Со многу големо мнозинство (од 26 пратеници, 23 гласаа „за“ и 3 „против“), парламентарната комисија го даде своето одобрение, што служи како препорака за гласањето на 29 јануари, кога текстот со кој се уредува методот на раздвојување ќе биде доставен до сите европратеници.
Тоа ќе биде последната голема пресвртница што официјално ќе го потврди излегувањето на Велика Британија од ЕУ на 31 јануари, по повеќе од три години тешки преговори и вжештени дискусии.
„Избор е помеѓу уредениот и тврдиот Брегзит“, рече Гај Верхофштат, известувач за Брегзит, кој потсети на важноста за гласање во парламентот.
Огромното мнозинство на политички групи жалеа за заминувањето на Британците, освен пратениците од екстремната десница, кои го поздравија „големиот ден“ со одобрување.
„Не е време за славење, иако ја почитуваме суверената одлука на британскиот народ“, коментираше италијанскиот претседател на Комитетот, Антонио Тајани.
„Ќе работиме на нов договор меѓу ЕУ и Велика Британија од 1 февруари“, рече Тајани.
„Не е против Велика Британија, туку за европските граѓани“, објави Тајани, додавајќи дека сите институции на ЕУ ќе „работат на одбрана на интересите на европските граѓани“, објави италијанската агенција АНСА.
Вчера, британскиот парламент конечно го прифати договорот за излез од ЕУ. Кралицата Елизабета Втора денеска го потпиша законот, што му дава правна сила.
Официјалното излегување следи по преодниот период што ќе трае до крајот на годината. Во меѓувреме, Велика Британија ќе продолжи да ги применува правилата на ЕУ, но нема да учествува во заедничките одлуки.
Периодот на транзиција треба да овозможи безболен излез и двете страни да преговараат за идните односи, особено за трговскиот договор.