Четири години по смртта на Џорџ Флојд се уште нема полициски реформи во САД

Денеска се навршуваат четири години од смртта на Џорџ Флојд како последица на полициско насилство. 

Инцидентот што се случи во Минеаполис, сојузна држава Мичиген, предизвика невиден бран протести во САД и низ целиот свет при што милиони повикуваа на правда и запирање на насилството засновано на расна омраза. И покрај мноубројните масовни протести, Конгресот се уште е далеку од усвојување на бараните реформи во полицијата на сојузно ниво.

Неколку членови од семејството на Флојд неделава беа во Вашингтон во посета на Конгресот на средби со конгресната група за пријателство со црномурестите, а за подршка да се усвои нацрт законот за полиција наречен Правда за Џорџ Флојд.

Мерката поднесена од тексашката претставничка Шејла Џексон Ли ќе овозможи поригорозни реформи за одговор на полициските службени престапи и зајакнување на стандардите за одговорност во полицијата.

Кога Претставничкиот дом беше под контрола на демократите нацрт законот беше изгласан двапати, во 2020 и во 2021 година. Предлогот повикуваше на ограничување на квалификуваниот имунитет на службените лица, спречување расно профилирање и употреба на прекумерна сила. Но, не помина во Сенатот, по неуспехот во преговорите меѓу сенаторот Кори Букер, демократ од Њу Џерси и неговиот колега од Јужна Каролина, републиканецот Тим Скот, а по предлогот да се забрани давењето, налозите за апсење без чукање на врата и проширување на напорите за сојузно собирање податоци.

Флојд (46) беше усмртен откако Дерек Шовин, полицаец од Минеаполис, клечеше на неговиот врат повеќе од девет минути додека Флојд речиси без здив велеше „не можам да дишам“. Инцидентот, фатен на видео, предизвика глобални протести и срамнување на сметките на расна основа кои се случуваа во текот на беснеењето на пандемијата со коронавирус во 2020 година. Шовин беше обвинет и моментално служи казна затвор од 22 и пол години.

Братот на Флојд, Филонис, и неговата сопруга за „Си-би-ес њуз“ неделава изјавија дека тој се уште има кошмари за смртта на неговиот брат.

Борел за утрешната средба Вучиќ-Курти: Дијалогот мора да доведе до оперативно решение

На маргините на состанокот на шефовите на дипломатиите во Луксембург, Борел им рече на новинарите дека сега тоа е клучно, бидејќи членките на ЕУ го разгледуваат неговиот предлог барем за постепеното укинување на санкции за Косово.

Високиот претставник на Европската унија (ЕУ) Жосеп Борел пред средбата меѓу српскиот претседател Александар Вучиќ и косовскиот премиер Албин Курти во Брисел, изјави дека „вложува напори српско-косовскиот дијалог да го доведе до оперативно решение“ за спроведување на Охридскиот договор, јави дописникот на МИА од Белград.

На маргините на состанокот на шефовите на дипломатиите во Луксембург, Борел им рече на новинарите дека сега тоа е клучно, бидејќи членките на ЕУ го разгледуваат неговиот предлог барем за постепеното укинување на санкции за Косово.

- И тоа може да создаде сценарио во кое Дијалогот, не велам дека ќе се обнови, но барем нема грубо да се прекине, соопшти високиот претставник на Унијата.

- Двајцата лидери (на Србија и на Косово) се состануваа долго време во рамките на Дијалогот и јас не сакам тој да заврши пред да го завршам мојот мандат, рече Борел.

Високиот претставник на ЕУ објасни дека Приштина и Белград „од една или друга причина не биле во можност да го спроведат тој договор“, но рече дека „сега е неопходно да се обноват состаноците на високо ниво за да се знае каде сме“.

Според најавата на ЕЕАС, Борел и Лајчак утре во Брисел прво одделно ќе разговараат со Вучиќ, а потоа со Курти, по што ќе следи заедничка средба на високите претставници на ЕУ и српскиот претседател и косовскиот премиер.

