За запален растителен отпад од пластеници земјоделец од сарај ја заработи првата прекршочна пријава за загадување. Фатен на дело со снимки од дрон, земјоделецот кој за отпадот наместо да ги повика службите на градот да го исфрлат бесплатно се одлучил како и во повеќе случаи досега да ги запали заработи казна од илјада евра за палење оган на отворено. Со вонреден иснпекциски надзор со примена на современи технологии кои подразбираат снимање со употреба на дрон инспекторите го идентификувале лицето против кого е поднесена пријавата за прекршок од законот за управување со отпад. Од град Скопје најавуваат дека ова е само почеток на битката со палењето отпад и стрништа бидејќи дронот ќе биде секојдневно ангажиран да ги лови прекршителите од воздух.
-На дронот има и камера за ноќно снимање, па со него ќе се вршат прелети и во текот на ноќта за лоцирање на критичните точки кои предизвикуваат загадување. Инспекторите се континуирано на терен, организирани во дежурства, и ја следат состојбата со загадувачите на животната средина, се вели во ставот на град скопје
Надлежните од град Скопје уште еднаш апелираа до сите земјоделци од скопските општини дека на располагање им стои бесплатна служба која ќе дојде и ќе им ги исфрли растителните отпадоци од нивите или од стрништата само да не се палат. Тоа може да се пријави на телефонскиот број 071 395 395 секој работен ден од 8 до 20 часот, а градот по претходно утврден план и редослед, реонски, бесплатно ќе го собере нивниот растителен отпад и ќе го исфли во „Дрисла“.
Во оваа акција за исфлање отпад првично се пријавиле 38 лица. Досега градот има расчистено 25 стрништа од каде со камиони е собрано 100 кубни метри растителен отпад само да се спречат палењата на стрништа кои се казниви и кои освен што се штетни за земјоделската почва тие се и една од честите причини за појава на пожари и загадување.