Продолжува расправата за вториот нацрт-амандман на Уставот

 Комисијата за уставни прашања ја продолжи расправата за нацрт уставните амандмани, во рамки на втората фаза од постапката за менување на Уставот на Република Македонија.

 Таа вчера го усвои Првиот нацрт-амандман за промена на Уставот со десет гласови „за" и пет проти, со кој се предлага замена на зборот Република Македонија со Република Северна Македонија секаде во Уставот освен во член 36 каде има историски аспект, а ја започна и расправата за вториот нацрт амандман со кој во Преамбулата на Уставот одлуките на АСНОМ се заменуваат со Прогласот од АСНОМ и се додава Охридскиот рамковен договор. И на вториот ден опозицијата и власта останаа на спротивни ставови.

Опозицијата повторно обвини дека целиот процес за промена на името и Уставот се одвивал нетранспарентно и без консензус и оти не е испочитувана волјата на народот искажана на референдумот. Предложија со нацрт-амандман да се обезбеди заштита на сето она што значи менување на уставно име.

На ова реплицираше заменик министерот за надворешни работи Андреј Жерновски кој ги отфрли обвинувањата дека процесот бил нетранспарентен и оти не била консултирана опозицијата. Посочи дека биле одрзани шест тет-а-тет средби за да се објасни целиот процес.

За вториот Нацрт-амандман со кој во Преамбулата на Уставот одлуките на АСНОМ се заменуваат со прогласот од АСНОМ и се додава Охридскиот рамковен диговор. Опозицијата обвини дека со овој амандман и измените што се прават во Преамбулата се бришат деветте одлуки на АСНОМ, од кои, како што рекоа,  четири имаат државотворно значење. Заменувањето на одлуките со Прогласот, рече не смее да се прави, бидејќи Прогласот е само известување до граѓаните за донесените одлуки. Вметнувањето на Рамковниот договор, според пратениците од опозицијата, е дополнително проблематично и тоа отвора можности за федерализација и бинационална држава. Со ставањето на Рамковниот договор во Преамбулата, се отвора можност да се прогласи албанскиот јазик за службен на целата територија на државата.

На ова реплицираше Жерновски, кој истакна дека тоа е апсолутна невистина и груба измама на граѓаните на Република Македонија.

-Да се каже дека одлуките од Прогласот се бришат е ноторна невистина. Напротив она што го кажуваме и што премиерот го потенцира она што ние го правиме и правните решенија за кои зборуваме од Прогласот дополнително се потенцираат и зајакнуваат, рече Жерновски.

Седницата на собраниската Комисија за уставни прашања може да трае 12 дена, а пленарната седница веќе е закажана за 1 декември. Нацрт амандманите се утврдуваат со просто мнозинство или 61 глас по што треба да се организира јавна расправа чие времетраење го утврдува Парламентот. По ова, Владата ги изготвува предлог-амандманите и повторно ги доставува до Собранието кое треба да ги донесе со двотретинско мнозинство или за нив ќе треба да гласаат најмалку 80 пратеници. За амандманот на Преамбулата на Уставот освен двотретинско, потребно е и Бадентерово мнозинство. 

На 19 октомври Собранието со 80 гласови „за" ја донесе одлуката за пристапување кон уставни измени, согласно договорот од Преспа. За потребата за уставни измени гласаа и осуммина пратеници од опозициската ВМРО-ДПМНЕ.

Следната недела Договорот од Преспа ќе биде ратификуван во грчкиот Парламент

Договорот од Преспа ќе биде ставен на гласање во грчкиот парламент кон крајот на следната недела, соопшти денеска претседателот на собранието, Никос Вуцис. 

Според него, спогодбата прво ќе мине во надлежните собраниски комисии, по што како што изјавил за новинарите, ќе кулминира со дебата на пленарна седница. Дотогаш, Владата на Ципрас планира да ги информира граѓаните за содржината на документот. Веќе почна печатењето на десетици илјади копии од Договорот, кој во недела ќе биде објавен во изданијата на неколку грчки весници.

