Технологија

Иран лансира истражувачки сателит

 Иран денеска го лансираше истражувачки сателит Чамран-1 со помош на ракетата Каем-100 дизајнирана и произведена од Вселенскиот Силите на Револуционерната гарда.

Сателитот е поставен во орбита на оддалеченост од 550 километри и беа примени неговите први сигнали. Примарната мисија на сателитот, кој тежи 60 килограми, е „тестирање на хардверски и софтверски системи за демонстрација на технологија за маневрирање на орбитата, објавија државните ирански медиуми.

Друга цел е „да се процени потсистемот за погон на ладен гас во вселенските системи и перформансите на потсистемот за навигација и контрола на положбата“.

Иран има една од најголемите ракетни програми на Блискиот Исток. Во јануари иранските медиуми објавија дека сателитот Сораја бил лансиран во орбитата на растојание од 750 километри, што е најдолго растојание за ирански сателит. Но, Иран изминатите години имаше и неколку неуспешни обиди за лансирање на сателити поради технички проблеми.

Американската војска тврди дека балистичката технологија со долг дострел што се користи за поставување сателити во орбитата, исто така, може да му овозможи на Техеран да лансира оружје со долг дострел, вклучително и нуклеарни боеви глави.

Техеран негира дека неговите сателитски активности се покритие за развој на балистички ракети и тврди дека никогаш не се обидел да развие нуклеарно оружје./МИА

Свет

Веројатниот наследник на лидерот на Хезболах, Каани исчезна по израелските напади на Бејрут

 Есмаил Каани, командантот на иранските сили Кудс кој отпатува во Либан по атентатот на лидерот на Хезболах, Саид Хасан Насралах, не се огласил од минатонеделните напади на Бејрут, изјавија денеска двајца високи ирански безбедносни функционери.

Еден од официјалните лица изјави дека Каани бил во јужните предградија на Бејрут за време на нападот кој наводно бил насочен кон високиот функционер на Хезболах Хашем Сафиедин, но не се сретнал со него.

Сафиедин се смета за веројатен наследник на Насралах, кој беше убиен во израелски напад на 27 септември.

Ирански официјален претставник изјави дека Иран и Хезболах не успеале да стапат во контакт со Каани, шефот на странското воено разузнавање на иранската револуционерна гарда или силите Кудс. Соединетите Држави го убиле неговиот претходник Касем Сулејмани во напад со беспилотно летало во Багдад во 2020 година.

Силите Кудс, прекуокеанскиот огранок на Иранската револуционерна гарда, ги надгледуваат односите со милитантните сојузници на Техеран низ Блискиот Исток, како што е Хезболах.

Командантот на иранската револуционерна гарда, бригадниот генерал Абас Нилфорушан, беше убиен заедно со Насрала во неговиот бункер кога израелски бомби го погодија на 27 септември.

Регион

Земјотреси со јачина од 4,4 степени регистрирани во близина на Атина и на Крит

Засега нема информации за повредени или причинета материјална штета.

Два земјотреси со јачина од 4,4 степени според Рихтер, на две различни локации, едниот во близина на Атина, другиот во морскиот дел југоисточно од Крит, беа регистрирани рано утрово, јави дописничката на МИА од Атина.

Според податоците од Геодинамичкиот институт на Националната опсерваторија, земјотресот во близина на Крит беше кусо пред 9 часот по локално време, а вториот, 23 минути подоцна со епицентар четири километри југозападно од градот Тива, во близина на Атина, што беше почувствуван и во грчката метропола.

Засега нема информации за повредени или причинета материјална штета.

Фудбал

Погба може да ја продолжи кариерата во САД или Саудиска Арабија

 Фудбалерот од средниот ред на Јувентус, Пол Погба, може да ја продолжи кариерата во Саудиска Арабија или САД, пренесува инсајдерот Николо Шира.

Неколку клубови од овие земји веќе покажале интерес за 31-годишниот Французин.

На 4 октомври Судот за спортска арбитража (CAS) го намалил периодот на дисквалификација на Погба поради кршење на антидопинг правилата од 4 години на 18 месеци. Суспензијата на играчот ќе важи до март 2025 година.

На 5 октомври беше објавено дека Јувентус ќе го раскине договорот со Погба.

притисни ентер