Македонија

Мицкоски до Ахмети:Наместо да завршиш како идеолог,во политичка пензија ќе одиш како криминалец

„Победата е на дофат. И таа победа е создадена од сите надежи на луѓето кои не гласаа во првиот круг на изборите, и е последица на сите страдања и понижувања кои ги донесе оваа власт“.

„Победата е на дофат. И таа победа е создадена од сите надежи на луѓето кои не гласаа во првиот круг на изборите, и е последица на сите страдања и понижувања кои ги донесе оваа власт“, истакна претседателот на ВМРО-ДПМНЕ, Христијан Мицкоски од митингот во Ѓорче Петров.

Мицкоски додаде дека народот е определен дека сака промени, а убедливата разлика од над 180 илјади гласови е гаранција дека народот сака подобро, сака подобар живот, подобра економија, сака да си ја врати контролата над сопствената држава.

„И навистина гледам дека пораките од првиот круг од изборите власта не ги сфаќа. Ним народот им е виновен, наместо да погледнат во сопствениот двор“, рече тој.

„Тие од СДСМ не разбираат дека партијата, а потоа и цела власт во државата му ја подарија на Али Ахмети, Артан Груби, Бујар Османи и Талат Џафери. Овие луѓе пак од партијата ДУИ направија трговско друштво за криминал и тендери. Стотини души распоредени на позиции управуваат со цела Македонија, злоупотребувајќи ги страдањата и надежите на целиот народ, нивните судбини, нивните проблеми кои ги создаваат, нивната мака. ДУИ стана мафијашка структура, наместо како тие што сакаат да се претстават европска партија. Иако устите им се полни со Европа, нема ништо посмешно и потрагично во исто време кога Артан или Бујар зборат за европски фронт“, појасни Мицкоски.

Мицкоски укажа дека тешко на Македонија ако СДСМ и ДУИ се европската иднина како што лажно се преставуваат. Нема полоша услуга и за ЕУ кога ДУИ на Артан, Бујар и Талат збори за европски вредности. Сигурно од таму се молат овие луѓе да не зборат за принципи и европски вредности.

„А од СДСМ не знаат дека Али е човек кој седи на повеќе столици истовремено. Во исто време кога СДСМ ги теши за поразот, ми праќа мене емисари за договор. И кога ова јавно го кажувам, вели дека во политиката влегол како востаник и дека замислете што вели Али Ахмети дека тој направил коалиција таква каква што направил со помалите етнички заедници затоа што ВМРО-ДПМНЕ помалите етнички заедници ги гледал со презир. Од овде од Ѓорче сакам да му порачам неколку работи, прво точно е дека на маката и надежта на нашите сограѓани Албанци и измамата од 2001 почна како востаник кој што се претвори во блискоисточен шеик кој што сега со крадените пари ужива во своите хациенди во Зајас. Тоа е точно. Точно е дека голобради момчиња, дел од неговата фамилија во меѓувреме додека тој кажува дека бил голем востаник, купуваат трговски центри за десетици милиони евра во центарот на Скопје. Исто така е точно, додека тој себеси се опишува во својата лична епопеја и романтична приказна како востаник, членови на неговото семејство возат ролс ројс, мерцедеси, мајбах, ренџ ровер џипови, имаат возен парк од неколку милиони евра. Се е тоа точно, дека тој се обидува повторно да тргува со гласовите на Албанците во Македонија. И додека тој ги убедува Албанците во Македонија дека е востаник, си врват бизнисите, си врват тендерите, милионите, и еврата завршуваат во џебот и на конто во семејството. Вистина е тоа Али Ахмети, дека ти си востаник ама сега во овие 23 години постепено но сигурно се претвори во ништо повеќе од обичен криминалец. И наместо да завршиш како идеолог, во политичка пензија ќе одиш како обичен криминалец кој што ќе го паметат и Албанците, и Македонците, и Турците, и Ромите, и Србите, и Бошњаците, итн.“, нагласи Мицкоски.

Мицкоски порача дека црвениот картон на СДСМ и ДУИ мора да се даде масовно на 8-ми мај со огромна излезност на изборите, се наведува во партиското соопштение.

Свет

На Фицо ќе му биде извршена уште една операција, атентаторот се соочува со доживотен затвор

По петте испукани куршуми, од кои најмалку два завршиле во телото на Роберт Фицо, словачкиот премиер е во стабилна, но се уште сериозна состојба.

Со повреди во стомакот и едната рака, останува на одделението за интензивна нега во болницата во Банска Бистрица.

-Операцијата траеше пет часа, на која беа вклучени два тима доктори. Хируршки и трауматолошки, пациентот има повеќе прострелни рани, чии последици ќе влијаат на неговото заздравување. , изјави Мириам Лапуникова, докторка во болницата.

Полицијата јавно не го соопштува ниту мотивот, ниту идентитетот на атентаторот, иако медиумите веќе го прогласија 71-годишниот словачки писател Јурај Цинтула за извршител. Проструи и наводна видео снимка од неговото сослушување во полициска станица, на која тој признава дека нападот е политички мотивиран.

-Не се согласувам со политиката на владата. Масовните медиуми се ликвидираат, зошто се напаѓа РТВС, зошто Мажак е сменет? , изјави Јурај Цинтула, наводно осомничен за атентатот.

