Нимиц: Се измачив со користењето на „ПЈРМ", Преспа е врв на мојата кариера

Нимиц вели дека денот на потпишувањето не го памети само по 79 роденден кој го прослави на брегот на Преспанското езеро, туку како многу потресен и многу важен ден, кој, како што наведува веројатно е врвот на неговата кариера.

Американскиот дипломат Метју Нимиц кој речиси 25 години посредуваше во спорото за името меѓу Скопје и Атина, во разговор за Дојче веле признава дека до самото потпишување на Договорот од Преспа на 17 јуни 2018 година, па ни потоа, не бил сигурен дека целата работа ќе се истера до крај.

Вели дека денот на потпишувањето не го памети само по 79 роденден кој го прослави на брегот на Преспанското езеро, туку како многу потресен и многу важен ден, кој, како што наведува веројатно е врвот на неговата кариера.

Нимиц кажува и дека постојано се мачел со користење на референцата „поранешна југословенска Република Македонија", име кое, како што посочува, всушност и не беше име.

– Привремената референца во Обединетите нации воопшто не беше име на земјата. Тоа беше времена референца во очекување на име. Тоа ви е како јас и сопругата да добиеме дете и во болница да му напишат „синот на г-дин и г-ѓа Нимиц. И ако детето 20 години шета без име, тој или таа ќе расте во многу непријатна ситуација. Вашата земја беше заглавена со таа референца што беше понижувачки за државата, ја доведуваше во прашање нејзината легитимност, отвораше проблеми, а беше тешко и за мене како претставник на ОН да ја користам и постојано да повторувам 'поранешна југословенска Република Македонија, вели Нимиц.

Од денешен аспект смета дека единствениот период во минатото кога можеби можел да се реши спорот се отворил веднаш по Самитот на НАТО во Букурешт во 2008 година.

– Можеби во таа кризна атмосфера нешто можеше да се стори, но излезе дека не е така затоа што имаше премногу бес и владата во Скопје одлучи да тужи пред Меѓународниот суд. Ни САД тогаш не беа многу од помош, да поттурнат за да се најде ново име, се присетува Нимиц.

Го споменува и периодот на грчкиот премиер Јоргос Папандреу, „кој имаше интерес да го реши проблемот", и неколкуте негови средби со тогашниот македонски премиер Никола Груевски. -Но, тоа не беа интензивни преговарачки сесии, што ме разочара. Тоа беа само куси состаноци, вели Нимиц.

И во периодот на владите на Љубчо Георгиевски и Костас Симитис за време на конфликтот во 2001 година кружеле идеи преку „неформални дискусии, а биле нафрлени и неколку имиња", но во тој период надежите на Нимиц биле насочени кон поранешниот претседател Борис Трајковски.

-Трајковски беше претседател. Имав чувство дека доколку Трајковски не загинеше трагично во авионската несреќа, дека тој имаше лидерски потенцијал да стори нешто, смета Нимиц.

Според него, процесот на антикцизација во Скопје што го почна владата на Никола Груевски по Самитот во Букурешт, имало многу лош ефект на процесот.

– Имав многу дискусии со Груевски и имав добри односи со него. Минавме многу часови заедно. Ќе одев во неговиот дом и ќе вечеравме заедно, и ќе разговаравме. Го сметав за многу интелигентен. Ги познаваше работите многу добро. Секогаш го сметав за многу интересна личност за разговор на оваа тема. Но неговите, и погледите на претседателот Иванов, беа премногу заглавени во историскиот пристап. Тоа за мене беше ќорсокак, наведува Нимиц.

Груевски,  оценува Нимиц, никогаш не бил подготвен да го направи последниот чекор.

-Тој не беше подготвен на компромис доволен за да се постигне договор. Беше флексибилен, но неговата флексибилност беше лимитирана. А и политиката во земјата беше таква што тој со оваа тема добиваше на избори, оценува Нимиц.

Долгогодишниот посредник во разговорите за името вели дека Преспанскиот договор и натаму се соочува со силно противење и во  Македонија и во Грција, како од двете најголеми опозициски партии, така и од радикалите.

Нимиц додава дека тоа му е јасно, а објаснувањето е дека „никогаш не можете да бидете сигурни за иднината.”

-Не верувам дека историјата кога било престанува. Нештата се движат. Споровите кои имаат длабоки корени се менуваат во природата, но никогаш целосно не исчезнуваат, одговара тој на дилемата дали е конечно затворен спорот./МИА.

Тешка несреќа во Индија – најмалку 42 загинати кога автобус падна во бездна длабока 500 метри (ВИДЕО)

Најмалку 42 патници загинаа во индиската држава Химачал Прадеш , кога автобус , кој превезувал над 70 патници се преврте во река на дното на бездна длабока 500 метри. 

