„Google“ го затвори проектот, кој интерно беше познат како „Iris“ и беше лансиран за создавање очила за проширена реалност (augmented reality – AR), пренесува „Business Insider“.
Технолошкиот гигант работел на развојот на очилата веќе неколку години, но наводно го запрел развојот на „Iris“ по бројните отпуштања и реорганизација во компанијата во претходните месеци.
Друга важна причина што довела до оваа одлука на „Google“ е заминувањето на Клеј Бавор од компанијата, поранешниот шеф за „AR“ и „VR“.
Покрај тоа, „Google“ постојано ја менуваше својата стратегија за очилата „Iris“, што беше извор на фрустрација за членовите на тимот кои работеа на проектот.
Информациите, кои беа достапни во претходните години, сугерираат дека „Google“ би можел да го пушти овој уред со „AR“ во 2024 година. Очилата „Iris Ar“ требаше да изгледаат како пар класични очила.
Иако компанијата престана да работи на својот „AR“ хардвер, се посочува дека „Google“ не се откажува од своите „AR“ амбиции. Наместо хардвер, компанијата одлучи да се фокусира на создавање на екосистем „Android за AR“.
Планот на „Google“ е да го примени истиот бизнис модел што го користи за своите мобилни платформи и да го лиценцира својот софтвер за „AR“ на производителите.