Сепак, Вархеји кој денеска беше во официјална посета на земјава, не одговори дали Бугарија е осамена во нејзините барања или има и други земји-членки на Унијата кои ја поддржуваат. Но, кажа дека очекува Македонија да ја одржи првата меѓувладина седница до крајот на годинава.
Премиерот Заев пак порача дека извештајот на Европската комисија покажува дека Македонија е на добар пат, а сите препораки и забелешките најави дека ќе бидат спроведени од страна на Владата.
Според него, во извештајот е нотиран и напредок во многу области, а позитивно е тоа што земјава има голема усогласеност со европското законодавство.
Еврокомесарот се обрати и пред пратениците, на кои им порача треба да спроведуваат реформи со поголема брзина, особено во поглед на зајакнувањето на владеењето на правото и реформите во јавната администрација, а додаде и дека потребна е поголема борба против корупцијата.
Посетата на Вархеји на земјава, ден по објавувањето на извештајот за напредокот на Македонија во Брисел е дел од неговата регионална турнеја, каде како втора точка е предвидена Албанија.