„Скопско лето“ почнува со концерт на музичари од Израел

Со концерт на Дадо Дганит, позната пејачка и член на Националниот театар на Израел „Хабима“, вечер од 20.30 часот во Македонската филхармонија ќе биде отворен фестивалот „Скопско лето“.

Дирекцијата за култура и уметност-Скопје го организира нејзиното гостување со поддршка од Амбасадата на Израел во Македонија, а со  со концертот ќе бидат одбележани 70 години независност на Израел. 

Дадо Дганит, која на сцената ќе биде придружена со четворица инструменталисти, на своите концерти им дава нов живот на старите ладино мелодии и разновидната еврејска музичка култура ја модернизира збогатувајќи ја со ориентален ритам и звуци на клезмер - музичка традиција на Евреите Ашкенази во Источна Европа. 

Има објавено шест албуми, често е на турнеи низ светот и настапува на светски музички фестивали и на повеќе јазици - хебрејски, француски, шпански, арапаски, како и на ладино - јазикот на сефардските Евреи. 

Во вториот дел од вечерашниот концерт ќе настапи и водечката флејтистка во Израел, Хефциба Зер Авив, која свири на повеќе од 20 видови флејта и претставува уникатен и спектакуларен мозаик од израелски и медитерански егзотичен стил свирење на овој инструмент. 

Има издадено четири албуми, настапила во познати музички центри, меѓу кои и во „Карнеги хол“ во Њујорк во 2012 година со рецитал за флејта. Во 2016-та го отворила концертот на „Дип Парпл“. 

По вечерашното отворање, „Скопско лето 2018“ ќе продолжи со програмските содржини кои традиционално траат до 31 јули. Во 40-те фестивалски дена најавени се околу 50 настани - театарски претстави, концерти од различни жанрови, програми за деца, десетина изложби со домашни и со ликовни уметници од странство, промоции на книги, а од 12 јули во Сули ан ќе ја има и редовната филмска содржина „Кафе кино“. Фестивалот ќе се одржува на 20-ина локации во главниот град. 

Фестивалот е поддржан од  Град Скопје, Министерството за култура и од странски културни центри и амбасади. Директорот на ДКУС Никола Глигоров на прес-конференција рече дека се задоволни што „Скопско лето“ опстојува 39 години на културната мапа на Скопје, но и на државата, и дека со своите атрактивни и квалитетни содржини успева да го задржи вниманието на публиката. 

Градоначалникот на Љубљана во посета на Скопје

Премиерот Зоран Заев и скопскиот градоначалник Петре Шилегов денеска се сретнаа со градоначалникот на Љубљана, Зоран Јанковиќ, кој од вчера е во посета на Скопје.

- На средбата е изразена поддршка на Македонија во нејзините аспирации за евроатлантска интеграција, како најдобра гаранција за мирот и економскиот просперитет на земјата и регионот, соопшти владината прес-служба. 

На средбата, стои во соопштението, Јанковиќ на премиерот Заев му честитал за договорот со Грција за решавање на долгогодишниот спор и стратешко партнерство, посакувајќи му успешен референдум во интерес на граѓаните на Македонија и нивниот просперитет, истакнувајќи ги како придобивки од членството во Европската унија и НАТО. 

Јанковиќ, на кого ова му е трет мандат како градоначалник изразил подготвеност и поддршка за споделување на позитивните искуства во иницијативите и проектите за развој на инфраструктурата, како и унапредување на соработката во трговската размена, туризмот и претставување на културните вредности. 

- Премиерот Заев, го истакна задоволството од долгогодишното пријателство кое Македонија и Словенија ги поврзува, повторувајќи дека концептот на едно општество за сите и регионална соработка со сите соседни земји е единствена алтернатива за нашата татковина и претставува гаранција за успешни економски реформи и развој во интерес на сите граѓани, соопштуваат од македонската Влада. 

Како што информираа од Кабинетот на градоначалникот на Скопје, Шилегов и Јанковиќ разговарале за досегашната и идна соработка на двата града кои се збратимени во 2007 година. Продлабочувањето на соработката ќе се однесува пред се во сферите на урбаниот развој на градовите, управувањето со отпад, користењето на ЕУ фондовите, соработката на повеќе европски проекти, како и на соработката на советите на двата града.

Шилегов го запознал Јанковиќ за поголемите капитални проекти кои град Скопје планира да ги реализира во наредниов период, како што се изградбата на подземниот тунел под Кале и модернизацијата на возниот парк на јавниот превоз во Скопје со еколошки возила.

Шилегов и Јанковиќ заедно се прошетаа низ Старата чаршија, една од најпознатите знаменитости на градот Скопје. /МИА

Се бара и бенифициран стаж и за градежните работници

Покрај доуредување на бенефицираниот стаж за рударите,  бенефиции да добијат и градежните работници од потешките струки во градежништвото, побараа од независниот синдикат на градежни работници.

Ја поздравија владината одлука за бенефициран стаж за рударските работници и апелираа, таа што поскоро да стапи на сила.

Уапсен помошникот на Макрон кој тепаше демонстрант

Помошникот на францускиот претседател, Емануел Макрон, задолжен за безбедност, кој тепаше демонстрант, е уапсен и се наоѓа на испитување.

Според неименуван судски претставник, александар бенала го испитуваат по точки на потенцијално обвинение.

Меѓу точките на обвинение се насилство предизвикано во група од страна на лице кое е ангажирано во јавна служба.

Макрон вчера беше критикуван зошто го задржал Бенала на работа, кој добил само казна – суспензија на две недели.

Опозициските лидери и дел од јавноста го критикуваа макрон бидејќи сметаат дека казната за вакво однесување е преблага, откако на социјалните мрежи беше објавена видеоснимка од протестот на кој се гледа како бенала влече една жена, а потоа тепа млад демонстрант на земјата.

притисни ентер