Македонија

Ципрас и Мицотакис се скараа за Преспанскиот договор

Дали сега Преспанскиот договор ви е добар? Ова прашање поранешниот грчки премиер Алексис Ципрас директно му го постави на својот наследник Мицотакис на првиот ден парламентарна расправа за доверба на грчката влада.

Ципрас му забележа на Мицотакис дека кога бил во опозиција активно работел на рушење на компромисот меѓу двете земји, а сега според однесувањето на новиот грчки премиер и неговите, може да се заклучи дека тие комплетно го прифаќаат Преспанскиот договор. Одговорот на лидерот на Нова Демократија пак покажа дека Грција и дефинитивно ќе бара конструктивност и соработката меѓу Скопје и Атина, а од тоа ќе зависи и дали Грција во иднина ќе го забавува напредувањето на земјава кон ЕУ.

На Балканот, како што имаме кажано во неколку наврати, приоритет е да се ублажат негативните последици од спроведувањето на Договорот од Преспа. А главната точка овде е развојната програма за северна Грција, заштита на македонските производи и голема меѓународна кампања за нашата Македонија. И сакам, одново да пратам една порака во и вон Грција: од однесувањето и добрата соработка на нашите соседи ќе се оцени нивниот тек кон Европската унија, рече Мицотакис.

И премиерот Заев е свесен дека ќе мора да соработува со новиот грчки премиер. Тој во интервју за грчката телевизија АЛФА кое е направено три дена пред изборите на Грција вели дека Мицотакис е искусен политичар и сигурно ѝ мисли добро на својата земја, но и на своите соседи.

Ги имам следено внимателно ставовите на господинот Мицотакис, секако неговиот коментар дека договорот не е добар ни е познат. Договорот, веројатно ако гледаме низ призмата на двете земји можеби подеднакво не е добар или подеднакво е добар. Јас верувам дека сите заедно ќе гледаме напред, нема да се враќаме назад. Господинот Мицотакис е искусен политичар и сигурно ѝ мисли добро на својата земја и на своите соседи, па и на целиот балкански регион, вели Заев во интервјуто направено пред изборите во Грција и пред Мицотакис и официјално да стане премиер на земјата.

Во меѓувреме двете држави ги спроведуваат обврските кои произлегуваат од преспанскиот договор, но се уште не е најавено дали и кога ќе биде остварена првата средба меѓу Заев и Мицотакис.

Свет

Најмалку 23 загинати во Перу, кога автобус падна во бездна и пропадна во река (ВИДЕО)

Автобус падна во бездна и пропадна во река вчера вечерта на планините Анди во Перу, при што загинаа најмалку 23 лица, соопшти денеска регионалниот обвинител.

Несреќата се случила кога автобусот се движел кон градот Сорочуко, изјавила Олга Бобадила, а пренесува Ројтерс.

„Сè уште ги собираме сите информации. Несреќата се случила ноќе на прилично нерамен и неасфалтиран пат. Автобусот паднал во бездна во реката“, додаде таа. Локалните медиуми јавија дека автобусот тргнал од блискиот град Челендино.

Несреќите се релативно чести на небезбедните патишта во Перу. Во септември минатата година, дваесет лица загинаа во несреќа, а во јануари 2023 година, најмалку 24 загинаа кога автобус падна од карпа.

Свет

Дали Хамас ќе ја прифати дарежливата понуда на Израел?

Американскиот државен секретар Ентони Блинкен денеска во Ријад изјави дека се надева дека палестинското движење Хамас ќе ја прифати „исклучително дарежливата“ понуда за запирање на израелската офанзива во Појасот Газа.

„Хамас има понуда пред себе која е крајно, крајно дарежлива од израелска страна“, рече Блинкен на Светскиот економски форум, пренесува Тајмс оф Израел.

Тој нагласи дека Хамас мора брзо да донесе одлука за понудата.

„Се надевам дека ќе донесат правилна одлука“, рече Блинкен.

