Македонија

Ковачевски: СДСМ била, е и ќе биде силна партија која не се откажува кога е најтешко

На вечерашниот митинг во Радовиш, претседателот на СДСМ, Димитар Ковачевски, им порача на присутните дека она што нив ги прави вредни како луѓе се единството и солидарноста, но и праведноста и подадената рака.

,,СДСМ покажува и докажува дека е најсилната партија во Македонија. Партија која не се откажува кога е најтешко. Партија која не потклекнува кога се очекуваат тешки одлуки. СДСМ, на чело со Киро Глигоров, ја внесе Македонија во Обединетите нации. Со СДСМ, Македонија во 2005 година го доби статусот земја – кандидат за членство во ЕУ. СДСМ, заедно со вас граѓаните го сруши режимот на Груевски, кој го блокираше патот на Македонија кон демократско и интегреирано евро-атланско општество. Со СДСМ, Македонија стана рамноправна членка на НАТО. СДСМ заедно со граѓаните Македонија ги отпочна преговорите со ЕУ. И затоа кога СДСМ ќе каже нема откажување, тогаш навистина нема откажување по било која цена“, посочува Ковачевски.

Тој додава дека е целосно свесен за пропустите што како влада ги правеле во изминатите години, но и тоа дека казната стигна на 24-ти април и ти ја прифатиле достоинствено и без негодување.

„Но, апелирам и повикувам, секој од вас, убаво да размисли како ќе гласа на 8-ми мај. На овие избори не одлучуваме само кој ќе ја води државата, туку одлучуваме и каде ќе оди нашата држава. Дали ќе продолжи цврсто да гази по европскиот пат или сите заедно повторно ќе станеме заложници на на авторитарната држава водена од белата криминална палата“, им порача Ковачевски на насобраните граѓани во Радовиш.

Ковачевски вели дека судејќи по изјавите на Мицкоски и на Силјановска, тие немаат никаква намера да ја водат државата кон Европската Унија туку напротив, ќе нѐ изолираат , затворат и ќе нѐ скараат и со соседите и со меѓународната заедница, враќајки нѐ најмалку 10 години во минатото.

„Затоа, почитувани граѓанки и граѓани, размислете каква држава сакате да градиме за вашите деца и вашите внуци. Дали сакате тие да живеат во лоша реприза од тоталитарното владеење на Груевски и неговата криминална екипа? Или сите заедно ќе изградиме слободна, просперитетна и европска иднина“, заклучува Ковачевски, додавајќи дека на 8-ми мај, изборот е токму во рацете на граѓаните и само тие одлучуваат во каква Македонија сакаат да живеат.

Живот

Дејвид Коперфилд обвинет за сексуална злоупотреба од повеќе жени

Повеќе жени го обвинија американскиот илузионист Дејвид Коперфилд за сексуална злоупотреба. Настаните се случувале во распон од неколку десетлетија, објави британски „Гардијан“.

Од 16 жени, некои биле и помлади од 18 години кога наводно се случило она што го тврдат. Коперфилд беше обвинет за недолично однесување и во 2018 година, кога жена по име Бритни Луис тврдеше дека тој ја дрогирал и сексуално ја нападнал три децении претходно. Натаму, три жени тврдат дека Коперфилд ги дрогирал пред секс. Настаните, според можните жртви, го опфаќаат периодот од доцните 1980-ти до 2014 година.

Коперфилд (67) одрекува каква било злоупотреба и „никогаш не постапувал несоодветно кон никого, а не пак, кон малолетник“, нагласуваат неговите адвокати.

Коперфилд претходно беше „под лупа“ и поради неговите врски со обвинетиот сексуален подведувач Џефри Епстин, кој почина во затвор во 2019 година.

„Нашиот клиент не беше свесен за грозоморните злосторства на Епстин... Како и остатокот од светот, и тој дозна за тоа од печатот“, тврдат адвокатите на Коперфилд.

Друга жена, која доби псевдоним во печатот, сведочи дека го запознала илузионистот по еден негов настап, кога имала 15 години. Таа раскажува дека следниве години, тој ѝ се јавувал доцна во ноќта и ѝ испраќал подароци, а кога наполнила 18 години, вели, двајцата имале консензуални односи.

Свет

САД одобрија потенцијална продажба на воена опрема на Украина во вредност од 100 милиони долари

Стејт департмент одобри потенцијална продажба на американска воена опрема за Украина во вредност од 100 милиони долари, соопшти Пентагон.

Во соопштението се истакнува дека Стејт департментот и одобрил на Украина потенцијалната продажба на опрема за копнено надгледување од НАТО, како и за поддршка и друга опрема за таа програма во висина од 250,2 милиони американски долари.

Главен продавач на воена опрема ќе биде американската одбранбена компанија „Нортроп Граман“ (Nortrop Graman).

НБА

Едвардс: Тренерот ми рече да бидам агресивен, иако ме удвојуваа

Кошаркарите на Минесота Тимбервулвс веќе се гледаа во финалето на Западната конференција од НБА плеј-офот кога двапати го совладаа Денвер како гости.

А потоа, седум дена подоцна, беа отпишани кога загубија три натпревари по ред од актуелниот шампион. Сега убедливо ги совладаа Никола Јокиќ и другарите и изборија „мајсторка“.

Минесота победи со 115:70 и стигнаа до седми меч од серијата, а најзаслужни за овој успех беа младите кошаркари Ентони Едвардс и Џејден МекДаниелс.

-Џејден беше наш водач денес. Претходно кажав дека сите во нашиот тим се лидери, а Џејден беше лидер вечерва. Тој исчекори во преден план. Тренерот Финч беше одличен и ми рече утрото пред натпреварот да најдам начин да бидам агресивен иако ме удвојуваа. Тоа го правеше и Феникс, па секако бев агресивен. Само размислував за тоа, изјави Ентони Едвардс по натпреварот.

Навивачите на Минесота беа загрижени за една ситуација во која Едвардс имаше болен пад, но на прашањето дали ќе игра во натпреварот број 7, поранешниот број 1 на НБА драфтот не остави простор за сомнеж.

- Дефинитивно ќе бидам подготвен за недела, изјави тој.

Седмиот, решавачки натпревар од серијата, е закажан за в недела на 19 мај во 22 часот по наше време.