Фотографијата на која се гледа како петнаесетина функциониери од редовите на ДУИ, седат еден до друг, без маски и дистанца била направена само како мало изненадување за да го овековечат 62 роденден на лидерот на партијата Али Ахмети, вели за Канал 5 вицепремиерот и министер Артан Груби. Маските ги тргнале само за момент, инаку ги почитувале протоколите, тврди тој.
Но, освен оваа фотографија, која на Фејсбук ја објави министерот Бујар Османи, како и на таа на која Ахмети сече торта без заштитна опрема, жестоки критики во јавноста предизвика и тоа што роденденот се прославува во просториите на новата зграда Министерство за политички систем. За ова Груби вели дека традиција било вакви настани да се организираат во државни институции.
„Настанот се организира на првиот работен ден во новата година и според протоколите. Сликата што ја објави Османи беше само еден момент – за заедничка фотографија, при мало изненадување што колега го приреди за господинот Ахмети, слично како и минатата година во Собранието, искористувајќи го неговото присуство. Протоколите првенствено ги почитуваме за нашето лично здравје и за нашите семејства, како и за граѓаните“,- вели Груби, кој воедно ни испрати и неколку фотографии, од свеченото пуштање на новиот објект на мнинистерството, како доказ дека се почитувале мерките за заштита од вирусот.
Шефот на дипломатијата, Османи, кој по негативните реакциии ја избриша фотографијата од фејсбук, истот така тврди дека нема ништо спорно во случајот.
За фотографијата освен граѓаните на социјалните мрежи, реагираше и опозициска ВМРО-ДПМНЕ. Оценија дека станува збор за досега незапамтен јавашлук и рашомонијада со државните ресурси и побараа казни за министрите на ДУИ за неносења на маски. Од партијата пред неколку дена забележаа и зошто Заев и Филипче возат мотори без маски и дистанца.
На социјалните мрежи пред Нова година, лидерот на партијата Христијан Мицкоски, објави фотографија на која исто така се гледаат десетина луѓе кои не носат маски и не ја почитуваат препорачаната дистанца, но иако побаравме, објаснување зошто не се почитувале мерките, до објавување на прилогот не добивме.