-Главниот фокус на грчката влада е да ги убеди пратениците, но и јавноста во однос на терминот националност, дека националноста се однесува исклучиво на државјанството. Втората работа е да укаже дека овој договор ќе биде одржлив, вели Константинос Филис, професор по меѓународно право

Во меѓувреме, лидерот на опозицијата Мицотакис го отфрли барањето на Ципрас за ТВ дуел со единствена тема Преспански договор и побара соочување на избори.

-Имаме предлог за него: нека распише сега, веднаш избори и на предизборните дебати, граѓаните ќе донесат свои заклучоци. Тогаш, Парламентот што ќе произлезе од изборите со одлука на граѓаните, да одлучи за ратификација или отфрлање на Договорот од Преспа, се вели во соопштението на Нова демократија.

Ципрас во моментов има 149 сигурни гласа, но бројката сосема извесно ќе порасне, откако центристичката Река соопшти дека ќе застане зад документот. Со нејзините пет пратеника, мнозинството би можело да достигне и 156. Во недела во Атина во 14 часот е најавен голем протест против Договорот од Преспа.

Скопјани со децении живееле во близина на неексплодирана бомба

Скопјани со години живееле во близина на авионска бомба тешка дури 250 килограми. 

Експлозивната направа за која од дирекцијата за заштита и спасување велат дека е најголемата до сега откриена во скопскиот регион е од Втората светска војна. Таа била откопана за време на градежни работи во центарот на Скопје кај старата железничка станица а потоа била транспортирана до стариот пат кон скопско Батинци, каде се врши дотурот на земја и истурена со останатиот материјал.

Материјалот кој се исфрла на стариот пат кон селото Батинци редовно се пребарува за старо железо од граѓаните близина, кои велат дека не знаеле за што станува збор кога прв пат ја здогледале експлозивната направа.

Според нивното сведоштво, откако неколку пати  ја силно ја удирале за да ја отворат, еден од постарите жители на селото забележал дека станува збор за експлозивна направа и веднаш ја алармирал МВР. Операцијата за нејзино отстранување траеше повеќе од еден час, заради непристапноста на самиот терен и дотурот на земја кој се врши на тоа место. За нејзиното отстранување, се направи и посебен пат, а бомбата со полициска придружба потоа се упати кон воениот полигон Криволак, каде се очекува да биде детонирана. Бомбата се верува дека е од бомбардирање на Скопје во втората светска војна кое се случило на 6 април 1941 година. Во таа прилика биле бомбардирани сите поголеми градови на тогашното Кралство Југославија, а особено настрадал патната и железничкиот сообраќај.

Затворени пазарите во Скопје - Министерството за економија ненадлежно за новиот Закон

Затворени портите на Зелен пазар и Битпазар. Закупците на тезги утринава, ставија клуч на вратите и наместо на своите работни места, се преселија пред Собранието. 

Самоиницијативно, го кренаа гласот против новиот закон за зелени пазари. За нив тој е дискриминирачки. Велат, лиценци нема да вадат.

Гласот, против го кренаа и тезгаџиите од кумановскиот пазар. И тие како своите колеги велат дека вадењето лиценци им претставува дополнителен трошок и удар врз џебот.

Но, имаше и такви кои си работеа нормално. Тезгаџиите од Буњаковец како и другите помали скопски пазари, не протестираа.

Од министерството за економија велат дека тие не се надлежни да го менуваат законот. Единствено може да интервенираат во подзаконските акти.  

Според новиот закон за зелени пазари, секој закупец на тезга треба да поседува лиценца која чини 60 евра годишно, а за секоја дополнителна тезга, тезгаџиите треба да платат дополнителни 40 евра. Пензионерите, социјалците, стечајците и хонорарците, нема да можат да работат.

притисни ентер