Пендаровски – Маас: Потврдена силната поддршка од Германија за европската интеграција на Република Северна Македонија

Претседателот на Република Северна Македонија, Стево Пендаровски, во рамки на официјалната посета на Сојузна Република Германија, денеска се сретна со германскиот министер за надворешни работи Хајко Маас.

На средбата, како што соопшти Кабинетот на Пендаровски, биле разменети мислења за севкупните билатерални односи меѓу Република Северна Македонија и Сојузна Република Германија, при што било констатирано дека двете земји имаат изградено односи на пријателство, исполнети со доверба и взаемно почитување.

Претседателот Пендаровски оценил дека Сојузна Република Германија е клучен политички партнер и најголем трговски партнер на Република Северна Македонија, држава која постојано дава поддршка за нашите аспирации за членство во Европската Унија и во НАТО. Претседателот Пендаровски изразил задоволство за ратификацијата на Протоколот за пристапување на Република Северна Македонија во НАТО во германскиот Бундестаг.

Пендаровски и министерот Маас размениле мислења за последните случувања поврзани со европската интеграција на Република Северна Македонија. Претседателот Пендаровски посочил дека Република Северна Македонија во изминатиот период вложи многу напори во исполнување на европските критериуми и истакнал дека ќе продолжи реализацијата на реформската агенда. Во таа насока, претседателот Пендаровски го реафирмирал очекувањето за одредување на датум за почеток на пристапните преговори со Европската Унија. /МИА

Поставен штанд со апарати за поврат на ДДВ во населба Тафталиџе

Управата за јавни приходи денеска постави штанд со апарати за поврат на ДДВ кај супер маркетот „Веро 2", во населбата Тафталиџе.

 На штандот граѓаните ќе може да скенираат фискални сметки, а екипите на терен ќе им помагаат на оние кои не знаат или немаат можност да ја користат апликацијата „Мој ДДВ" за поврат на 15 отсто од платениот ДДВ. Проектот има за цел да го регулира бизнисот и да ги намали скриените трансакции.

Градоначалникот на Општина Центар Саша Богдановиќ ги повика граѓаните што повеќе да ја користат апликацијата, бидејќи со неа, како што рече тој, имаме двојни придобивки.

Од УЈП информираат дека заклучно со 17 јули 2019 година, скенирани се 3.541.016 фискални сметки, остварен е промет од 1.846, 261.806 денари, додека повратот од 15 отсто од пресметаниот ДДВ изнесува 29.767.379 денари.

Управата за јавни приходи за поддршка во процесот во своите 36 подрачни единици низ земјавa ќе отвори информативни штандови: киоск апарати, бар код читачи и паметни телефони преку кои ќе може на лице место да се регистрира фискалната сметка./МИА

Повредени 33 мигранти, се превртело комбето во кое се превезувале

Триесет и три мигранти се повредени во сообраќајна несреќа што попладнево се случи на патот Демир Капија-Прилеп.

Сообраќајката се случила на местото викано Прждески споменик, на потегот меѓу Демир Капија и Прилеп, соопшти Јавното обвинителство.

Според првичните информации, возачот, 24-годишен велешанец, ги превезувал мигрантите во комбе марка „мерцедес" со скопски регистарски ознаки во сопственост на лице од Арачиново. Движејќи се на автопат од Гевгелија во правец кон Скопје, возачот забележал дека е следен од полициски службеници. Во обид да побегне, тој се префрлил на совозачкото седиште, ја отворил вратата и скокнал на автопатот додека возилото се движело. По инерција комбето продолжило да се движи следните 40 метри, а потоа се превртило и паднало во провалија со длабочина од 14 метри. Во несреќата со повреди се здобиле сите 33 патници мигранти, меѓу кои неколкумина се малолетници. Повредените, од кои дел со особено тешки повреди,  се пренесени со медицински екипи во најблиските здравствени установи во Неготино и Кавадарци.

Возачот, како што наведуваат во соопштението, кој откако скокнал од возилото паднал во провалија се здобил со тешки телесни повреди и поради нивната сериозност е пренесен на скопските клиники.

Јавен обвинител од Основното јавно обвинителство Кавадарци во континуитет ги презема потребните дејствија за целосно расчистување на настанот.​

Јавен обвинител и екипа на МВР вршат увид на местото на несреќата.

Хирурогот Дано Кулев од кавадаречката болница за МИА потврди дека во болницата се донесени девет лица.

-Осум мигранти се во кавадаречката болница со скршеници набиеници и други повреди од кои двајца се потешко повредени, потврдува хирург од хируршко одделение доктор Дано Кулев./МИА

Преминот Стрезимир-Рестилица од утре до 20 август отворен за минување

Граничниот премин Стреизмир-Рестилица на македонско-косовската граница, од утре па до 20 август ќе биде пуштен во употреба за граѓаните од двете земји, информираа од локалната власт на општина Маврово и Ростуше.

Преминот ќе биде отворен секој ден од 08:00 до 22:00 часот, а за преминување ќе важат истите правила како и на другите гранични премини, односно патна исправа (пасош или лична карта и зелен картон за автомобил).

-Овој граничен премин ќе биде многу значаен за развојот на туризмот на општините од двете држави како и за меѓусебното поврзување на жителите од општините Маврово и Ростуше, Центар Жупа и Дебар со жителите на општините Рестелица, Драгаш и Призрен, наведуваат од Општината.

Искажуваат голема благодарност до сите кои придонесле за отворање на овој граничен премин, за кој постои голема надеж дека во иднина ќе биде функционален преку цела година.

Со залагање на градоначалникот на општина Маврово и Ростуше, Медат Куртовски, преминот што подолг период воопшто не функционираше, беше отворен минатата година од 18 до 20 август. Тогаш беше ветено дека како општина ќе продолжат со активно лобирање за постојано функционирање на овој граничен премин.

Преминот Стрезимир-Рестилица , како привремен официјално профункционира во август 2003 година и се користеше од март до октомври од 7 до 19 часот. Друштвата на Македонците од подрачјето на Гора по неколку години побара преминот да има постојан граничен режим, што значи отворен да биде 24 часа и да може да минува секој. Тие во барањето наведоа дека во отворањето на преминот од Гора гледаат надеж за економска соработка и нивен опстанок таму.

Преку овој премин, кој се наоѓа на планината Кораб, на тромеѓето меѓу Македонија-Албанија и Косово, можеа да минуваат само жителите од пограниниот појас од 25 километри и тоа со посебни дозволи.

Во областа Гора на Косово распослани се 18 села, населени со Македонци со муслиманска вероисповест, познати како Горани./МИА

притисни ентер