Иако заинтересираните купувачи достигнаа понуда од седум милиони долари, таканаречениот „Супер мерцедес“ не е продаден затоа што не ја достигна најниската цена која ја постави сопственикот како лимит.

Речиси 80 години стариот кабриолет го заплени американската војска во Франција по завршувањето на Втората светска војна.

Автомобилот смени неколку сопственици и стигна до музејот во Лас Вегас, а американските медиуми веруваат дека во моментот е во сопственост на анонимен Русин, од 2009 година.

Овој автомобил бил специјална порачка на личниот шофер на Хитлер и офицер на озлогласената СС единица Ерик Кемпке.

Мерцедесот учествувал на неколку нацистички паради меѓу 1939 и 1941 година, а користен е при официјални посети на функционери.

За да биде фирерот заштитен во него, Мерцедесот е оклопен со арматура од двете страни и по подот.

Ветробранот е отпорен на куршуми, а зад седиштата се наоѓа мобилна оклопна плоча.

Моторот е 7,7-осумцилиндарски со 230 коњски сили, со петостепен мануелен менувач.

Моделот, кој аукциската куќа го опиша како конечен споменик на триумфот на сојузниците над злото, е еден од осумте произведени во претсеријата на моделот B150 од серијата 770K, од кои пет преживеаја, а три се во приватна сопственост, вклучително и овој.