Ветровите на војната дуваат во нашиот свет, предупреди Папата во годишното обраќање пред илјадниците верници на плоштадот Свети Петар во Ватикан, ставајќи го фокусот на бранувањата на Блискиот Исток околу статусот на Ерусалим.

- Го гледаме Исус Христос во децата на Блискиот Исток, кои продолжуваат да страдаат поради тензиите меѓу Израелците и Палестинците. Да се помолиме за волјата за продолжување на дијалогот меѓу двете страни и конечно да се постигне решение, кое ќе донесе мирен соживот на двете држави, изјави Папа Франциск, поглавар на Римокатоличката црква
Папата синоќа одржа литургија во Базиликата Свети Петар, каде што се помоли за мигрантите, чие страдање го спореди со библиската приказна за страдањето на Марија и Јосиф на пат кон Витлеем. А, во Витлеем, и покрај политичките тензии, предизвикани по одлуката на Трамп за Ерусалим, празникот се одбележа и во колевката на Исус Христос, каде што доминираа политички пораки.

- Мојата порака е до сите оние кои имаат моќ да одлучуваат за нашата иднина. Денеска, повеќе од било кога, ни е потребен сериозен пристап од сите кои носат политички одлуки, вели Надбискуп Пјербатиста Пицабела, кустос на Светата земја

Американскиот претседател Доналд Трамп и неговата сопруга Меланија за Божиќ одговараа на телефонските повици на децата поврзани со Дедо Мраз. И на Балканот празнично, иако овој пат, барем во медиумите преовладаа зајадливите коментари за божикната елка во Белград, која официјално е прогласена за најскапа на светот и чини 83 илјади евра.

- Одвратна ми е. Зарем е можно толку пари да се дадат за една ваква бедна елка, вели жителка на Белград

- Шокирана сум, една елка толку да чини, а има луѓе кои гладуваат, туристка од Франција

Колку за споредба, според американските медиуми, раскошната елка лоцирана во центарот Рокфелер во Њујорк чини четири пати помалку.