Фон дер Лајен: ЕУ цврсто ќе стои зад Украина до нејзиното конечно ослободување

Фон дер Лајен најави дека следниот месец на Киев ќе му бидат исплатени првите 4,5 милијарди евра од Механизмот за поддршка на Украина

Денеска се одбележува мрачна годишнина, но исто така е моментот да се препознае извонредната моќ на отпорот на украинскиот народ на руската брутална инвазија на Украина, порача претседателката на Европската комисија, Урсула фон дер Лајен од Киев каде допатува денеска на двегодишнината од стартот на руската агресија врз земјата, како израз на солидарноста и поддршката на ЕУ.

- Вие, Украинците, му ја покажавте на светот вашата храброст и дека вашата борба за слобода е важна... Вие се борите за безбедноста на целиот наш континент. Затоа зад себе ја имате целата Европска Унија. Повеќе од кога било, ние цврсто стоиме покрај Украина, финансиски, економски, воен и најмногу морално, додека вашата земја конечно не се ослободи, нагласи Фон дер Лајен на заедничката прес-конференција со премиерите на Белгија, Александер Де Кро, на Италија, Џорџа Мелони и на Канада, Џастин Трудо, кои ја придружуваат при посетата, и со украинскиот претседател Володимир Зеленски.

Фон дер Лајен најави дека следниот месец на Киев ќе му бидат исплатени првите 4,5 милијарди евра од Механизмот за поддршка на Украина во вкупна вредност од од 50 милијарди евра за следните четири години, наменети за спроведување на украинскиот План за реформи и за инвестиции.

- Гледајќи напред кон иднината, Украина мора да има средства да се брани денес. Тоа е клучно за вашата безбедност и секако за безбедноста на Европа во целина. Затоа сакаме да ги зајакнеме одбранбените капацитети на Украина како дел од нашите, изјави Фон дер Лајаен најавувајќи дека за три недели ЕК ќе ја претстави новата Стратегија за одбранбена индустриска база, со која ќе се предвиди интегрирање на Украина во европски одбранбени програми.

Таа потсети дека оваа недела ЕУ го усвои 13-ти пакет со рестриктивни мерки кон поединци и субјекти одговорни за активности насочени кон поткопување или загрозување на територијалниот интегритет, суверенитет и независноста на Украина поврзани со рускиот воен и одбранбен, како и кон лица одговорни за депортација на украински деца.

Потенцирајќи дека најдобра безбедносна гаранција за Украина ќе биде членството во Европската Унија, Фон дер Лајен истакна дека во тој правец веќе скрининг процесот и најави дека кон средината на март Европската комисија ќе ја донесе преговарачката рамка.

- Нашата денешна посета ја нагласува нашата непоколеблива солидарност со Украина денес, утре и на долг рок. Вашата земја стана глобален симбол на отпорот во оваа благородна борба за слобода. Остануваме на ваша страна, порача Фон дер Лајен на прес-конференцијата одржана по средбата со Зеленски.

Претходно, таа имаше средба и со украинскиот премиер Денис Шмихал, со кого разговараше за европската финснаиски и воена поддршка за Украина, но и за надминување на проблемите поврзани со украинскиот извоз во ЕУ и блокадите на западната копнена граница на земјата.

Фон дер Лајен и премиерите Де Кро, Мелони и Трудо попладнево положија и венци на Ѕидот за сеќавање на загинатите украински бранители во конфликтот со Русија.

- На Ѕидот за сеќавањето им оддавам почит на Украинците кои ја направија најголемата жртва борејќи се за нашите вредности - слобода, демократија, владеење на правото. Тие се во нашите срца и мисли. Нивното наследство живее. И ќе блесне во текот на денот кога Украина ќе победи во оваа војна, наведе Фон дер Лајен во објава на Икс по полагањето на венците.

Пред тоа во текот на денот тие го посетија аеродромот „Антонов“ во Хостомел, во близина на Киев, каде се сретнаа со припадниците на украинските Вооружени сили кои се распоредени во одбрана на објектот, а утрово Фон дер Лајен присуствуваше и на церемонија на примопредавање на 50 теренски возила на украинската полиција, кои се донација од ЕУ.

Руските сили ја нападнаа Украина на 24 февруари 2022 година, започнувајќи ја најголемата воена офанзива во Европа по Втората светска војна, што резултираше со најмалку 10.000 цивилни и стотици илјади воени жртви, 3,6 милиони внатрешно раселени лица и 6,3 милиони украински бегалци во други земји. /МИА

Последен ден од изборната кампања пред парламентарните избори во Хрватска

Учесниците на изборите за хрватскиот Сабор официјално можат да ги претстават своите програми и кандидати денеска до полноќ, кога почнува дводневниот изборен молк, а два часа пред полноќ почнуваат изборите за Парламентот во странство, во Австралија.

Изборниот молк во Хрватска ќе трае до среда, 17 април, до 19 часот, односно до затворање на околу 6.500 избирачки места, пренесува Хина.

На почетокот на изборниот молк, 17-дневната официјална кампања ќе заврши пред изборите, кои наместо в недела, овојпат се одржуваат в среда, а на кои се кандидираше претседателот на Републиката Зоран Милановиќ oд листата на СДП, како кандидат за премиер. Негов главен ривал е актуелниот премиер Андреја Пленковиќ од владејачката Хрватска демократска заедница (ХДЗ).

Аналитичарите очекуваат дека ХДЗ ќе победи на изборите, но и дека партијата нема да може сама да формира влада, додека ако СДП се обиде да формира влада, ќе и бидат потребни партнери од десницата.

