Владиката Наум за БГНЕС: Најприродно е БПЦ да биде наша „мајка-Црква“

Голема лага е дека Вселенскиот Патријарх веднаш ќе го прекине евхаристичкото сослужување со БПЦ, доколку БПЦ влезе во евхаристичко сослужување со Македонската православна црква-Охридска архиепископија (МПЦ-ОА), пишува струмичкиот митрополит Наум во анализата објавена во бугарската агенција БГНЕС.
Митрополитот Наум во својата куса анализа  ја објаснува врската меѓу БПЦ и МПЦ-ОА, на само еден ден пред БПЦ да го разгледува писмото од МПЦ и барањето таа да стане нејзина мајка-Црква.

- Барањето на МПЦ да ја прифати БПЦ како „мајка Црква“, како услов за признавање на автокефалноста на МПЦ-ОА, е барање кое со години наназад го слушаме од некои бугарски архиереи. Ова барање МПЦ го смета за нормално, логично и потребно, затоа што некоја Црква и така мора да се јави како „мајка Црква“, која ќе не извлече од изолацијата што ни е наметната од СПЦ и која, потоа ќе не заштитува, застапува и претставува пред Вселенскиот Патријарх и останатите православни цркви; а најприродно тоа може да биде само БПЦ. „Мајка Црква“ не е толку заедничко за минатото, колку што е заедничка за иднината во Богочовекот Христос. „Мајка Црква“ е љубов, истакнува владиката Наум.

Во анализата тој објаснува дека од моментот кога БПЦ ја признава автокефалноста на МПЦ-ОА, двете Цркви стануваат „сестрински Цркви“, што значи дека ќе бидат рамноправни, но улогата на БПЦ како „мајка Црква“ тука не престанува во однос на другите православни цркви – БПЦ и натаму ја има честа, пред Бог, да не заштитува, застапува и претставува пред Вселенскиот Патријарх и останатите православни цркви се додека МПЦ не го добие „томосот за автокефалност“ од Вселенскиот Патријарх.

- Некои луѓе од Бугарија велат: „Што ќе ни се две цркви кога и од двете страни на границата живее ист народ?“ И да е така, само ќе ги потсетиме дека грчкиот народ, иако е еден, има пет цркви: Александриската, Ерусалимската, Кипарската, Грчката и Вселенската патријаршија, појаснува владиката Наум.
МПЦ-ОА, како што стои во анализата е канонски независна, слободна и црква која не е под ничија канонска јурисдикција, а својата самостојност МПЦ-ОА ја добива со Одлуката на СПЦ од 1959 година.

Според него воспоставување на евхаристичката заедница меѓу БПЦ и МПЦ-ОА е природна последица дури и на „Договорот за пријателство и соработка меѓу Бугарија и Македонија“ и е во согласност со евроатлантските интеграциски процеси кон кои се стреми Македонија со помош на Бугарија.
Митрополитот Наум смета дека се голема лага тврдењата дека Вселенскиот Патријарх веднаш ќе го прекине евхаристичкото сослужување со БПЦ, доколку БПЦ влезе во евхаристичко сослужување со МПЦ-ОА. Вселенскиот Патријарх, како што пишува, е свет човек и добро се грижи за единството на Црквата и нејзините отворени рани. Според владиката Наум, Вселенскиот патријарх попрво би се ангажирал околу смирување на евентуалните црковни недоразбирања отколку да заземе страна.

- Во светот на глобализацијата, повеќе е веројатно дека ќе не молат да влеземе во единство со православните цркви, или дури и ќе не натераат сосила, отколку и понатаму да бидеме изолирани. Во случај на брзо решавање на спорот што Грција го има со нашето име сигурно ќе се реши и статусот на МПЦ, а БПЦ дури тогаш ќе сфати што, пред Бог, пропуштила, пишува владиката струмички Наум во анализата за БГНЕС.


Средба Пендаровски-Поповски: И Претседателот ќе ја користи алатката за службени трошоци

Претседателот Стево Пендаровски се сретна со министерот без ресор задолжен за комуникации, отчетност и транспарентност, Роберт Поповски.

На средбата министерот Поповски го запознал Претседателот Пендаровски со заложбите на владата за целосна транспарентност и отчетност, презентирајќи му ја алатката за јавно објавување на службени трошоци на носителите на јавни функции.

Претседателот Пендаровски ја потврдил неговата определба за транспарентно и отворено работење и ја прифатил поканата Претседателот и неговиот кабинет да ја користат алатката, веднаш штом се создадат технички услови за тоа..

Двајца повредени во сообраќајка под Плетвар

Двајца се полесно повредени при сообраќајната несреќа што се случила претпладнето на патот Градско-Прилеп, на 20-ина километри под превојот Плетвар. 

Повредените се префрлени во прилепската градска болница на испитување и на лекување.

Според првичните информации од службата за итна медицинска помош од Прилеп, која била повикана да интервенира во 9.50 часот, сообраќајната несреќа била помеѓу камион и автомобил. Повредените не се во животна опасност.

Јовески: Нема законски и други пречки Интерпол да објави потерница по Груевски

 Верувам дека нема законски или било какви други пречки потерницата за поранешниот премиер Никола Груевски да не биде објавена на листата на Интерпол, изјави денеска јавниот обвинител  Љубомир Јовески.

– Во скоро време ќе се реши таа состојба. За тоа е задолжена обвинителката Вилма Русковска, како напредува во тој дел мене не ми е познато, но верувам дека нема законски или било какви пречки потерницата да не биде објавена на листата на Интерпол, изјави Јовески, одговарајќи на новинарско прашање до каде е постапката за потерницата по Груевски.

Во однос на тоа дали до крајот на мај ќе има обвинение или не, Јовески, рече дека не може во оваа фаза да се говори за тоа и дека не сака ништо да прејудицира.

– Во овој момент може да се говори дека истражната постапка е при крај и откако ќе заврши истражната постапка ќе се знае каква одлука ќе донесе Јавното обвинителство. Дали ќе поднесе обвинение или ќе донесе друг вид на јавно обвинителска одлука. Не сакам да се прејудицираат работите во овој момент, едноставно може да се каже дека таа постапка се приведува при крај и врз основа на резултатите од постапката јавниот обвинител ќе донесе соодветна одлука која ќе ја заснова на резултатите од пред истражната постапка, изјави Јовески по потпишувањето на меморандумот за соработка меѓу Академијата за судии и обвинители, ЈОРМ и ОБСЕ/ОДИХР. 

притисни ентер