Со најава за нови предлози и забелешки на владиниот предло-закон стартува новата серија на средби меѓу власта и опозицијата за Законот за јавно обвинителство. На денешната средба зад затворени врати меѓу Бојан Маричиќ и Тимчо Муцунски се отворила дебата за откочување на дијалогот, но единствено се договориле во текот на неделава двата тима повторно да седнат на маса за да ги разгледаат можните решенија.
,,Камен на сопнување продолжува да биде неизбалансираното законско решение, со кое засега не се гарантира независно јавно обвинителство кое не е подложно на политички злоупотреби. – велат од ВМРО ДПМНЕ.
Но, од СДСМ тврдат дека со опозициската партија најмногу се разидуваат за иднината на предметите на СЈО и тимот кој се префрли во државното обвинителство.
,,Постапките на СЈО и продолжување со работа на обвинителите на конкретните случаи со кои се задолжени остануваат најголем проблем за опозицијата. Ние сакаме правда и професионално обвинителство кое ќе го продолжи постапките. Цврсто стоиме зад донесување на законот и работиме со сите пратенички групи за негово донесување.
Оптимизам за компромисно решение пред распуштање на Собранието има кај претседателот на СДСМ. Доколку се донесе Законот за јавно обвинителство, Заев смета дека ќе се даде мотив плус за земјите-членки на ЕУ напролет да донесат позитивна одлука за почеток на преговори со земјава.
За да стигне до двотретинското мнозинство во Собрание, Заев најави дека ќе преговара и со независните пратеници од ВМРО ДПМНЕ кои гласаа за уставните измени, но тие велат дека се уште немаат одлучено дали ќе гласаат за овој закон.