Интервју со Анита Гаговска од Центар за подобрување на квалитетот на живот на лицата со попреченост и нивните фамилии „Порака нова“

НЛБ Банка како дел од регионална Групација која оперира на 6 различни пазари во рамки на регионот на Југоисточна Европа (Словенија, Босна и Херцеговина, Црна Гора, Косово, Северна Македонија и Србија), веќе четврта година по ред го реализира проектот „Рамка за помош“. Станува збор за иницијатива која има за цел да ги помогне и промовира иновативните проекти кои го подобруваат и збогатуваат нашето општество и овој пат решаваат предизвици како што се на пример: прекумерна употреба на дигитални технологии кај младите луѓе, врсничко насилство, кршење на човековите права, родова еднаквост, сиромаштија, како и предизвици поврзани со деменција и други болести на стареењето на населението.

Веќе четврта година НЛБ Банка успева да одржи континуитет во рамки на еден цел регион. Нивната порака е дека единствено заедно можеме да се справиме со клучните предизвици со кои се соочуваме во општеството, односно дека секој треба да соработува и активно да придонесе за решенија.

Во рамките на „Рамка за помош“, оваа година се даде одлична можност на оние кои работат за доброто на луѓето, односно беа избрани 10 финалисти од нашата земја, но и на секој поединечен пазар каде што работи НЛБ Групацијата, а секој од нив ќе биде награден со финансиска и комуникациска поддршка.

Потоа, регионалната комисија ќе избере 3 победници на проектот, од 60- те финалисти од Словенија, Босна и Херцеговина, Црна Гора, Косово, Македонија и Србија. Добитниците ќе бидат објавени на 9-ти мај 2024-та година во Љубљана, а ќе добијат значајна финансиска поддршка која ќе им овозможи полесно да ја реализираат својата визија и да почнат да ги менуваат општеството и светот на подобро.

Во продолжение, разговараме со Мартина Дурљанова, Викторија Волаг и Мартин Ангелов од Центар за подобрување на квалитетот на живот на лицата со попреченост и нивните фамилии „Порака нова“

Ситуацијата во Македонија е алармантна кога станува збор за познавањето на знаковниот јазик. На околу 6000 регистрирани лица со оштетен слух, само 35 сертифицирани толкувачи на знаковен јазик ги задоволуваат нивните потреби. Овој поразителен недостаток се одразува на секојдневниот живот на глувите лица, кои се соочуваат со значителни пречки во пристапот до информации и услуги. Проектот „Знак за инклузијата: Подигање на свеста за подобрување на комуникацијата со глувите лица" има за цел да ја подигне свеста за комуникацијата со глувите лица и значењето на знаковниот јазик, преку обучување на лица за знаковен јазик.

Идејата за проектот е од глуво лице кое ги сподели своите секојдневните препреки со помош на толкувач.

Зошто е меѓу избраните?

Проектот е посветен кон подобрување на животите на глувите лица. Пристапот овозможува учење на знаковен јазик, создава инклузивна заедница која активно ги вклучува и поддржува глувите лица. Дополнително овозможува подигање на свеста за значењето на знаковниот јазик што придонесува кон културата на инклузија и разбирање и прифаќање.