Според директорот на фестивалот Кузман Кузмановски, станува збор за најдобрите и најнови филмови од светот на анимацијата, бидејќи поголем дел од нив се носители на престижни награди и се победници на реномирани фестивали во светот. Селекцијата е извршена од досега рекордни 326 пристигнати анимации од разни делови од светот.

- Таа е нагорната линија на која ние се радуваме и веќе сме позиционирани и забележани во светот на анимацијата, бидејќи ни стигнаа филмови од Куба, од егзотични земји, од цел свет. Франција оваа година е најзастапена со девет филмови, Шпанија, Русија, Британија и САД, рече Кузмановски.
Тој нагласи дека годинава за главните награди-златна, сребрена и бронзена тула, ќе одлучува четиричлено жири во кое ќе има двајца застапници од Македонија - Мими Ѓоргоска Илиевска, директорка на Кинотека на Македонија и Диме Ратајкоски, главен и одговорен уредник на МРТ, како и гостите Андреј Рубетској светски афирмиран аниматор од Русија и Дорис Бауер коосновач на Автсрискиот филмски фестивалски форум.

Селектор на фестивалската програма Благоја Куновски Доре, изразувајќи задоволство од пријавените над 300 филма на фестивалот, подвлече дека тоа охраврува бидејќи покажува дека „Анимакс Скопје Фест“ си избори место на мапата на анимирани светски фестивали.

- Бројката на пристигнати филмови покажува дека имамем силна конкурнција. Практично една шестина е влезена од сите пријавени филмови. Секоја вечер ќе бидат прикажани по 15-16 филмови или околу 100-тина минути фестивалска програма. Тоа се филмови од сите континенти, а во селекцијата немаше сентименталност. Влегоа оние кои што навистина заслужуваат, така што од една од водечките светски анимации каква што е Франција, од девет пријавени филмови дури шест влегоа во официјална конкуренција, потоа Полска, која е светски позната во анимацијата е застапена со шест филма. Со по четири влегоа Италија, Шпанија, Германија, а има и кинматографии како американската, британската застапени со по три филма, рече Куновски.

Фестивалот отвора со филмот „The Wait Of May“ (Чекајќи го мај) на бардот на италијанската анимација Симоне Маси, кој е многу наградуван и автор на постерот за овогодишното издание на Venice Film Fest. На првата вечер на фестивалот ќе се претстави и македонскиот аниматор Иван Ивановски со филмот „Конзо“.

Втората вечер ќе ја отвори францускиот „Kiki of Montparnasse“ (Кики од Монтпарнас ), а третата италијанскиот „Beauty“ (Убавина)“, а дел од програмата ќе биде и „Man On The Chair“ (Човек на столчето), овогодишен победник на Интернационалниот фестивал за анимиран филм „Annecy“ во Франција“.

Традиционално, членовите на жирито од странство и оваа година ќе се претстават со работилници. Австријкаа Бауер, ќе одржи работилница на 5. декември, во Кинотека на Македонија со почеток во 12 часот, на која ќе говори на тема „Филмските фестивали – поттик и потреба“. Во сабота, пак, гостинот од Русија, Рубетској, кој е режисер на познатиот цртан филм „Белка и Стрелка“, (Space Dog Family) ќе одржи работилница за деца на возраст од 8 до 12 години, под наслов „Трикови на анимирање“. Работилницата ќе се одржи во 13 часот во Кинотека на Македонија.

За Златната тула за најдобар филм за деца ќе гласаат дечињата во текот на трите фестивалски денови од вкупно осум анимирани филмови за деца влезени во официјалната конкуренција. Наградите ќе бидат доделени на затворањето на фестивалот во сабота, 6ти декември.

Новина на овогодишното издание на фестивалот е соработката со Европската филмска академија ЕСРА Париз-Скопје-Њујорк Универзитетот за Аудиовизуелни Уметности - ЕСТА, кој што ќе додели две стипендии од по 3.000 евра. За стипендијата може да се пријават сите ученици од четврта година средно образование и лица со завршено средно образование кои поседуваат основно познавање за цртање. Заинтересираните треба да ги испратат своите лични податоци (име и презиме, возраст и контакт телефон) заедно со цртежи во било која техника и на било која тема на мејлот на фестивалот: [email protected] или [email protected]најдоцна до 4-ти декември.

Како што нагласи Кузмановски, од пристигнатите апликации ќе се направи избор на шест апликанти кои ќе учествуваат на работилница за традиционална 2D анимација во сабота, 6ти декември, во просториите на Универзитетот, а предавач на работилницата ќе биде Гоце Господиновски од ЕСРА“.

Тој најави дека по завршување на фестивалот ќе биде објавен отворен повик за македонските аниматори за едноминутна анимација, исто така, во соработка со ЕСРА, а деталите ќе бидат објавени дополнително. Најдобрата анимација ќе биде наградена со стипендија во вредност од 3.000 евра.
Официјалната програма во трите фестивалски денови ќе почнува во 20 часот,а билетите ќе чинат 50 денари и ќе може да се набават на влезот на Кинотека на Македонија. Детската програма во четврток и во петок ќе ја следат деца организирани од основните училишта, додека проекцијата во сабота ќе почне во 12 часот, а влезот е слободен за сите заинтересирани. Организаторите на фестивалот, порачуваат дека билетите треба да се чуваат и по проекциите затоа што се бесплатен влез за клубот Midnight за датумот назначен на картата.

„Анимакс Скопје Фест“ е во организација на продуцентската куќа Аурипигмент, во соработка со здружението на граѓани Креативен центар Тинтири-Минтири од Скопје, со поддршка од Министерството за култура и Град Скопје, а во соработка со Кинотека на Македонија.