Делегација на Хамас денеска престојува во Каиро за да преговара за прекин на огнот во Газа.

Во саботата, висок функционер на Хамас, Калил ал-Хаја, рече дека групата го разгледува предлогот на Израел, но не даде детали.

Тој истакна дека понудата на Израел за примирје е одговор на предлогот на Хамас испратен пред две недели.

Светските медиуми објавија дека предлогот предвидува примирјето, доколку биде склучено, да биде претставено како „хуманитарен прекин на огнот“.

Хамас би ги ослободил заложниците во замена за неколкунеделен прекин на огнот и ослободување на палестинските затвореници во израелските затвори.

Разговорите се во застој за двете главни прашања, Хамас бара израелските трупи да се повлечат од Газа и да го прекинат конфликтот и детали за бројот и имињата на палестинските затвореници во израелските затвори.

Некои извештаи сугерираат дека Израел покажал подготвеност да направи дополнителни отстапки во иднина, вклучително и повлекување на силите кои го преполовија Појасот Газа и дозволувајќи им на жителите да се вратат на север.

Блинкен денеска отпатува за Саудиска Арабија, каде една од темите на разговор ќе биде војната меѓу Израел и Хамас и повоената иднина на Газа.

Шефот на американската дипломатија ќе разговара со саудиски претставници во Ријад, а ќе има средба и со министрите за надворешни работи на Советот за соработка на арапските држави од Персискиот залив.

Тој ќе се сретне со министрите на Саудиска Арабија, Египет, Јордан, Катар, Обединетите Арапски Емирати, како и со палестинската управа.

По Саудиска Арабија, Блинкен ќе ги посети Јордан и Израел.

Македонија

Тренчевска: До 2028 година 70% од децата ќе бидат вклучени во предучилишно воспитание

Ко-носителката на листата за пратеници, Јованка Тренчевска на изборната единица број 4 на СДСМ од вечерашната трибина во Неготино порача дека пораката која граѓаните ја испраќаат е примена.

Ко-носителката на листата за пратеници, Јованка Тренчевска на изборната единица број 4 на СДСМ од вечерашната трибина во Неготино порача дека пораката која граѓаните ја испраќаат е примена, но дека знае дека градењето на систем е многу поважно за граѓаните отколку само популистички мерки кои не оставаат долготрајни траги во подобрувањето на квалитетот на живот на граѓаните!

„Во 2016 година затекнавме детска заштита со опфат на деца во градинките од само 25%, куп лажни ветувања и сон за брза изградба на 100 градинки од нашите политички опоненти. Од 2017 година до денес, владата предводена од Социјал-демократскиот сојуз отвори 84 нови градинки и опфатот на деца го зголеми на 48%! Вие сте сведоци на нашето вложување во Неготино, во градинката „Фемо Кулаков“, објектот „Темјанушка“ каде инвестиравме и ги зголемивме капацитетите овозможувајќи детска заштита за дополнително 161 дете“ рече Тренчевска објаснувајќи ги заложбите на СДСМ за унапредување на детската заштита.

Таа посочи дека до 2028 година опфатот на деца во предучилишно воспитание и образование ќе се зголеми на 70% и дека патот кон исполнување на таа цел ќе се потврди со отворањето на 14 нови градинки во 2024 година!

Тренчевска истакна дека покрај влогот во најмладите СДСМ вложува и во највозрасните!

„Инвестираме во државни старски домови. Во поголеми пензии. Најниска пензија 20000, просечна 30000 денари. Поголеми плати. Минимална плата 36000 денари, просечна плата 67000 денари. Пoголеми права од социјална и детска заштита за 30%. Нови услуги за највозрасните достапни во сите 81 општина“ изјави Тренчевска.

На крај таа повика сите граѓани да ја заокружат опцијата со број 1 на изборите, затоа што нема друг начин Македонија да чекори напред, се наведува во партиското соопштение.