Факт е дека по два месеца до три месеци онколошки пациенти немаа терапија, но сега состојбата е подобена и сите лекови за болните од рак се достапни, потврди Министерот за здравство Фатмир Меџити кој, повторно посочи дека македонското здравство е во лоша кондиција. Иако немам магично стапче за преку ноќ да го сменам здравствениот систем, работиме да нема реприза на дефицит на лек за тешко болни од канцер, кажа Меџити.
Во меѓувреме, онколошки пациенти што се плашат јавно да говорат и сакаат да останат анонимни за Канал 5 потврдуваат дека веќе два месеци немаат проблеми со недостаток на лекови, сепак посочуваат дека се соочуваат со проблеми секогаш кога одат на Клиника Дел од нив за една терапија која се прима четириесет минути чекаат најмалку четири часа. Тука уште во седум наутро има редица од стотина луѓе што земаат бројче и на нозе стојат со часови бидејќи столче за сите нема, објаснува пациентка од внатрешноста.
Центрите во повеќе градови долго време не функционираат, па поголем број на граѓаните од другите градови се принудени да си најдат превоз, плаќаат од 1500 до 4.000 денари за да стигнат до тука и да се вратат дома, а цел ден го минуваат на скопската Клиника. Немаат замерки за вработените, но велат од ден на ден се зголемува бројот на пациенти, а сите имаат право на лек за живот за кој не треба да чекаат.