Како што информира Сојузот на композитори на Македонија (СОКОМ), на Собранието ќе учествуваат најмалку 50 композитори на уметничка, класична, аудиовизуелна, филмска и популарна музика од цела Европа. Заштитата на авторските права и третманот на композиторите се клучни теми, но останува можноста за остварување меѓусебни директни контакти и евентуално договарање индивидуални проекти.

Средбата официјално почнува задутре, со свечен прием, а Собранието е закажано за вторник.

- Состаноците на трите комитети од кои се состои ЕКСА ќе се одржат во понеделник. Ќе заседава и Бордот на Асоцијацијата по што во студиото М1 на МРТВ својот прв концерт ќе го одржи и новоформираниот ансамбл за современа музика на СОКОМ „Контемпора“ со дела од македонски автори, рече на прес-конференција Јана Андреевска, претставник на СОКОМ во ЕКСА.

За понеделник и вторник се предвидени планираните сесии.

СОКОМ ќе ја искористи шансата пред композиторите од Европа да ја претстави Македонија, како и можноста за работа тука. Воедно, ќе бидат презентирани и проблемите со кои се соочуваат македонските композитори.

- Важно е најпрво да се запознаеме за да можеме да преземаме заеднички акции ао е тоа потребно, рече Андреевска.

ЕКСА годишно одржува две вакви средби, едната секогаш се организира во Брисел каде што се седиштето и Канцеларијата на Асоцијацијата, а другата е во некоја друга земја.

- Досега тоа беше во западна Европа, но моите заложби од самиот почеток беа да се избегне доминацијата на членките од ЕУ зашто Европа не е само ЕУ, туку во неа има и други земји кои не се нејзини членки и треба и нивните интереси да се сослушаат и да се земат предвид, објасни претставничката од СОКОМ.

По нејзин предлог што бил поддржан од Бордот, Македонија годинава е избрана за земја домаќин иако во конкуренција била и Велика Британија, за одржување на Генералното собрание во Лондон.

- Ова покажува дека во рамки на Асоцијацијата има разбирање за заложбите организацијата во своите редови да развива различност, и покрај унифицирани интереси, нагласи Андреевска.

Во ЕКСА членуваат преку 40 организации од 22 земји. Преку нив, Асоцијацијата застапува 30.000 автори.