Регион

Грчката полиција ги објави првите фотографии на убијците на црногорските мафијаши (ФОТО)

Грчките медиуми ги објавија првите фотографии од убијците на припадниците на црногорскиот  клан , Игор Дедовиќ и Стеван Стаматовиќ, направени од безбедносните камери пред ресторанот во Атина, каде се случи убиството.

Бидејќи камерата во ресторанот не работела, биле најдени снимките од уредите лоцирани на околните згради. Снимките објавени од грчките медиуми покажуваат прилично нејасни ликови на четворица мажи во црно во близина на ресторан. Истите камери го снимиле и нивното бегство по двојното убиство, пренесува Блиц.

"На фотографиите се прикажани мажите, четворица од нив, облечени во црни јакни и со маскирни панталони кои шетаат кон ресторанот каде што седеа жртвите. Исто така, се гледа дека истите мажи бегаат од ресторанот по неколку минути", пренесоа грчките медиуми.

Објавени се и најновите информации од истрагата, така што грчкиот печат, повикувајќи се на полициски извори, објави дека во ресторанот биле истрелани 24 истрели со кои се погодени три жртви, што зборува за целта на убијците, но и за фактот дека станува збор за ладнокрвни извршители.

На неколку дена по ликвидацијата, грчката полиција се обидува да открие дали четворицата мажи влегле во земјата со фалсификувани документи како Дедовиќ и Стаматовиќ, кои имале фалсификувани патни исправи.

Се појави и информација дека црногорските криминалци целосно го промениле физичкиот изглед, дека Дедовиќ значително изгубил тежина и пуштил брада за да не биде препознаен.

Медиумите објавија дека контактите што можеби им овозможиле засолниште на Дедовиќ и Стаматовиќ во Атина, сè уште се пребаруваат, па полицијата интервјуирала осомничени жители на Атина со потекло од Балканот.

Да потсетиме, четворица неидентификувани лица влегле во грчки ресторан нешто пред 19 часот во неделата вечерта. Додека двајцата пукаа во црногорските мафијаши, други двајца ги чувале гостите и вработените во ресторанот. Тие потоа побегнале во црн џип што полицијата сè уште го бара.

Дедовиќ е познат како еден од водачите на клан од Црна Гора со своите кумови Јовиќ и Игор Вукотиќ, а Стаматовиќ е лидер на групата ,,Загорје’ од Подгорица, која тесно соработува со кланот на Дедовиќ. Иследниците бараат мотив за овие убиства криминалните кругови.

Фудбал

Ибрахимовиќ: Тешко ми беше да се откажам од фудбалот поради моето его

Поранешниот напаѓач Златан Ибрахимовиќ зборуваше за подкастот на „АБТалкс“ каде што разговараше за неговото пензионирање од фудбалот, неговото враќање во Милан како главен советник на сопственикот на клубот и за смртта на неговиот агент Мино Раиола.

-Добро сум, така ме третира животот. Секако, се повлеков од фудбалот пред повеќе од осум месеци, така што мојот живот сега е поинаков. Прифатив да се откажам од фудбалот, што беше тешка работа поради моето его и начинот на кој се доживував себеси. Мислам дека сум најдобар и сè уште сум таков. Можев да продолжам, но решив да престанам. Зошто? Сакам само добар живот за моето семејство. Сакав да правам работи со моите синови, а пред тоа не беше можно бидејќи имав проблеми со едното колено. Така го прифатив тоа и дојде момент кога си реков: „Во ред е, откажи се и отвори ново поглавје од твојот живот, вели популарниот Ибра.

Потоа, неколку месеци подоцна, го запознава Гери Кардинале, кој го надгледува фондот „РедБрд“ што го купи Милан.

-Ми даде понуда што не можев да ја одбијам. Така почнав да работам со Милан, откако бев во клубот три-четири месеци. Добро се однесуваат со мене таму, морам да признаам. Кога почина мојот агент Мино Раиола, тоа беше голем удар за мене. Многу плачев. Сè уште не е исчезнато чувството, бидејќи спомените постојано ми се враќаат. Скршен сум затоа што многу ми недостига. Секој што го познава знае колку бевме блиски. Да можам би му напишал: „Ми недостигаш“, сподели Ибрахимовиќ. /МИА

Шоу биз

Почесна Златна палма за Мерил Стрип на Канскиот филмски фестивал

 Познатата американска актерка Мерил Стрип (74) ќе добие почесна Златна палма за време на церемонијата на отворањето на овогодишниот Меѓународен филмски фестивал во Кан на 14 мај, соопштија денеска организаторите.

Холивудската актерка со рекордни 21 номинација за престижниот Оскар само еднаш била на Канскиот фестивал. Тоа беше пред 35 години кога филмот „Плач во темнината“ во кој играше, доби една од наградите на Канскиот фестивал.

Мерил Стрип освои три Оскари за улогите во филмовите „Крамер против Крамер“ (1980), „Изборот на Софија“ (1983) и „Челичната дама“ во 2012 година.

Актерката се прослави во филмовите „Лов на елени“, „Жената на францускиот поручник“, „Мојата Африка“, „Мостовите на округот Медисон“, „Сомнеж“ и „Заљубување“.

Почесна Златна палма годинава ќе добијат креаторот на серијата „Војна на ѕвездите“, Џорџ Лукас и колективно Студио Гибли на јапонскиот режисер за анимација Хајао Мијазаки.

Канскиот фестивал ќе се одржи од 14 до 25 мај, а за Златната палма се натпреваруваат повеќе од 20 филмови, меѓу кои и новиот филм на Френсис Форд Копола „Мегалополис“. /МИА

Фудбал

ФА го суспендираше Тонали на два месеци

Сандро Тонали беше суспендиран од фудбалот на два месеци. Нему му пресуди Независната регулаторна комисија откако призна дека учествувал во забрането обложување.

Покрај тоа, тој е казнет со 20.000 фунти и предупреден за понатамошно однесување.

Суспензијата е таква што Тонали нема да може да се врати на терените до крајот на сезоната, до кога ќе истече десетмесечната казна што му ја изрече Италијанската фудбалска федерација на 27 октомври 2023 година.

Доколку не го повтори истиот прекршок до крајот на сезоната, нема да мора да ја одлежи оваа двомесечна суспензија.

Фудбалскиот сојуз и Регулаторната комисија оценија дека Тонали соработувал и признал се за што е обвинет „на исклучителен и досега неевидентиран начин“.

Тонали целосно ги признал сите свои прекршоци, а тоа го направил во ситуација кога доказите практично не постоеле.

Тој продолжува да оди на терапија и едукативни програми на кои е должен да присуствува со целосна поддршка од клубот и продолжува да тренира со екипата./МИА

притисни ентер