Без многу детали речиси три часа траеше распитот на второосомничениот во случајот „Рекет“, Зоран Милески – Кичеец во Обвинитеството за гонење организиран криминал и корупција, кој денеска за прв пат даде исказ за случајот пред обвинителката Вилма Русковска.
Утрово во својство на сведок на распит се појави и пензионерката Лилјана Тодоровска, која во јавноста стана позната како авторка на проектот за социјален центар за возрасни во Битола за што на нејзина сметка легнале 720.000 евра, врз основа на договорот меѓу Меѓународниот сојуз и фирмата Пелистер.
Тодоровска по распитот не сакаше да коментира, само кратко изјави дека „сега е време за тишина“.
Нема информации за содржината на исказите на Кичеец и Тодоровска. Од обвинителството за гонење на организиран криминал и корупција велат дека во интерес на истрагата не можат да откријат повеќе детали за сведочењата.
-Сите лица кои се сослушуваат во оваа фаза се во својство на сведоци, ни изјавија од обвинителството.
Досега искази за случајот „Рекет“ дадоа обвинителите Лиле Стефанова, Бурим Рустеми и Елизабета Јосифоска, а најголем интерес во јавноста предизвикува сведочењето на специјалната обвинителка Катица Јанева која утре треба да даде исказ пред Русковска. Таа засега има статус на сведок.