Маринакис: Постои само едно толкување на ерга омнес

Не може да биде селективно спроведувањето на меѓународното право и тоа е нешто што нема да биде толерирано од грчка страна.

Ние бараме јасно и гласно, без отстапки почитување на договореното и ова е позиција од која нема да направиме каква било отстапка, рече портпаролот на грчката Влада Павлос Маринакис на денешниот редовен брифинг со новинарите и притоа посочи дека постои само едно толкување на ерга омнес, јави дописничката на МИА од Атина.

Одговарајќи на прашањето на МИА за тоа дали Мицотакис ќе му честита на Мицкоски, сега кога и официјално новата Владата положи заклетва, Маринакис посочи дека Грција во рамките на добрососедските односи со сите земји се придржува до протоколите, но и ги повтори грчките позиции.

-Факт е генерално, без да имам конкретна информација, дека нашата земја како држава сака, се стреми кон добрососедски односи, се стреми кон добри односи со сите држави, особено кога се соседни земји, се придржува кон сите протоколи за секоја процедура, без разлика дали е изборен процес или заклетва на Влада. Но, повторувам, бидејќи постојат некои новопојавени погрешни толкување за тоа што значи ерга омнес, јасно е, нема многу толкувања има едно толкување согласно меѓународното право и во овој момент со низа формулации спротивни на меѓународното право, се чини дека новата Влада на С. Македонија не го почитува. Очекуваме да видиме дали ќе усогласи, рече Маринакис.

Паралелно го повтори она шефот на грчката дипломатија Јоргос Герапетритис го посочил на вчерашниот состанок на министрите за надворешни работи на ЕУ дека „однесувањето на Скопје од изборите и потоа е престапното однесување, спротивно на меѓународното право“, но и дека „не постои почитување на обврската за ерга омнес име на државата, како што произлезе по Договорот од Преспа“.

Во однос на можностите за прва тет-а-тет средба на премиерите на двете земји на маргините на НАТО Самитот во Вашингтон за две седмици, на прашањето на дописничката на МИА од Атина, владиниот портпарол одговори дека ако се договори такво нешто ќе биде соопштено, меѓутоа во моментов не знае нешто повеќе.

Медиумите во Грција од доцна синоќа ги пренесуваат ставовите на премиерот Христијан Мицкоски изразени во интервјуто за ТВ24, особено делот во кој ја коментира вчерашната изјава на министерот за надворешни работи на Грција и посочува дека „или не го разбира Преспанскиот договор или погрешно го чита“.

Грчки дипломатски извори за медиумите утрово брифирале дека „правните текстови не се толкуваат врз основа на претпоставената волја и желба на кој било, туку врз основа на нивното писмо и дух, а техничкиот правен термин ерга омнес, кој е јадрото на Договорот од Преспа, не е подложен на апсолутно никакво оспорување“.

Претседателката Сиљановска Давкова го прими косовскиот амбасадор, Флоријан Ќехаја

Претседателката Гордана Сиљановска Давкова денеска го прими амбасадорот на Република Косово, Флоријан Ќехаја, соопшти нејзиниот кабинет.

На средбата беа разменети мислења за можностите за продлабочување на билатералната и регионалната соработка и беше поздравен отворениот и конструктивен дијалог за прашањата од заеднички и поширок интерес.

- Претседателката Сиљановска Давкова изрази подготвеност за продолжување на одличниот политички дијалог на највисоко ниво и изрази очекување дека позитивниот тренд во развојот на економските односи со Косово, како наш значаен трговски партнер, ќе продолжи и во иднина.

Во контекст на европските перспективи и споделувањето на заедничките вредности, претседателката Сиљановска Давкова изрази поддршка на косовските евроатлантски аспирации и учеството во различни формати на регионална соработка и ја истакна подготвеноста за споделување на искуства во сите области каде што располагаме со соодветна експертиза.

На средбата беа разменети мислења за актуелните случувања во регионот, за соработката во рамки на регионалните иницијативи, како и за можностите за продлабочување на прекуграничната соработка преку искористување на фондовите на Европската Унија, се наведува во соопштението од кабинетот на Сиљановска Давкова.

притисни ентер