Култура

На „БитФест“ целовечерен концерт на „Битолски дувачки оркестар“

Битолскиот дувачки оркестар по долгогодишна пауза повторно се јавува на јавната музичка сцена во градот, информираат од општина Битола во пресрет на вечерашниот целовечерен концерт што ќе се одржи на плоштадот „Магнолија“ во овој град.

Реактивирањето на Битолскиот дувачки оркестар е на иницијатива на професорот Марјан Бакревски кој по повеќе годишна работа во различни оркестри во САД како што се New England Philharmonic, Charls River Wind Ensamble, Wiener Kagran Musik, Dorfmusik Strebersdorf, k.u.k Regimentskapelle IR4. и други, се враќа во родната Битола и застанува на чело на овој оркестар, посочи Цветанка Ристевска, советник за односи со јавност.

Таа истакна дека на Битола како град со богата музичка традиција, долго време и недостасуваше дувачки оркестар. - Оркестарот кој некогаш постоел, денес во ново светло, со нови музички лица од кои зрачи љубов и емоција е реоформен од ентузијастот и капел мајстор на оркестарот Марјан Бакревски. Вечер на отворена сцена ќе бидат изведени дела од Штраус, Теике, Суза, Лехрман и други светски композитори, рече Ристевска.

Во рамки на „БитФест“ вечер во културниот центар „Магаза“ ќе биде одржан уште еден концерт на современ џез, а ќе настапат Иван Бејков, Александар Секуловски, Сашо Поповски и гостинот од САД Дејв Вилсон, професор по предметите саксофон, џез импровизација и џез ансамбли на Факултетот за Музичка Уметност при УКЛА Универзитет во Лос Анџелес.

Свет

Ерусалим: Илјадници демонстранти протестираат против Владата на Нетанјаху пред Кнесетот (ВИДЕО)

Додека членовите на израелскиот парламент повторно се состануваат по пауза од шест недели, попладнево пред зградата на Кнесетот во Ерусалим се собраа илјадници антивладини демонстранти од цел Израел.

Полицијата постави два реда барикади кои ги делат демонстрантите од Кнесетот, а присутните извикуваа слогани против премиерот Бенјамин Нетанјаху и неговата влада, пишува Тајмс оф Израел.

„Биби (прекарот на Нетанјаху) е опасност за постоењето на Израел“, извикуваа демонстрантите. Истакнатиот антивладин активист Шикма Бреслер рече дека целта на протестот, спроведен на легален и ненасилен начин, е „да им се врати на граѓаните на Израел можноста да влијаат на насоката во која се движи нивната земја“.

Демонстрантите пристигнаа во Ерусалим од целата земја, а многумина учествуваа во огромен, бавно движечки конвој на автомобили што се упати кон главниот град претходно денеска.


Свет

Израелците им порачаа на САД: Имаме намера да ја прошириме офанзивата во Рафа

Израел има намера да ја прошири воената операција во Рафа, му изјави денеска министерот за одбрана Јоав Галант на советникот на американскиот претседател Џо Бајден, кој предупреди од поголема акција во градот на југот на Појасот Газа.

Израел има намера да ја прошири воената операција во Рафа, му изјави денеска министерот за одбрана Јоав Галант на советникот на американскиот претседател Џо Бајден, кој предупреди од поголема акција во градот на југот на Појасот Газа, што може да доведе до масовни цивилни жртви.

Израел го опишува Рафа, град на границата на крајбрежната енклава со египетскиот Синај, како последно засолниште на исламистичкото движење Хамас, чие лидерство и борбен капацитет се обиде да го оневозможи за време на повеќе од седуммесечната војна.

По неколку недели јавно несогласување со Вашингтон околу планирањето на нападот на Рафа, Израел им нареди на палестинските цивили да се евакуираат од делови од градот на 6 мај, а израелските војници и тенкови ја започнаа операцијата. „Ние сме посветени на проширување на копнената операција во Рафа за да го завршиме отстранувањето на Хамас и враќањето на заложниците“, му рекол Галант на советникот за национална безбедност на Белата куќа Џејк Саливан, се вели во соопштението од неговата канцеларија.

Израел верува дека Хамас држи десетици заложници во Рафа откако го нападна јужен Израел на 7 октомври. Западните сили и Египет изразија загриженост за судбината на стотици илјади раселени Палестинци кои се засолниле таму и покрај израелските гаранции за нивна безбедност.

Агенцијата на Обединетите нации за помош и работа за палестинските бегалци (УНРВА) денеска соопшти дека проценува дека од 6 мај Рафа го напуштиле 810.000 луѓе, што е потенцијално повеќе од половина од неговото предвоено население.

Во соопштението од канцеларијата на Галант се истакнува дека тој „на советникот Саливан му ги претставил мерките што Израел ги спроведе за евакуација на населението од областа Рафа и обезбедување соодветен хуманитарен одговор“.

Свет

Закажани се вонредни избори во Иран по загинувањето на претседателот Раиси

По смртта на иранскиот претседател Ебрахим Раиси, на 28 јуни ќе се одржат вонредни избори за претседател на Иран, објави денеска Мохсен Еслами, претседателот на иранскиот избирачки штаб.

„Четиринаесеттите претседателски избори во Иран ќе се одржат на 28 јуни“, рече Еслами, а пренесе агенцијата Иран Мехр.

Тој додаде дека од Советот на чувари било побарано да започне регистрацијата на претседателските кандидати пред 28 мај.

До крајот на изборите оваа должност ќе ја извршува досегашниот прв потпретседател на Иран, Мохамад Мохбер.

Советот на чувари, надпарламентарно тело составено од членови на свештенството, е задолжен за одобрување на кандидати за извршни функции во владата на земјата, вклучувајќи ја и функцијата претседател на Иран, пишува ТАСС.

Прошталната церемонија за Раиси ќе биде организирана утре во градот Табриз, а неговото тело потоа ќе биде однесено во Ком, Техеран и Бирџанд, пред да биде погребано во неговиот роден град Машхад на 23 мај.

притисни ентер