Нетанјаху: Со гадење ја отфрлам споредбата меѓу демократски Израел и убијците на Хамас

Апсурдно и нов облик на антисемитизам, вака израелскиот премиер Бенјамин Нетанјаху го оцени барањето на главниот обвинител на Меѓународниот кривичен суд во Хаг за апсење на израелскиот премиер и неговиот министер за одбрана.

Апсурдно и нов облик на антисемитизам, вака израелскиот премиер Бенјамин Нетанјаху го оцени барањето на главниот обвинител на Меѓународниот кривичен суд во Хаг за апсење на израелскиот премиер и неговиот министер за одбрана, Јоав Галант за наводни воени злосторства против човештвото во појасот Газа. Натанјаху порача дека не постои меѓународен притисок што може да им ги врзе рацете да се борат против оние кои сакаат уништување на Израел.

-Како премиер, со гадење ја отфрлам споредбата на хашкиот обвинител меѓу демократски Израел и убијците на Хамас. Toa e комплетно искривување на реалноста. Со каква дрскост го споредувате Хамас кој убиваше, палеше, масакрираше, силуваше и ги киднапираше нашите браќа и сестри, со израелските војници кои водат праведна војна. , вели Бенјамин Нетанјаху, премиер на Израел.

Освен за израелските челници, обвинителот Карим Кан побара налози за апсење и за лидерската тројка на Хамас, Јахја Синвар, Мухамед Деиф и Исмаил Ханија. Барање на обвинителот, кој го сомничи Нетанјаху за убиства, прогон, предизвикување глад и истребување во Газа, ги подели западните сојузници. За Франција и Белгија барањето е оправдано и евентуалните злосторства треба да бидат кривично гонети. За САД, Германија и Италија неприфатливо е радикалното движење и израелската влада да се стават во ист кош. Бајден одлуката ја нарече срамна.

-Дозволете ми да бидам јасен, ја отфрламе апликацијата на МКС за налози за апсење на израелските лидери. Што и да имплицираат овие налози, не постои еквивалентност меѓу Израел и Хамас. Она што се случува (во појасот Газа) не е геноцид. , изјави Џо Бајден, претседател на САД.

Дали ќе има потерници по петтемина лидери на Израел и на Хамас ќе треба да одлучи предистражниот совет на Меѓународниот суд, откако ќе ги испита доказите на обвинителот. Доколку бидат прифатени, налогот за апсење, конкретно за Нетанјаху повеќе би имал симболичен ефект. На пример Израел и САД досега не го признале овој суд, па оттука премиерот не може да биде уапсен на израелска територија, но може да биде приведен ако е во посета на земја членка на судот, кој досега го признале 123 светски држави.

Собранието гo избра составот на Буџетскиот совет на Собранието

 Собранието на денешната петта седница ги избра составите на Буџетскиот совет на Собранието и на Советот на Собранискиот канал.

За претседател на Буџетскиот совет на Собранието на Република Северна Македонија е избран Антонијо Милошоски, потпретседател на Собранието, а за заменик-претседател Сања Лукаревска, претседател на Комисијата за финансирање и буџет. Членови на Буџетскиот совет се избраа пратениците - Бојан Стојаноски, Ели Панова, Игор Здравковски, Лидија Петковска, Халил Снопче, Фатмир Битиќи, Ељми Азири, Илир Хасани и Борислав Крмов.

За претседател на Советот на Собранискиот канал е избран Јован Митревски, актуелен потпретседател на Собранието. За членови на Советот на Собранискиот канал се избраа пратениците - Ели Панова, Марија Митева, Благица Ласовска, Санарда Имери-Стафаи, Аднан Азизи, Бобан Карапејовски, Горан Мисовски, Даниела Николова, Дијана Тоска и Илир Демири. За заменици-членови на Советот на Собранискиот канал се избраа пратениците - Љупчо Пренџов, Тони Јаревски, Драгана Арсова, Имрлије Салиу-Фетаи, Садик Сулејмани, Даниела Белимова, Митко Белимова, Митко Трајчулески, Бисера Костадиновска Стојчевска, Рина Ајдари и Сали Мурати.

Во рамки на денешната пленарна седница беше потврдена оставката на Сеат Личина поднесена на 23 април 2024 година од функцијата член на Регулаторната комисија за домување. Исто така, на оваа седница беше констатиран престанок на мандатот на Валентина Димовска од функцијата на Државниот совет за превенција на детско претстапништво заради исполнување на условите за старосна пензија.

Ијан Меккелен паднал од театарска сцена и се повредил

Сер Ијан Меккелен, последниве десетлетија познат по улогите во „Господарот на прстените“ и „Икс-мен“, паднал од сцена за време на театарска претстава во Лондон.

Британскиот глумец наводно се сопнал од реквизитите и потоа почнал да вика од болка, пишува „Дејли мејл“.

„Помогнете ми, моите раце...“ - повторувал Меккелен (85) во театарот „Ноел Кауард“, каде што глумел во „Кралски игри“ (Player Kings). Лекарите од публиката му пришле на помош, а набрзо пристигнала и брзата помош којашто го пренела глумецот в болница. Публиката беше изведена надвор од театарот со известување дека претставата е откажана. Од театарот потоа соопштија дека Меккелен се чувствува добро и се очекува брзо закрепнување, но додадоа дека, „за да му се даде време за одмор“, следната претстава што требаше да се одржи - е откажана.

- Сите беа преплашени кога тоа се случи, поради неговата возраст се плашевме дека тоа може да биде смртоносно за него, изјави еден посетител.

Инаку, претставата „Кралски игри“, со приказна сместена во Англија во раниот 15. век, игра во истиот театар до јули, а потоа треба да гостува низ театрите ширум Велика Британија. /МИА

Почина Стојан Андов

 На 89 годишна возраст почина Стојан Андов, првиот претседател на Собранието на самостојна Република Македонија.

Роден е 1935 година во Кавадарци, Република Македонија. Дипломирал на Економскиот факултет во Скопје, а магистрирал на Белградскиот универзитет.

Бил потпретседател на Републичкиот извршен совет, член на македонската делегација во Соборот на републиките и покраините и член на федералната влада во три мандати, каде се забележува неговата улога на преговарач во контактите на поранешна Југославија со експертите на ЕЕЗ (1971-1987).

Бил амбасадор на поранешна Југославија во Ирак (1987-1991 година).

Основач е на Либералната партија на Македонија и како нејзин претседател ја водеше Либералната партија до спојувањето со поранешната ДП 1997 година, кога стана претседател на Советот на новоформираниот политички субјект. По обновувањето на Либералната партија на Македонија, беше избран за член на нејзиниот Извршен комитет.

Избиран е за потпретседател на Либералната интернационала.

На првите повеќепартиски избори 1990 година, беше избран за пратеник во Собранието на Република Македонија и стана претседател на Собранието во јануари 1991 година.

На вторите повеќепартиски избори 1994 година, повторно беше избран за пратеник во Собранието на Република Македонија и за претседател на Собранието - должност што ја извршуваше до март 1996 година.

Беше избран за пратеник во Собранието на Република Македонија и на изборите во 1998 година.

Беше кандидат за претседател на Република Македонија на претседателските избори 1999 година.

На 30 ноември 2000 година повторно беше избран за претседател на Собранието на Република Македонија, функција што ја извршуваше до октомври 2002.

притисни ентер