Шефот на дипломатијата на оваа земја Жан Аселборн, во интервју за МИА вели дека е вчудоневиден од одлуката на унгарските власти да дадат азил, на како што вели – деликвент.
Во интервјуто Аселборн наведува и дека земјите членки на унијата немаат правна можност да го отворат прашањето за азилот на Груевски, но можат политички да го осудат тој чин.
„Мислам дека е неверојатно што поранешниот премиер на Македонија кој е осуден на две години затвор доби меѓународна заштита во Унгарија, земја која си ги „штити" границите од 2015 од бегалци. Еден деликвент да добие заштита во земја на ЕУ, кога оние кои бегаат од војни не ја добиваат е запрепастувачки“ – изјави Жан Аселборн, министер за надворешни работи на Луксембург.
Унгарските медиуми вчера објавија видео на кое екс премиерот може да се забележи во ресторан во Будимпешта, од каде замина со приватен автомобил, а претходно на социјалните мрежи се рашири и фотографија од Груевски во придружба на партиски функционер.
Лидерот на опозициската ВМРО-ДПМНЕ Христијан Мицкоски вели дека нема сознанија дали некој од партијата се сретнал со Груевски, ниту пак му била позната логистика на почесниот претседател на ВМРО-ДПМНЕ.
Еден месец откако побегна, од ОЈО најавија дека за две недели ќе ги имаат првичните информации за бегството и за начинот на кој Груевски, ја напуштил државата. Во меѓувреме пак од министерството за правда, се уште го чекаат одговорот од барањето за екстрадиција на поранешниот премиер.