Социјалните, економските и надворешнополитичките прашања беа на маргините за време на кампањата, иако ХДЗ на Пленковиќ долго време беше предмет на критики поради бројните корупциски скандали и злоупотребата на фондовите на Европската Унија. Иако Пленковиќ негираше вмешаност на партијата во скандалите и изјави дека платите во Хрватска пораснале за 8,6 отсто во однос на 2023 година, а земјата забележала економски раст од 2,8 отсто, многу повисок од просекот во ЕУ, довербата на гласачите сепак опаѓа.

Последните анкети покажуваат дека ХДЗ, проевропска десничарска партија која ја водеше земјата независно или во коалиција 26 од скоро 33 години откако Хрватска прогласи независност, може да смета на 60 места во 151-члениот парламент - шест помалку од претходно.

СДП може да смета на три пратеници повеќе отколку што има сега - 44 наместо 41, покажуваат анкетите.

Самиот Милановиќ предизвика вознемиреност, главно на меѓународната политичка сцена, противејќи се на зголемувањето на помошта за Украина, за разлика од повеќето членки на ЕУ, а понекогаш настапуваше и со отворени проруски ставови, наведува Би-Би-Си.

Предизборната игра се вртеше околу имињата на претседателот на републиката и премиерот, чиј конфликт веќе неколку години е во центарот на хрватската политика.

Кога Милановиќ на 15 март објави дека „дојде време да се оседлаат коњите“, објавувајќи ја својата кандидатура за премиер на изборите на 17 април, предизвика вистински земјотрес на хрватската политичка сцена.

Уставниот суд набрзо му забрани на Милановиќ директно учество на изборите и премиерска кандидатура се додека не поднесе оставка од претседателската функција, што до ден денес не го сторил.

Милановиќ најави катарза и „запирање на хрватската трагедија“, а од СДП главно ја обвинуваа ХДЗ за корупција.

Премиерот Пленковиќ претходно го нарече Милановиќ „скриен лидер на опозицијата“. Сето ова што се случува е обид за мини пуч, злоупотреба на институциите“, рече тогаш Пленковиќ.

Право на глас на 17 април ќе имаат 3.733.283 хрватски граѓани, што е за 127.000 или три отсто помалку од претходните парламентарни избори во 2020 година.

Тие се поделени во вкупно 12 изборни единици: 10 се распоредени на територијата на сите окрузи во Хрватска, 11-та е гласот на дијаспората, а 12-та е составена од гласачи на националните малцинства.

Во секоја од првите 10 изборни единици, во парламентот се избираат по 14 пратеници, додека три мандати избираат дијаспората и Хрватите кои живеат во Босна и Херцеговина, а осум доаѓаат од редовите на партиите на Србите и другите малцинства.

Во 11 изборни единици пријавени се вкупно 165 листи, а од малцинските листи има уште 17 кандидати.

Се избираат 151 пратеник, па за мнозинство во хрватскиот Сабор потребно е да се добијат 76 мандати.

Прелиминарните резултати ќе бидат познати веќе во текот на изборната ноќ.

Макрон: Франција ќе направи се за да се избегне ескалација на конфликтот Израел - Иран

Франција ќе направи се што е во нејзина моќ за да се избегне ескалација на конфликтот меѓу Израел и Иран.

Франција ќе направи се што е во нејзина моќ за да се избегне понатамошна ескалација на конфликтот меѓу Израел и Иран на Блискиот Исток, изјави денеска францускиот претседател Емануел Макрон.

Тој го повика Израел да се воздржи од каков било одговор.

„Загрижени сме поради можна ескалација“, изјави Макрон за француски медиуми.

Иран истрела стотици беспилотни летала и балистички проектили врз Израел во текот на ноќта во саботата како одговор на наводниот израелски напад врз иранскиот конзулат во Сирија на 1 април.

„Ќе направиме се што можеме за да избегнеме ситуација што ќе се разгори, ќе ескалира“, рече Макрон, повикувајќи го Израел да се обиде да го изолира Иран наместо да ја ескалира ситуацијата.

Србија/Истражување: Секој трет ученик учествува во најмалку една тепачка годишно

Третина од учениците учествувале во тепачка најмалку еднаш во текот на годината, покажа истражувањето за здравственото однесување на училишните деца во Србија во учебната 2021/2022 година спроведено од Институтот „Батут“.

Весникот Политика денеска објави дека има забележителен пораст на агресивното однесување на девојчињата и дека ученичките почесто ги злоупотребуваат своите врсници во споредба со претходното истражување спроведено во 2018 година.

Психологот Ана Мирковиќ за Политика вели дека истражувањето на однесувањето и навиките на училишните деца покажува дека општеството во кое живееме станува се поагресивно. „Децата и младите растат во култура на насилство, во која агресијата е сеприсутна и стана валута за комуникација“, рече Мирковиќ.

Околу 41 отсто од учениците во прво одделение во средно училиште изјавиле дека првата сексуална врска ја имале на 15 години, а петтина дека првото интимно искуство го доживеале на 11 години.

Истражувањата покажаа дека учениците го поминуваат најголемиот дел од слободното време користејќи интернет, а секој 11-ти ученик ги користи социјалните мрежи повеќе од седум часа дневно.

Секој петти испитаник изјавил дека му е полесно да зборува за своите чувства на интернет отколку лично.

Речиси 40 отсто од учениците се чувствувале нервозни еднаш неделно или почесто, додека третина биле раздразливи, а петтина се жалеле на повремена несоница.

Истражувачкиот примерок го сочинуваа 198 паралелки од петто и седмо одделение од основните училишта и од прво одделение од средните училишта, а на прашањата на институтот „Батут“ одговориле вкупно 3.713 испитаници.

притисни ентер