Македонија

Страотна сообраќајка во Влае, преполовен шевролет, тешко повредена скопјанка и уште две лица

32 годишна жена е тешко повредена а уште две лица поминале со телесни повреди во синоќешната страотна сообраќајка во близина на мостот Влајко во Скопје..

Во стабилна состојба е 32-годишната жена која беше тешко повредена во страшната сообраќајна незгода, која се случи во близина на мостот Влајко во населбата Влае.

Според извори на Канал 5, жената била хоспитализирана на Клиниката за дигестивна хирургија и по повеќечасовна операција и била извршена спленектомија.

На местото на несреќата, утринава се уште можеа да се видат остатоци од оштетените возила, кои по неколку часа од сообраќајката беа отстранети од булеварот Партизански одреди.

„Непочитувањето на сообраќајните знаци и возењето со прекумерна брзина се едни од најчестите причини за тешките сообраќајни несреќи во Македонија.“

Според МВР, несреќата се случила околу 2.25 минути по полноќ на крстосницата од булеварот Партизански одреди и улицата „Ангел Динев“. Истрагата е уште е во тек .. до сударот дошло откако моќното ауди, удрило во шевролетот, во момент кога возилото се приклучувало на булеварот. 27 годишниот возач на аудито од Сарај и неговиот 32-годишен совозач од селото Љубин се здобиле со полесни повреди, констатирани во билницата „8 Септември“ и градската болница „Св. Наум Охридски“ по што и двајцата биле пуштени на домашно лекување.

Граѓаните велат, дека луѓето се помалку ги почитуваат сообраќајните правила и сметаат дека со почести полициски контроли, може да се стави во ред, како што велат, беснеењето по булеварите.

Од почетокот на месецов, ова е трета тешка сообраќајка на македонските патишта. Во несреќа на патот Радовиш-Штип загинаа две лица, а пред два дена на експресниот пат Штип-Кочани загина 39-годишен скопјанец, а неговата сопруга и двете деца биле повредени.

Регион

Ален на средба со Курти: Косово припаѓа во ЕУ и НАТО, да се спроведат договорите со Србија

Претходно, американската дипломатка се сретна и со претседателката Вјоса Османи.

Американската државна потсекретарка за јавна дипломатија Елизабет Ален, која престојува во Косово, по средбата со претседателката на државата, Вјоса Османи, беше примена и од косовскиот премиер, Албин Курти, со кого вели дека имала „длабока дискусија“, јави дописникот на МИА од Приштина.

Ален на платформата „Икс“, поранешен Твитер, покрај фотографии од средбата со Курти, напиша дека „Косово припаѓа во ЕУ и НАТО“, а го повтори и барањето на Вашингтон за спроведување на договорите со Србија.

„Ја ценам длабоката дискусија со косовскиот премиер Албин Курти. Косово припаѓа во ЕУ и НАТО. Ние бараме целосна имплементација на сите договори што Косово и Србија ги постигнаа во рамките на Дијалогот олеснет од ЕУ“, напиша Ален.

Претходно, американската дипломатка се сретна и со претседателката Вјоса Османи, со која потпиша договор за разбирање меѓу владите на Соединетите Американски Држави и Република Косово, против манипулациите со информации од други држави.

На заедничката прес-конференција по потпишувањето на договорот, Ален рече дека со Османи разговарале и за „критичните прашања на евроатлантскиот пат на Косово“, оценувајќи дека „суштинскиот чекор кон евроатлантскиот пат на Косово (е) напредокот на Косово во врска со формирањето на Заедницата на општини со српско мнозинство“. /МИА

Свет

Руската нафтена рафинерија во Краснодар привремено ја прекина работата по украинските напади

Руската нафтена рафинерија „Славјанск“ во јужниот дел на областа Краснодар денеска привремено ја прекина работата по синоќешниот напад на украински беспилотни летала, јавија руските медиуми.

Според извештаите на локалните власти, шест украински беспилотни летала паднале на територијата на рафинеријата.

Дроновите со кои беше нападната рафинеријата во јужниот дел на Русија не предизвикаа пожари, додаваат медиумите, повикувајќи се на властите.

Рафинеријата има капацитет од четири милиони тони нафта годишно, што е околу еден милион барели дневно./МИА

Македонија

Стабилна состојба на работникот, кој се здоби со тешки повреди во лифт

Стабилна е состојбата на 56 годишниот маж кој вчера попладне се здоби со тешки телесни повреди во лифтот во угостителски објект во Штип.

Надлежните во Клиничка болница- Штип информираат дека е примен со скршеници на пршлените и е хоспитализиран на oдделението за ортопедија во штипската Клинничка болница. Неговиот колега, 71 годишниот пензиониран кувар им подлегна на повредите добиени при пад на лифтот, во кој биле работно ангажирани.

Во меѓувреме директорката на Државниот инспектор за труд, Весна Томовска за МИА изјави дека на лице место вчера е излезен трудов инспектор. Утврдено е дека двајцата работници не биле вработени, туку работно ангажирани во објектот. Починатиот бил кувар во пензија.

Посочува дека утре до инспекторатот треба да биде доставена документацијата за безбедност при работа во објектот. Од Обвинителството пак информираат дека се обезбедуваат докази за расчистуваање на настанот, а стручно лице ќе направи техничко вештачење на лифтот. Како дошло до трагедијата се уште нема официјални информации. Телото на починатото лице е дадено на обдукција.