Свет

Активистка на „Пуси Рајот“ во Русија е осудена на шест години затвор поради објави за Украина

Руски суд во отсуство ја осуди активистката на протестната уметничка група Пуси Рајот, Љушја Штајн на шест години затвор поради објавување антивладини објави на социјалните мрежи, соопшти денеска рускиот суд.

Штајн (27) била прогласена за виновна за ширење „воени фалсификати“ во врска со објавата на „Х“ во март 2022 година во која таа ги обвини руските војници за „бомбардирање на странски градови и убивање луѓе“, објави денеска рускиот независен портал „Медиазона“.

Најмалку 19.855 луѓе се приведени во Русија поради изразување антивладини ставови од почетокот на руската инвазија на Украина во февруари 2022 година, според ОВД-Инфо, група која ја следи репресијата на дисидентите.

Оние кои ќе бидат прогласени за виновни за ширење „лажни информации“ за руската војска може да добијат казна затвор до 10 години.

Судот во Москва одлучи дека Штајн, која беше заменик советник во Москва до 2022 година, ќе почне да ја отслужува казната кога ќе биде екстрадирана во Русија.

Штајн избегала од домашен притвор во Москва неколку недели по почетокот на војната во Украина.

Заедно со нејзината колешка од Пуси Рајот, Марија Аљохина, таа побегнала прво во Литванија, а потоа во Исланд, каде што добија државјанство во мај 2023 година.

Обвинителите побарале таа да биде осудена на осум и пол години затвор, објави АНСА.

Здравје

Одбележување на Европската недела на имунизација во Градски парк во Скопје

 Под мотото „Заштитуваме генерации“, со детските ликови „Биби и Боби“ и детска балетска претстава, денеска во  Градскиот парк во Скопје, на отворената сцена „Школка“, ќе биде одбележана Европската недела на имунизација.

На настанот организиран од Министерството за здравство, заедно со Институт за јавно здравје, СЗО и УНИЦЕФ, поддржани од УСАИД и ЕУ, обраќања ќе имаат евроамбасадорот Дејвид Гир, специјалната претставничка на СЗО д-р Ане Јохансен, претставничката на УНИЦЕФ д-р Патриција ди Џовани и претставник од Министерство за здравство.

- Заедно да ја подигнеме свесноста за важноста на имунизацијата, како значаен сегмент за градење колективен имунитет, спречување епидемии и обезбедување здрави поколенија, истакнуваат од Министерство за здравство.

Други спортови

Кикбоксерот Бобан Илиоски светски првак во ВАКО ПРО

 Најдобриот македонски кикбоксер Бобан Илиоски е нов светски професионален првак во кикбокс на ВАКО ПРО во дисциплината К1, до 88,6 кг, откако синоќа во борба за титулата го совлада Берк Дузенли од Турција.

Бодрен во СЦ „Јане Сандански“ од домашната публика и навивачката група „Комити“, Илиоски го совлада актуелниот аматерски светски првак со судиска одлука од 2-1.

Илиоски во ноември лани го освои златниот медал на Светското ВАКО првенство во категоријата лоу кик до 86 килограми и ја обедини светската и европската титула.

За своите успеси на меѓународната сцена Илиоски беше избран за спортист на Македонија во 2023 година.

Македонија

Свечена промоција на нови полициски службеници во Центарот за обука на МВР во Идризово

Свечена промоција на нови полициски службеници - генерација 2023-2024 година, ќе се одржи денеска во Центарот за обука на МВР во Идризово, со почеток во 11:00 часот.

На промоцијата обраќања ќе имаат премиерот на техничката Влада Талат Џафери, министерот за внатрешни работи Панче Тошковски, дополнителниот заменик-министер за внатрешни работи Митко Бојмацалиев и Сузе Трајковска, раководител на Центарот за обука на МВР.

Настанот ќе биде пренесуван и во живо на официјалната страница на Министерството за внатрешни работи.

притисни ентер