саздовски се изјаснија дека не се виновни

Започна судењето за убиството на дваесетгодишниот Никола Саздовски од навивачката група Комити... На обвинителна клупа седнаа  Бесир Беља и Скендер Демири, кои заедно со третообвинетиот кој е во бегство, се гонат за „убиство на свиреп начин“.

Двајцата обвинители Бесир Беља и Скендер Демири се изјаснија дека не се чувствуваат виновни за убиството на младиот навивач Никола Саздовски – Саздо. Во воведниот говор обвинителот од Основното јавно обвинителство рече дека ќе докаже оти овие двајца обвинети и Јетон Љужа, кој е во бегство, на 29 јуни годинава на автобуската постојка на булеварот “Александар Македонски” во скопската населба Автокоманда му пристапиле на Саздовски и му побарале лична карта. Откако му го утврдиле идентитетот тие со клоци и боксови го претепале по што тој паднал во бесознание . Во коматозна состојба тој бил пренесен на КАРИЛ, каде на 3ти јули му била констатирана мозочна смрт, а на 9ти јули починал.

За адвокатите на обвинетите не станува збор за свирепо убиство, како што тврди обвинителството, туку за насилство, бидејќи според нив обвинетите немале таква умисла. Тие тврдат дека по нападот и тепањето Саздовски паднал со глава на метална кутиуја која се наоѓа на автобуската постојка и така се здобил со тешката повреда која била фатална.

На денешното рочиште сведочеше таткото на Никола Саздовски кој рече дека се приклучува кон кривичниот прогон на обвинителството. Како сведок се јави и седумнаесет годишна девојка, чиј идентитет беше откриен, иако станува збор за малолетно лице. Таа видно исплашена, рече дека добивала закани по телефон, прикривајќи си го лицето со капуљача од јавноста. По ова судот одлучи судењето да продолжи зад затворени врати додека таа сведочи.  Адвокатот на семејството на починатиот Никола, Ванчо Шехтански изјави дека е задоволен од исказот на девојката, која била на лице место кога се случил нападот.

Следното рочиште за овој предмет е закажано за 20ти ноември.

Договорот од Преспа една од темите на средбите на Кумуцакос во Вашингтон

Одговорниот за надворешна политика во грчката опозициска Нова демократија, Јоргос Кумуцакос, оствари низа средби со високи американски функционери при неговата посета на Вашингтон.

 Освен за билатералните односи и состојбата во регионот, станало збор и за Договорот од Преспа, јави дописничката на МИА од Атина.

Кумуцакос, имал средби со новиот помошникот државен секретар Филип Рикер, со заменик помошникот државен секретар за Европа и Евроазија Метју Палмер, како и со Јури Ким, шефот на Директоратот на Стејт департментот за Југоисточна Европа.

Во однос на Договорот од Преспа, според грчката новинска агенција АНА-МПА, Кумуцакос на средбите ја повторил цврстата позиција на Нова демократија дека станува збор за штетен договор и истакнал дека не е урамнотежен затоа што Република Северна Македонија е единствената страна што има конкретна корист преку интеграцијата во НАТО и почеток на преговори со ЕУ.

-За жал не постои нешто конкретно и материјално, што грчките граѓани ќе го видат како позитивен резултат од овој договор. И ова треба да се излечи и е еден од големите залози за следната влада на Нова демократија, за да се справи со негативните последици и да создаде конкретна политика во корист на интересите на земјата, рекол Кумуцакос./МИА.

ДКСК отвори предмети за Матка и за предизборни вработувања во АВМУ

Државната комисија за спречување на корупција отвори два нови предметa по кој ќе постапува по допрен глас.

 Случајот Матка и корупцијата во политиката која се однесува на вработување двајца правници во Агенцијата за аудио и аудиовизуелни медиумски услуги (АВМУ) за време на изборен процес.

Претседателката на ДКСК, Билјана Ивановска на денешната седница истакна дека за двата отворени предмета ќе бараат информации односно документи од општината Сарај односно од АВМУ. Во однос на случајот Матка одлучиле да постапуваат бидејќи, како што рече, институциите се прогласиле за ненадлежни.

Ивановска најави дека можно е да отворат предмет и за случајот со плажите во Струга.

На новинарско прашање до каде со 18 предмети за судир на интереси отворени на 18 јануари годинава, информира дека два предмета се затворени. Во првиот случај за вработувањето на ќерката на пратеничката Емилија Александрова во Фондот за иновации и технолоши развој добиле инфромација дека таа воопшто не конкурирала таму. Во вториот случај – за сопругата на поранешниот градоначалник на Берово, Звонко Пекевски, истакна дека добиле информации оти таа била ангажирана со договор на дело како наставник во основно училиште две години, по што по автоматизам и се трансформирал работниот однос во редовен работен однос.

За вработувањето на ќерката на претседателот на Парламентот, Талат Џафери во ЕЛЕМ, Ивановска истакна дека тие добиле информации од компанијата, но ги сметаат за недоволни. Појасни дека според стручноста, ќерката на Џафери има завршено Правен факултет, магистрирала со 10 и поседува правосуден испит, но дека не се знае по кој критериум била избрана на конкурсот за вработување, и нема информации за останатите кандидати кои се пријавиле на конкурсот.

Запрашана за тоа дали со распишаните тендери во Собранието за време на избори се крши Изборниот законик, таа нагласи дека се што е во рамки на редовно извршување на работите не се смета за прекршување.

Најави дека ДКСК планира да спроведе поопсежна анализа во однос на систематизацијата на вработувањата во јавните компании.

Џафери на студиска посета во Единбург организирана од Вестминстер фондацијата

Претседателот на Собранието на Република Северна Македонија, Талат Џафери, од 20 до 22 март е на студиска посета во Единбург, Шкотска.

Претседателот на Собранието на Република Северна Македонија, Талат Џафери, претседателката на Комисијата за финансирање и буџет, Лилјана Кузмановска и генералниот секретар на Собранието, Цветанка Иванова, од 20 до 22 март се на студиска посета во Единбург, Шкотска.

Студиската посета е организирана од Вестминстер фондацијата за демократија и е во рамките на потпишаниот Меморандум за соработка за воспоставување на буџетска парламентарна канцеларија во Собранието на Република Северна Македонија, соопшти собраниската прес-служа.

притисни ентер