Тим инженери од Универзитетот во Аризона наведува дека токму телото на ракетата Long March 3C било отфрлено од кинеската мисија Chang'e 5-T1 во 2014 година. Двојниот кратер најверојатно бил предизвикан, сметаат научниците, поради дополнителниот товар на ракетата што не бил на официјалната листа на Кинеската Национална вселенска агенција (CNSA), пишува Science Alert.
Ќе биде тешко да се одреди точно за каков товар станува збор без поблиска проверка, што е малку незгодно со оглед на тоа што кратерите се наоѓаат на „спротивната“ страна на Месечината од нас, што никогаш не може да се види директно од Земјата. „Ова е прв пат да видиме двоен кратер“, рече вселенскиот инженер Танер Кембел од Универзитетот во Аризона.
„Знаеме дека Chang'e 5 T1 удри директно надолу, и за да добиете два кратери со приближно иста големина, потребни ви се два посебни објекти со приближно еднаква маса“, додаде Кембел. Астрономите го следеле објектот, наречен WE0913A, од неговото откритие во март 2015 година до неговото евентуално паѓање на површината на Месечината минатата година.
Првично се претпоставувало дека тоа е погонот на вселенското летало SpaceX, но подоцна било утврдено дека мистериозниот објект припаѓал на кинеската мисија од 2014 година. Во новото истражување, научниците ја анализирале траекторијата на неидентификуваниот објект и промените во неговата рефлектирана светлина непосредно пред ударот со цел да откријат за што точно се работи.
Податоците укажуваат на дополнителна маса, односно товар, што делува како противтежа на моторите од едната страна на ракетата, што го објаснува двојниот кратер. ЦСНА не ја објаснија природата на дополнителниот товар. Напротив, тие дури и негирале дека тоа е нивна ракета.
„Не знаеме што би можело да биде. Можеби е некоја дополнителна структура за поддршка, дополнителен инструмент или нешто друго. Веројатно никогаш нема да дознаеме“, вели Кембел. Нема ништо необично во тоа што вселенските летала исфрлаат ракети за време на мисија, ниту пак во тоа што тие ќе ја погодат Месечината. Но, оваа ситуација е уште еден потсетник дека вселенското ѓубре станува сѐ поголем проблем.
Истражувањето, насловено како Physical Characterization of Moon Impactor WE0913A е објавено во списанието Planetary Science Journal.