Владимир Потанин, претседател на металуршкиот гигант Норилск Никел и негов најголем акционер, рече дека Русија ризикува да се врати во турбулентните денови на Октомвриската револуција од 1917 година, ако ги затвори вратите за западните компании и инвеститори. Тој ја повика руската влада да дејствува со крајна претпазливост во врска со одземањето на имотот, пренесува Си-Ен-Ен.

„Прво, ќе не` врати 100 години наназад, во 1917 година, а последиците од таквиот потег, глобалната недоверба кон Русија од страна на инвеститорите, ќе ги трпеме со децении“, се вели во објавата на Потанин на профил на Норилск Никел.

„Второ, одлуката на многу компании да го прекинат бизнисот во Русија е, би рекол, донекаде емотивна по природа и можеби е донесена како резултат на невиден јавен притисок врз нив од странство. Така, тие најверојатно ќе се вратат. И јас лично би им оставил таква можност“, додаде Потанин.

Потанин е најбогатиот руски милијардер со имот во вредност од околу 22,5 милијарди долари според Блумберг, и покрај тоа што изгубил околу четвртина од своето богатство оваа година поради падот на акциите на Норилск Никел. Акцијата загуби повеќе од 90 отсто на берзата во Лондон пред да биде прекинато тргувањето, и покрај зголемените цени на нејзините производи.

Норилск Никел е најголемиот светски производител на висококвалитетен паладиум и никел, како и главен производител на платина и бакар. Компанијата и нејзините примарни производи ги избегнаа санкциите наметнати на руската економија од западните земји.

Десетици американски, европски и јапонски компании оставија заеднички вложувања, фабрики, продавници, канцеларии и други средства во изминатите две недели како одговор на руската инвазија на Украина и санкциите. Ним вчера им се придружија Голдман Сакс и Џеј Пи Морган, првите големи западни банки кои објавија целосно напуштање на Русија.

Рускиот претседател Владимир Путин вчедра изјави дека го поддржува планот за воведување „надворешно управување“ со странските компании што ја напуштаат Русија. „Мораме да дејствуваме решително кон оние кои имаат намера да го затворат своето производство. Неопходно е да се воведе надворешен менаџмент, а потоа да се префрлат овие компании на оние кои сакаат да работат“, рече Путин во видеото објавено од Кремљ.

Руската организација за правата на потрошувачите состави листа на компании кои решиле да ја напуштат земјата и би можеле да бидат национализирани, се наведува во извештајот на рускиот дневен весник „Известија“. Документот, кој наводно бил испратен до руската влада и до главниот обвинител, вклучува 59 компании, меѓу кои Volkswagen, Apple, IKEA, Microsoft, IBM, Shell, McDonald's, Porsche, Toyota, H&M, а во извештајот се посочува дека листата може да се надополни со уште повеќе брендови.

Потанин рече дека не е добро да се разговара за национализација на западните средства, но додаде дека Кремљ може да им дозволи на сопствениците да ги задржат средствата и компаниите за да избегнат колапс. Компаниите треба да продолжат да произведуваат и да ги плаќаат вработените.

„Разбирам дека поради економските ограничувања против Русија, може да има разбирлива желба да се дејствува симетрично. Но, на примерот на западните земји, гледаме како нивните економии страдаат поради санкциите против Русија. Мораме да бидеме помудри и да избегнуваме сценарио каде што реципрочно нè погодуваат санкциите“, смета Потанин.

Тој, исто така, ја повика Русија да ги олесни ограничувањата за странските валути за да може да се плаќа камата на странските обврзници и заеми. Во спротивно, постои ризик од еднократно доспевање на целиот руски надворешен долг, кој се проценува на околу 480 милијарди долари.