Сопственикот на фирмата Ардиан Амзоски за Канал 5 вели дека и покрај тоа што очекувале дека преку проектот за старечки домови ќе помогнат во решавање на важни социјални прашања, се изненадил од тоа како завршила целата приказна. Договор со Меѓународниот сојуз склучиле пред една година на чија што потпретседателка Јасна Ерцеговиќ Мандиќ и исплатиле 233 илјади евра, но откако и по рокот од 6 месеци не им биле вратени парите се одлучиле за тужба.

Чудно е зошто „Дрим Билдинг“ потпишал договор со Меѓународниот сојуз на Боки 13 а парите ги исплатил на физичко лице преку авторски договор.

Верувавме во овој проект. Меѓународниот Сојуз ни беше стратешки партнер и се надевавме на таа инвестиција. Имавме договор пред една година, нашата фирма исплати дел од парите. Но откако не се реализира договореното и во рокот од три месеци не ни ги вратија парите преку адвокатите поднесовме тужба на Меѓународниот Сојуз. Не очекувавме вака да заврши но како и што видовме во медиумите се случи тоа што се случи.

Откако првин пензионерката Лилјана Тодоровска, сведочеше дека, „девојка од Меѓуанродниот сојуз“ во торба и ги зела 730.000 евра, уплатени од фирмата Пелистер, кои ги подигнала од банка, потоа и изиграната Дрим Билдинг, во јавноста се отворија сомнежите дека токму преку Јасна Ерцеговиќ Мандиќ одел трансферот на парите за старечки домови кои никогаш не биле изградени. Иако Канал 5 пред неколку дена се обиде да стапи во контакт со неа одговор не добивме. Меѓународниот сојуз чиј што потпретседател е таа, според наведената адреса се наоѓа на Водно на улицата Тодор Александров. Но бидејќи како што ни кажаа таму е сместен во комплекс на амбасади, пристап до него освен со дозвола е невозможен.

Дали во рамки на истрагата е извршен претрес во просториите на Меѓународниот сојуз, од обвинителството засега не откриваат. Ве меѓувреме се чека вештачењето на мобилниот телефон на Боки 13 кој како што потврдија оттаму, му бил одземен во моментот кога беше уапсен на граничниот премин Богородица.