Каква била нејзината релација со осомничениот Боки 13 и со бизнисменот Орце Камчев. Зошто еден од нејзините телефони бил форматиран и дали им се заканувала на обвинителите и вработените во СЈО ? Таа треба да објасни и на кој начин ги водела преговорите со Камчев да стане соработник – сведок во нова предистрага која ја водело обвинителството, како што таа претходно тврдеше преку соопштение, во кое ја објасни причината за појавувањето на нејзиниот глас во бомбите на “Ла Верита”.

Според адвокатот и поранешен обвинител Александар Наков, специјалниот јавен обвинител не може преку телефон да прибира изјави од одредени лица, односно тој е надлежен сослушувањата да ги врши во просториите на јавното обвинителство.

- “ Последните случувања внатре и надвор од СЈО и случувањата кои ги перцепира јавноста ме доведуваат до личен заклучок дека републичкиот јавен обвинител требаше под итно да реагира да бара суспендирање на специјалната јавна обвинителка и нормално во процедура предвидена во закон да се бара нејзина смена пред Собранието, секако во согласност и по предлог на Советот на Јавните обвинители, бидејќи тоа не се случи сега сме во една непријатна ситуација како за Катица така и за нас јавноста, во една дилема со кое Јавното обвинителство е ставено вон игра во предметите пред судот, јавниот обвинител фактички ги губи овластувањата да ги застапува предметите пред судот, а со тоа и нејзините заменици. “

Наков вели дека темпото на водењето на истрагата е задоцнето и случајот треба што поскоро да се реши, за да не се зголемуваат сомнежите во јавноста.

-„Народот е мудар и паметен и сфаќа дека тоа се политички калкулации, лично се плашам дека мешањето во политиката во работата на правосудните органи, земајќи го во предвид и обвинителството и СЈО, нас не води до една институционална криза, но се плашам дека таквата криза може да помине и во политичка криза, да не дојде до судир на партиите“.

Последен за оваа афера во обвинителството сведочеше обвинителот од СЈО Бурим Рустеми, кој во изјава за медиумите рече дека меѓу другото Русковска го прашувала за поврзаноста на Рекет со истрагата за Поштенска Банка која тој ја води. Претходно сведочеа обвинителките Лиле Стефанова и Елизабета Јосифовска.