Статуата стара 3.400 години на која е претставена главата на кралот Рамзес Втори е вратена од Швајцарија во Египет, откако била украдена и прошверцувана од земјата пред повеќе од три децении, соопшти тамошното Министерство за антиквитети. Статуата е однесена во Египетскиот музеј во Каиро, каде што ќе биде реставрирана, пренесува Ројтерс.
Статуата е украдена од храмот на Рамзес II во античкиот град Абидос во јужен Египет пред повеќе од три децении.
Шабан Абдел Гавад, кој раководи со Одделот за репатријација на антиквитети во Египет, рече дека се верува дека парчето било украдено во доцните 1980-ти или почетокот на 1990-тите.
Египетските власти го забележале артефактот кога бил понуден на продажба на изложба во Лондон во 2013 година, по што предметот пристигнал во Швајцарија.
– Оваа глава е дел од групата статуи на кои е прикажан кралот Рамзес II како седи покрај бројни египетски божества – изјави Абдел Гавад.
Египет работеше со швајцарските власти за враќање на статуата во земјата, а минатата година Швајцарија ѝ ја предаде статуата на египетската амбасада во Берн, но Египет неодамна го донесе артефактот дома.
Рамзес II бил еден од најмоќните фараони на древниот Египет, познат како Рамзес Велики. Тој бил третиот фараон од 19-тата египетска династија и владеел од 1279 до 1213 година п.н.е.