Култура

„Гола месечина“ - фестивал на комедии во Аеродром

„Хамлет во пикантен сос“ во режија на Александра Карделевска, во продукција на Театар Комедија, вечер кај Паркот на езерата во Аеродром ќе го отвори фестивалот „Гола месечина“.

Фестивалот, кој лани почна како манифестација „Аеродром се смее“, а годинава доби меѓународен карактер, го организираат Театар Комедија и Општина Аеродром со поддршка на Министерството за култура. Изведбите се од 21 часот на отворено, а влезот е слободен.

До крајот на месецов ќе бидат изведени уште четири домашни претстави: „Сомнително лице“ на режисерот Синиша Евтимов и МНТ, „Без паника“ во режија на Благој Мицевски и Битолски театар, „Подземна комедија“ во режија на Деан Дамјановски и театарот „Антон Панов“-Струмица, и „Солунски патрдии“ во режија на Коле Ангеловски во продукција на Драмскиот театар.

Гостуваат две претстави - „Хамлет во Долна Мрдуша“ режирана од познатиот босански актер Мустафа Надаревиќ, во продукција на Народно позориште од Тузла, и „Пукна срам“ од белградска приватна продукција - дуо-драма во која учествува македонската пејачка Тијана Дапчевиќ.

Во чест на наградените, на 30 јуни ќе биде изведена премиера на „Многу врева за ништо“ од Шекспир во режија на Дејан Пројковски, во продукција на Театар Комедија.

Седумте претстави-комедии ќе се натпреваруваат за четири награди (за режија, машка улога, женска улога и гран-при за претстава), за кои ќе одлучува тричлено жири: актерот Петре Темелковски (претседател), режисерката Александра Карделевска и композиторот Оливер Јосифовски (членови). Наградите се парични, а од трката за нив е изземена претставата на организаторот - Театар Комедија.

„Гола месечина“ е еден од 20-те фестивали од драмската дејност поддржани во годишната програма на Министерството за култура, а еден од трите нови манифестации од театарската дејност кои годинава имаат прво издание.

Свет

Сијарто: Посетата на кинескиот претседател Си Џинпинг на Унгарија е од историско значење

Посетата на кинескиот претседател Си Џинпинг на Унгарија оваа недела е од историска важност и во голема мерка ќе придонесе за зајакнувањето на Унгарија.

Посетата на кинескиот претседател Си Џинпинг на Унгарија оваа недела е од историска важност и во голема мерка ќе придонесе за зајакнувањето на Унгарија, развојот на билатералните економски и трговски односи и се надеваме, за успех на мировните напори, изјави денеска унгарскиот министер за надворешни работи и трговија Петер Сијарто.

Одговарајќи на прашање на заедничката прес-конференција со неговиот ерменски колега Арарат Мирзојан, Сијарто рече дека Си Џинпинг, кој предводи голема делегација ќе посети само две земји-членки на ЕУ: Унгарија и Франција, пренесе МТИ.

Една од главните теми на разговорите меѓу претседателите на двете земји ќе биде натамошниот развој на билатералната економска соработка, рече Сијарто, наведувајќи дека Кина во Унгарија донела најмногу странски директни инвестиции во 2020 и 2023 година.

Свет

Италијанскиот министер ги повика западните земји да се ангажираат за преговори со Путин

Италијанскиот министер за одбрана Кросето ги повика западните земји да се ангажираат за преговори со Путин.

Италијанскиот министер за одбрана Гвидо Кросето денеска ги повика западните земји повеќе да се ангажираат за преговори со рускиот претседател Владимир Путин за дипломатско решение за ставање крај на војната во Украина.

Кросето за италијанскиот весник „Месаџеро“ изјави дека економските санкции што Западот ги воведе кон Русија не ги дале очекуваните резултати, односно не ги спречиле руските сили да продолжат со нападите врз Украина.

Тој истакна дека единствениот начин да се стави крај на војната во Украина е во преговорите да се вклучи Путин.

Тој, сепак, ја бранеше одлуката на Италија да продолжи да испраќа оружје во Украина, велејќи дека помошта за Киев има за цел „да се добие во време“ и да се создадат услови за постигнување примирје.

Кросето тврди дека, доколку руските војници го заземат Киев, тоа „неизбежно ќе доведе“ до конфликти со други земји кои, како што наведе, нема да прифатат руски тенкови на своите граници.

Италијанскиот министер рече дека лично го предупредил украинскиот претседател Володимир Зеленски дека украинската контраофанзива минатото лето е осудена на неуспех поради воената супериорност на Русија, но дека Зеленски не го послушал неговиот совет.

Фудбал

Тен Хаг: Никој во Манчестер јунајтед освен Мурињо не ги доби играчите што ги сакаше

Тренерот Ерик тен Хаг одговори на споредбата што ја направи Жозе Мурињо за нивната работа во Манчестер јунајтед.

- Освен Мурињо, ниту еден тренер не ги доби играчите што ги сакаше, што ни требаа. Уверен сум дека ќе ги постигнеме нашите цели, но конкуренцијата е голема. Има седум или осум екипи во Премиер лигата кои имаат многу добри состави и во иднина ќе се борат за титулата. Значи, за да ја освоите титулата, треба да создадете навистина квалитетен тим, рече главниот тренер на Манчестер Јунајтед во интервју за „ESPN“.

Претходно Жозе Мурињо правејќи споредба со Тен Хаг за работата во Манчестер јунајтед, рече дека ја немал поддршката што ја ужива Тен Хаг.

-Немав такво ниво на поддршка. Немав такво ниво на доверба. Во тимот имаше од претходно неколку играчи што не ги сакав пред, истакна Мурињо.

Португалскиот стручњак беше тренер на клубот од мај 2016 до декември 2018 година.

притисни ентер