Словачките власти алармираат да се смират политичките страсти. Миниситерот за внатрешни дури алармираше дека земјата е на праг на граѓанска војна, за што обвини дел медиумите и социјалните мрежи за ширење говор на омраза. Новоизбраниот претседател повика на разум.

-Како иден претседател, згрозен сум од степенот на омраза поради различно политичко мислење. Не смееме да одговараме на омраза со повеќе омраза, инаку ова зло никогаш нема да престане. Петер Пелегрини, новоизбран претседател на Словачка.

На удар на јавноста се најде и обезбедувањето на Фицо. Дел од експертите во Словачка избројаа неколку клучни грешки - од тоа дека бодигардите делувале некоординирано и никој од нив не скокнал да го заштити со што дозволиле напаѓачот да испука дури пет куршуми од непосредна близина. Ова уште повеќе што и самиот Фицо пред еден месец алармираше дека можеби ќе биде мета на напад.

-На улица грубо се навредуваат владините политичари, а јас само чекам оваа фрустрација, која толку интензивно ја продлабочуваат Деник Н, „Сме“ и „Актуалити“, да се претвори во убиство на еден од водечките владини политичари. Не претерувам ниту за милиметар. , изјави тогаш Роберт Фицо, премиер на Словачка (10 април).

Ова е и прв напад врз политички лидер во модерната историја на Словачка и во последните две децении во Европа. Последен пат жртва на атентат беше беше екс српкиот премиер Зоран Ѓинѓиќ во 2003-тата.

Македонија

Палевски наскоро ќе го даде првиот исказ пред обвинител

Откако синоќа беше екстрадиран од Турција и директно од скопскиот аеродром со полициска придружба пренесен во затворот во Шутка наскоро се очекува Љупчо Палевски-Палчо да го даде првиот исказ пред обвинител.

Откако синоќа беше екстрадиран од Турција и директно од скопскиот аеродром со полициска придружба пренесен во затворот во Шутка наскоро се очекува Љупчо Палевски-Палчо да го даде првиот исказ пред обвинител за убиствата на 14 годишната Вања Ѓорчевска и 74 годишниот Панче Жежовски. Палевски од ноќеска го издржува претходно определениот 30 дневен притвор. Сместен е во посебна просторија, кон која се доаѓа од посебен ходник каде нема никаков контакт со останатите притворени. Поради безбедносен ризик за него важат посебни протоколи од начинот на негово обезбедување со едни исти лица, до крилото каде се наоѓа, но и неговата исхрана. Како што информираше директорот на затворот Филип Андов при приемот Палевски не се пожалил на здравјето, а за него биле извршени редовни прегледи кои се прават како за сите притвореници.

„И за отворање на вратата, кога треба да му се отвори вратата точно се пишува време , кога е отворена и зошто и кога се затвора, се носи во посебна бања и се шета на посебно место. Ограничена е и храната, со детална проверка и сите други параметри каде што притвореното лице има право по куќниот ред да ги исполнува. Нема никаков контакт со останатите тука затворската полиција е ограничена каде што едни исти лица ќе бидат задолжени за него во постапката која секојдневно ќе ја извршува,“- Филип Андов – Директор на истражниот затвор Скопје.

Истрагата за двојното убиство за кое Палевски е првоосомничен, а која беше отворена во декември, е во завршна фаза, информираат од обвинителството, но во интерес на истражните дејствија од таму не споделуваат повеќе детали.

- „ Во однос на ова лице, јавниот обвинител презема истражни дејствија на прибавување и анализа на докази кои во оваа фаза на постапката не можат да бидат споделени со јавноста.“ – ОЈО Скопје.

За грозоморните убиства наскоро се очекува да биде поднесено и обвинение, а осомничените да седнат на обвинителна клупа во судница. Палевски се терети за две тешки кривични дела: „грабнување„ и „ убиство на свиреп начин„. Тој откако беше идентификуван како главен организатор на двете убиства кои ја шокираа јавноста во земјава, но и во регионот, избега од Македонија во Србија, па оттаму преку Бугарија во турскиот град Баликесир, каде и беше уапсен во декември минатата година и во екстрадициски притвор остана речиси пет месеци. Покрај Палевски, за двојното убиство осомничени се и Велибор Манев, Влатко Кешишов и Боре Видевски. Осомничен за помагање е и таткото на убиената Вања, Александар Ѓорчевски, кој по неколку месеци поминати во затворот во Шутка од неодамна се наоѓа во куќен притвор по одлуката на Врховен да му ја уважи жалбата.

Македонија

Управен суд ќе одлучува по тужбата на коалицијата “ВРЕДИ“

Управниот суд попладнево ќе одржи седница на која ќе одлучува по тужбата на Коалицијата Вреди против одлуката на Државната изборна комисија да го отфрли приговорот за гласањето во Долна Бањица гостиварско.

Засега во Управниот суд е пристигната само една тужба од коалицијата вреди а тужби против одлуките за дел од прифатените приговори на Државната изборна комисија најавија и од коалицијата Европски фронт предводен од ДУИ.

Во зависност од одлуките по тужбите кои ќе ги донесе Управниот суд и од тоа дали евентуалното прегласување на тие избирачки места би влијаело на распределбата на пратеничките мандати, комисијата ќе донесе конечна одлука за прегласување.

притисни ентер