Текстот во угледниот Њујорк Тајмс фрла сосема ново светло за случајот и открива дека некој давал пари граѓанското изјаснување во Македонија да пропадне. Клучна фигура е Иван Савидис, сопственикот на ПАОК, кој го паметиме како вооружен со пиштол влета на фудбалски натпревар.
Според Хелен Купер и Ерик Шмит, авторите на статијата во Њујорк Тајмс, токму Савидис работел како руски канал за поткопување на договорот меѓу Македонија и Грција кој значи влез на земјата во НАТО. Савидис кажа дека ништо од ова не е вистина и се закани со тужби до авторите и медиумите кои ја објавија оваа статија.
Во текстот за прв пат се открива дека американците формирале таканаречено „Тело за борба против руското мешање во изборите во некои европски земји“ и токму луѓето кои таму работат, кон крајот пролетва забележале дека една од целите може да биде Македонија. Според објавеното, Стејт департментот, ЦИА, Европската команда на Пентагон со седиште во Штудгард, работеле на оваа проблематика.
Во меѓувреме, противниците на референдумот веќе почнале активно да работат, а во текот на летото во Македонија се појавиле стотици нови веб-страници, фејсбук и тивтер профили, преку кои се бараше бојкот на гласањето и се ширеле лажни вести за да се збунат граѓаните околу договорот со Грција. Преку следење на комуникациите и разговорите на Савидис, според Њујорк Тајмс, лесно се открило дека тој директно со 300 до 350 000 евра ги финасирал протестите во Македонија и поддржувчите на бојкотот се со цел, Преспанскиот договор да пропадне и Македонија да не влезе во НАТО, што секако е во прилог на Русија. Тогаш, непосредно по потпишувањето на преспанскиот договор премиерот Заев изјави дека навивачки групи од земјава биле финансирани да прават нереди...
Како и да е од повеќе страни, пред се од ЕУ, НАТО и САД континуирано пристигнуваа предупредувања дека има руско влијание врз процесите на македонското интегрирање во НАТО. Како резултат на ова двајца руски дипломати беа протерани од Грција, а дополнително на двајца други не им беше дозволен влез во земјата. На руско влијание во регионот предуперди и генералниот секретар на алијансата Столтенберг во пред референдумското интервју за Канал 5.
И првиот човек на Пентагон Матис, за време на неговиот лет до Скопје, на американските новинари им кажа дека сака да даде поддршка на договорот меѓу Македонија и Грција, бидејќи имало многу силно руско влијание тој да не успее, а земјата да остане надвор од НАТО Алијансата.