Македонија

Николоски: Во првите 100 дена од владата на ВМРО-ДПМНЕ ќе го смениме Законот за тутун

Зборувавме со земјоделците и она што е најголема грижа, секако е главниот извор на егзистенција на жителите на општина Конче, а тоа е производството на тутун.

Зборувавме за маките на тутунарите, за тоа како е потценет нивниот труд, како цените за откуп не се тие кои што би требало да бидат, како се касни со исплатата, како се касни со субвенциите и како се помалце се произведува, рече од митингот во општина Конче, потпретседателот и носител на листата за пратеници во четвртата изборна единица, Александар Николоски.

Истакна дека тоа е жалната слика за македонското земјоделие каде што се помалку се произведува, за што се свесни и самите земјоделци и дека производството за тутун скоро за половина е намалено, што е трагично за државата имајќи предвид дека се работи за една стратешка гранка, гранка која што носи егзистенција на десетици илјади жители на Македонија.

„Во таа насока, една од првите работи кои што ќе ја направиме е усвојување на измените на Законот за тутун, со кој што ќе се забрани увоз на тутун во Македонија со цел да се откупи целокупниот домашен тутун, по пристојни цени и да се произведува повеќе од она што се произведува до сега. Ние како пратеници, два пати тој закон го поднесувавме во Собранието, но за жал немавме мнозинство за да го изгласаме, пратениците на СДСМ и на ДУИ овој закон не го гласаа од чисто бизнис интереси, затоа што главен увозник на тутун во моментов во Македонија е братот на министерот за земјоделие, Љупчо Николоски“, рече Николоски.

Така што, посочи дека од чисто лични бизнис интереси, досегашното парламентарно мнозинство предводено од СДСМ и ДУИ не го поддржаа тој закон, но затоа пак ВМРО-ДПМНЕ измените на Законот за тутун ќе ги донесе во првите 100 дена од формирањето на новата влада предводена од ВМРО-ДПМНЕ.

„Но, ние апсолутно, планираме тој закон да го изгласаме уште во првите 100 дена после формирањето на Влада, предводена од ВМРО-ДПМНЕ со цел вашиот труд биде почитуван, да можете да заработувате добра и да можете чесно да живеете тука“, истакна Николоски, се наведува во партиското сопштение.

Свет

Нетанјаху: Со гадење ја отфрлам споредбата меѓу демократски Израел и убијците на Хамас

Апсурдно и нов облик на антисемитизам, вака израелскиот премиер Бенјамин Нетанјаху го оцени барањето на главниот обвинител на Меѓународниот кривичен суд во Хаг за апсење на израелскиот премиер и неговиот министер за одбрана.

Апсурдно и нов облик на антисемитизам, вака израелскиот премиер Бенјамин Нетанјаху го оцени барањето на главниот обвинител на Меѓународниот кривичен суд во Хаг за апсење на израелскиот премиер и неговиот министер за одбрана, Јоав Галант за наводни воени злосторства против човештвото во појасот Газа. Натанјаху порача дека не постои меѓународен притисок што може да им ги врзе рацете да се борат против оние кои сакаат уништување на Израел.

-Како премиер, со гадење ја отфрлам споредбата на хашкиот обвинител меѓу демократски Израел и убијците на Хамас. Toa e комплетно искривување на реалноста. Со каква дрскост го споредувате Хамас кој убиваше, палеше, масакрираше, силуваше и ги киднапираше нашите браќа и сестри, со израелските војници кои водат праведна војна. , вели Бенјамин Нетанјаху, премиер на Израел.

Освен за израелските челници, обвинителот Карим Кан побара налози за апсење и за лидерската тројка на Хамас, Јахја Синвар, Мухамед Деиф и Исмаил Ханија. Барање на обвинителот, кој го сомничи Нетанјаху за убиства, прогон, предизвикување глад и истребување во Газа, ги подели западните сојузници. За Франција и Белгија барањето е оправдано и евентуалните злосторства треба да бидат кривично гонети. За САД, Германија и Италија неприфатливо е радикалното движење и израелската влада да се стават во ист кош. Бајден одлуката ја нарече срамна.

-Дозволете ми да бидам јасен, ја отфрламе апликацијата на МКС за налози за апсење на израелските лидери. Што и да имплицираат овие налози, не постои еквивалентност меѓу Израел и Хамас. Она што се случува (во појасот Газа) не е геноцид. , изјави Џо Бајден, претседател на САД.

Дали ќе има потерници по петтемина лидери на Израел и на Хамас ќе треба да одлучи предистражниот совет на Меѓународниот суд, откако ќе ги испита доказите на обвинителот. Доколку бидат прифатени, налогот за апсење, конкретно за Нетанјаху повеќе би имал симболичен ефект. На пример Израел и САД досега не го признале овој суд, па оттука премиерот не може да биде уапсен на израелска територија, но може да биде приведен ако е во посета на земја членка на судот, кој досега го признале 123 светски држави.

Македонија

ССМ ја објави минималната синдикална кошничка за мај- 60 090 денари се потребни за да се помине

Втор месец по ред, минималната синдикална кошничка ја надминува психолошката граница од 60 000 денари.

Иако споредбено со месец април, во мај таа се намалила и тоа за само 122 денари, сепак на едно четири члено семејство за да го преживее месецот му се потребни 60 090 денари. А со изнајмен стан од 60 квадрати, пак на едно семејство месечно трошоците му се зголемуваат за околу 15 илјади денари.

Според пресметките на ССМ намалување на трошоците во мај граѓаните имале кај: хигиенските материјали, транспортот, храната и пијалаците - кои за еден месец според пресметките се намалени за 511 денари. Минимално зголемување на цените има кај трошоците за комуникации, здравје, образование. А исти останале трошиците за вода, струја, греење.

Дел од граѓаните кои ги анектиравме велат се е поскапено, но мора да се преживее, секое пазарење велат е се поскромно. Некој пак сметаат дека ваквите пресметки не се добри и со нив само се созадава паника.

„Какви и да се мора да јадеме. Дигаат паника малце, помалце е... иначе мора да се јаде...“

„Многу тешко многу тешко, јас и сопругот сме пензионери не се малку ама тешко...Еве на пазар бев сега, вчера шатлиџанот беше 80 денес е 70 ако тоа нешто значи, друго нема овошјето е доста скапо.“

„Мали пензии, високи цени.... и стално има покачување, по 5 по 10 денари...

„Тешко за преживување. Нема се да земеме, еве влеговме, не можеме се да земем, нешто земавме, нешто само погледнавме и тоа.. “

Од јануари до сега минималната синдикална кошничка е зголемена за речиси 50 евра. Дел од основните прехрамбени производи откако беше укината мерката замрзнати цени нагло скокнаа.

Изминатиов месец, граѓаните се пожалија и на високи цени на овошјето и зеленчукот, а од пекарската индустрија ја анализираат состојбата на Блискиот Исток и војната во Украина, како причини кои би можеле да влијаат и на цената лебот.

Регион

Маринакис: Во никој случај нема да ги ратификуваме меморандумите

Портпаролот на грчката влада Павлос Маринакис и во најновото интервју за Тв Скај, упатил критики до Сириза за одлуката да ги донесе меморандумите од Преспанскиот договор во Парламентот.

Тој го повторил ставот дека владата е против носењето на овие меморандуми.