Голем број од патниците се возеле на покривот на автобусот. Повеќе од 30 патници се повредени кога автобусот се превртел во река во планинскиот предел Кулу.

Бројот на загинати може да се зголеми , зашто не се знае колкумина од оние што седеле на покривот на автобусот настрадале во несреќата.

Автобусот пропаднал во бездна длабока 500 метри во планински предел на 60 километри од градот Кулу.

Почна самитот на ЕУ – Се очекува потврда на заклучокот за Македонија

Без поголеми очекувања дека може да дојде до пресврт и промена на заклучците  што пред два дена ги освија министерите за надворешни работи, лидерите на Европската Унија го почнаа дводневниот самит во Брисел..

Темата на проширувањето, според очекувањата, не е високо на денешната ангенда на Европскиот Совет.

Александар Видиновски е во Брисел..

Потпишан Меморандум за соработка на граничните премини меѓу Владата и „Макам Транс“

Целта на Меморандумот е подобрување на условите за меѓународен транспорт на стоки придонесува за зголемување на растот и продуктивноста и е во насока на спречување на корупција и криминал

Националниот координатор за гранично управување при Владата на Република Северна Македонија, Владимир Пивоваров и Билјана Муратовска, генерална секретарка на Асоцијацијата на превозници „Макам Транс“- Скопје, денеска во присуство на заменикот на претседателот на Владата и министер за внатрешни работи, Оливер Спасовски и директорот на Царинската управа, Ѓоко Танаскоски потпишаа Меморандум за заедничка соработка, во борбата против корупцијата на граничните премини при влез и излез во земјата, како и граничните премини во странство.

Во воведното обраќање, Националниот координатор за гранично управување, Владимир Пивоваров истакна дека најважно средство во борбата против криминалот е информацијата за направени незаконити дејствија, навремено да стигне до надлежните институции кои понатаму ќе дејствуваат.

„Добивањето на првичната информација за корупција и криминално однесување обезбедува навремено почнување со реалната борба против корупцијата и овој Меморандум обезбедува ние да бидеме сервис за споделување на информации во Северна Македонија и надвор од неа. Соработката со „Макам Транс“ предвидува, превозниците на кои на граничните премини ќе им биде побарано мито од страна на цариник, полицаец или инспектор за храна и ветерина, таквата информација да ја достават до нивната централа, која потоа ќе биде проследена до Дежурниот Оперативен Центар при Национален Координативен Центар за Гранично Управување. Центарот ќе има обврска таа информација веднаш да ја сподели до надлежната институција за понатамошно постапување“, рече Националниот координатор за гранично управување, Пивоваров додавајќи дека за бројот на примените и дистрибуирани информации, Координативниот Центар ќе доставува месечен извештај до Владата на Република Северна Македонија.

Министерот за внатрешни работи Спасовски подвлече дека Меморандумот за заедничка соработка на граничните премини е од исклучителна важност за одржување на континуитетот во воспоставувањето потесна, оперативна и ефективна соработка меѓу институциите и граѓаните  при обезбедувањето на проток на патници и трговска стока.

„Овој Меморандум ќе обезбеди и навремено детектирање и анулирање на сите пречки за обезбедување на безбеден и слободен транспорт. Меморандумот обезбедува практично следење и конкретна размена на информации, кои превозниците ќе имаат можност преку Информатичка Технологија (ИТ) да ја пријават и истовремено очекуваме намалување на ризиците и реално намалување на криминалот и корупцијата. Ве охрабруваме, Вас превозниците, а и полицајците, цариниците и сите институции на системот, заедно да застанеме во борбата со корупцијата на границите“, истакна во своето обраќање министерот за внатрешни работи, Спасовски.

Подетално за апликацијата, која ќе биде бесплатна и ќе ја има на веб страницата на Асоцијацијата „Макам Транс“ и ќе биде достапна и за корисниците на мобилни телефони, говореше генералната секретарка Муратовска.

„Апликацијата ќе може да ја користи било кој превозник, не мора да биде член на нашата Асоцијација“, рече Муратовска нагласувајќи дека пријавувањето на незаконските дејности ќе биде анонимно. Муратовска се заблагодари на Владата за вклучувањето во борбата со корупцијата и за залагањето за надминување на пречките со кои се соочуваат превозниците.

Според директорот на Царинската Управа, Танаскоски, мерките и соработката кои се регулираат во Меморандумот ќе обезбедат подобри услови за внатрешен и меѓународен транспорт на стока и проток на патници и со тоа директно ќе се влијае на олеснување и зголемување на трговијата и подобрување на економската соработка и раст.

Учесниците на денешниот настан упатија порака за охрабрување и подигнување на  свеста и совеста на сите кои се соочуваат, да ги пријават незаконските дејствија со цел намалување и на крајот и искоренување на корупцијата и криминалот во земјата.

притисни ентер