Српската полиција уапси двајца мажи од Бор осомничени за убиство на 2-годишното дете во своевиден пресврт околу причините за нејзиното исчезнување.

Двајцата осомничени се на возраст од 50 години и биле вработени во јавното претпријатие Водовод во Бор.

Кобниот ден со службен автомобил ја прегазиле Данка недалеку од куќата кај Бањско поле, а потоа како што пишуваат српските медиуми, повикувајќи се на полициски извори, во обид да го сокријат случајот, ја ставиле во гепекот и ја однеле во блиска дива депонија кон Брестовац, каде ја закопале. Српската полиција не ги потврдува ваквите информации, иако видео снимките од терен покажуваат како денеска со тешка механизација се пребарува местото кое го посочиле осомничените. Teлото се уште не е пронајдено, а веста за трагедијата, која според полицијата се случила само седум минути по пријавата на мајката за исчезнувањето на детето, ја соопшти претседателот Вучиќ, откако во коверт му беше донесена за време на денешната владината седница.

-Имаме лоши вести, за нашата мала Данка од Бор. Полицијата уапси две лица, за кои колку што разбирам, извршиле убиство. Со какви монструми ние си имаме работа. , изјави Александар Вучиќ, претседател на Србија.

Осомничените 9 дена молчеле, се до моментот кога трагата до нив ги носи полициската проверка на сите автомобили кои изминатиот период гравитирале во областа, вклучително и на нивниот службен автомобил Фијат Панда. ДНК и форензичката анализа ги откриваат примероците од крв на возилото, кои како што шпекулираат медиуми, осомничените претходно се обиделе да ги исчистат со киселина.

Двајцата осомничени го признаваат делото, а Телеграф.рс објави и видео снимка направена вчера која наводно ги покажува осомничените како во придружба на полиција се во обиколка на шумски предел.. Во отстуство на официјални информации, шпекулациите одат дотаму дека Данка ја преживеала сообраќајната несреќа, но била задавена од еден од осомничените.

Во трескавичната потрага по Данка, која во најголем дел беше фокусирана во поширокиот регион на Бор, беа вклучени неколку илјадници полицајци со кучиња трагачи, дронови и хеликоптери, пожарникари, ловци, рудари, доброволци, но не успеаја да го пронајдат девојчето. Надежта повторно се разбуди пред неколку дена кога се појави снимка од девојче во Виена кое многу наликуваше на Данка, но вчера беше потврдено дека се работи за друго девојче.