И по острите реакции од партиите и од јавноста дека тоа е невозможно, од неговата партија се убедени дека ќе успејат во намерата. Албанците не се рамноправни на институционално ниво и треба да се стави крај на етничкиот монопол на премиерската функција, тврди високиот функционер од ДУИ, Бујар Османи. Додава дека не се работи за предизборно додворување на гласачите.
- Ние денеска ги повикавме сите албански партии, особено на Албанците, да се обединиме за оваа идеја, бидејќи ова е надпартиско прашање со кое се руши последната бариера на неправда во оваа држава каде што се уште постои етнички монопол и предрасуда за функцијата премиер. – Бујар Османи – ДУИ
Османи вели дека досега сите амбициозни цели како партија ги оствариле, а меѓу нив ги вбројува министерските позиции, изборот на Талат Џафери за собраниски спикер и законот за јазици како последен приоритет за нив од Охридскиот рамковен договор.
- Сметаме дека сега е време да се избере првиот премиер Албанец, со што ќе има континуитет во успесите за рамноправност која се уште не е целосна во оваа држава, но имајќи ги предвид чекорите од претходно вклучувајќи ги прв министер за одбрана, прв министер за внатрешни работи, претседател на Врховен суд, народен правобранител, претседател на Собрание, сега е логичен след. – Бујар Османи – ДУИ
Идејата на Ахмети го отвора и прашањето дали ДУИ по изборите ќе отпадне од идната владина коалиција доколку инсистира на премиерската позиција. Од најголемите политички партии му одговорија – законот вели кој вели дека премиер станува оној кој ќе освои најмалку 61 пратеник на парламентарните избори. СДСМ не отстапуваат од ставот дека ако условот на ДУИ остане ист, место во идната Влада за нив нема да има. И од ВМРО ДПМНЕ појаснуваат – изборот на премиер не е политичка желба, туку го прават граѓаните преку гласање на изборите.